U Rwanda rwashimye umuvuduko w’urugendo rwo kwihuza kwa EAC

  • NTAWITONDA JEAN CLAUDE
  • Ugushyingo 29, 2023
  • Hashize amezi 6
Image

Guverinoma y’u Rwanda yagaragaje ko yanyuzwe n’intambwe imaze guterwa mu ishyirwa mu bikorwa ry’imishinga na gahunda z’Umuryango w’Afurika y’Iburasirazuba (EAC) biganisha ku ishyirwa mu bikorwa ry’urugendo rwo  kwihuza k’uyu Muryango.

Ibihugu bihuriye muri EAC bikomeje gushyira imbaraga mu gushyira mu bikorwa gahunda ikomatanyije yo guhuza imikorere n’imikoranire mu nyungu z’abaturage babyo, mu rwego rw’ubukungu, imibereho myiza n’ubutwererane bwa politiki.

Intego nyamukuru ni ukugera ku iterambere rirambye rihuriweho, ari na yo mpamvu hari intambwe zimaze guterwa muri urwo rugendo nko guhuza za gasutamo byatangiye mu mwaka wa 2005, amasezerano yo gushyiraho isoko rusange yasinywe mu 2010, amasezerano yo guhuza ifaranga byakozwe mu 2013 ndetse n’ayo gushyiraho Ihuriro rya Politiki akiri mu nzira.

Izo ntambwe zose zatewe n’izikomeje guterwa zitezweho kugabanya ikiguzi ku ihererekanya ry’amafaranga mu Karere, guhanga amasoko yagutse kurushaho, kwihutisha ishoramari n’inganda, iterambere ry’abaturage rishingiye ku gukemura ibibazo by’amahoro n’umutekano n’ibindi.  

Mu cyiciro cya kabiri cy’Inama ya 2 y’Inteko Rusange ya 5 y’Inteko Ishinga Amategeko ya EAC (EALA), Minisitiri w’Intebe Dr. Ngirente Edouard wahagarariye Perezida wa Repubulika y’u Rwanda Paul Kagame, yavuze kou Rwanda rwishimira intambwe imaze guterwa mu rugendo rwo kwihuza kw’Akarere.

Yatanze urugero rw’ishyirwa mu bikorwa rya gahunda yo guhuza imipaka, koroshya n’uruza rw’abantu binyuze muri gahunda y’isoko rusange, ndetse n’intambwe imaze guterwa mu ishyirwaho ry’ifaranga rihuriweho mu Karere.

Yagize ati:Turashima kandi tunyuzwe n’intambwe imaze guterwa mu ishyirwa mu bikorwa ry’imishinga na gahunda z’Umuryango. Nanone kandi dushima intambwe EALA yateye mu rwego rw’amategeko, mu guharanira ko Akarere kihuza mu buryo buhamye. Ni muri urwo rwego abaturage ba EAC bafitiye icyizere inzego ziyoboye Umuryango, by’umwihariko mu guharanira ko urugendo rwo guhuza ibikorwa ruzana impinduka nziza kandi zifite ibisobanuro bizima mu buzima bwabo.”

Minisitiri w’Intebe Dr. Ngirente yahagarariye Perezida Kagame mu Nama y’Inteko Rusange ya EALA

Dr. Ngirente yakomeje avuga ko abaturage ba EAC biteze byinshi ku buyobozi n’Inzego z’uyu Muryango, ari na yo mpamvu ikiza imbere ari ishyirwa mu bikorwa ry’imishinga rikorewe igihe, cyane ko bizagira uruhare rukomeye mu kongera ubucuruzi bukorwa hagati y’ibihugu, abaturage bakabona amahirwe angana yo gupigana ku isoko ryagutse n’ishoramari rikarushaho koroherezwa.

Yakomeje ashima intambwe y’ibimaze kugerwaho n’Umuryango wa EAC kuva hashyirwaho umushinga wo guhuza za gasutamo mu myaka 18 ishize, agira ati: “Umusaruro ni uwo kwishimira, kandi ugaragaza inyongera ishimishije mu bucuruzi bukorerwa hagati y’ibihugu bya EAC bwavuye kuri miliyari 5.8 z’amadolari y’Amerika mu mwaka wa 2013, bukagera kuri miliyari 10.9 z’amadolari y’Amerika mu 2022. Iyi ni intambwe ikomeye yatewe.”

Yavuze ko nubwo hari ibyagezweho, hakigaragara imbogamizi z’ubucuruzi kuri za gasutamo zituma ikiguzi cyo gukora ubucuruzi gikomeza kuba hejuru, bikaba bishyira Akarere mu mwanya mubi.

Yavuze ko u Rwanda ruzirikana ingorane zijyanye n’Ingengo y’Imari EAC ihanganye na zo, aboneraho gushimangira ko hakenewe uburyo burambye bwo gutera inkunga uyu Muryango witezweho umusaruro uhambaye.  

Yakomeje agira ati: “Na none kandi birihutirwa kuri EALA nk’urwego rureberera imishinga y’Umuryango, gufata iya mbere mu guhaganira ko ubushobozi bwacu bukoreshwa neza. Mu gihe ibihugu bihuriye mu Muryango bikomeje gushora imari mu rugendo rwo rwo kwihuza, umusaruro w’imbuto nziza witezwe urushaho kugira imbaraga.”

Yaboneyeho gushimangira ukwiyemeza kwa Guverinoma y’u Rwanda mu gushyigikira urugendo rwa kwihuza kwa EAC, kuko yizera ko ibyo abaturage biteze kuri uyu Muryango bizagerwaho nta kabuza.

Iyo nama iyobowe na Perezida wa EALA Rt Hon. Joseph Ntakirutimana, yanitabiriwe na Perezida wa Sena Perezida wa EALA Francois Xavier Kalinda, Perezida w’Umutwe w’Abadepite Madamu Donatille Mukabalisa, ba Ambasaderi, abagize za Guverinoma n’abandi banyacubahiro.

Madamu Mukabalisa yahaye ikaze abitabiriye iyi nama y’Inteko Rusange ya EALA, ashimangira ko kuboneka mu nama yabereye mu Rwanda ari ikimenyetso cy’ubushake bwo guharanira kugira umuryango urushijeho kwihuza.

Yakomeje agaragaza uburyo u Rwanda rutewe ishema no kwakira Abadepite ba EALA, akaba ari amahirwe yo gutekereza ku byagezweho muri EAC, kuganira ku ngingo zirebana n’Akarere noku ngamba zifasha kurushaho kwihutisha iterambere ry’Umuryango.

YAgize ati: “Badepite bagize EALA, mu gihe muhuriye i Kigali muri iyi Nteko Rusange, ni ingirakamaro cyane kuzirikana impamvu EALA yahisemo gukora kubera ko ari byo bigaragaza ko intego n’intumbero z’uru rwego bitagarukira mu nama gusa.”

Yashimiye abo bashyitsi ko mu Muganda usoza ukwezi k’Ugushyingo, Abadepite ba EALA bifatanyije n’abaturage batera ibiti mu kurwanya isuri.

Yabashimiye kandi ubukangurambaga bakomeje gukora mu baturage ba EAC baharanira ko batamenya amakuru ku bikorwa by’umuryango gusa ahubwo bakagira n’uruhare rufatika mu rugendo rwo kwihuza kw’Akarere nk’abagenerwabikorwa b’ibanze.

  • NTAWITONDA JEAN CLAUDE
  • Ugushyingo 29, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE