U Rwanda rwashimiye APF yafashe umwanya wo kuvugira urubyiruko

  • NTAWITONDA JEAN CLAUDE
  • Nyakanga 8, 2022
  • Hashize imyaka 2
Image

Mu gitondo cyo kuri uyu wa Gatanu, Minisitiri w’Intebe Dr. Edouard Ngirente yahagarariye Perezida wa Repubulika y’u Rwanda Paul Kagame mu muhango wo gufungura ku mugaragaro Inama ya 47 y’Inteko Rusange y’Ihuriro ry’Inteko Zishinga Amategeko zo mu bihugu bikoresha ururimi rw’Igifaransa (APF).

Iyo nama iteraniye i Kigali guhera wa Kabiri taliki ya 05 ikaba yitezwe gusozwa kuri uyu wa Gatandatu taliki ya 09 Nyakanga 2022, ku nsanganyamatsiko igira iti: “Imiyoborere y’Isi: Uruhare rw’Inteko Zishinga Amategeko mu kubaka amahoro arambye.”

Minisitiri w’Intebe Dr. Ngirente, yavuze ko u Rwanda rwishimira kuba abasaga 300 bitabiriye iyo nama bahagarariye Inteko Zishinga Amategeko z’Ibihugu byabo bafashe umwanya bakavuganira urubyiruko, cyane ko ari rwo rugize igice kinini cy’Abanyarwanda n’abatuye Isi muri rusange.

Yagize ati: “U Rwanda rufite abaturage bagera kuri miliyoni 13 biganjemo urubyiruko. Ni amahirwe tudashobora guhakana nk’uko bimeze no mu bindi bihugu bikoresha ururimi rw’Igifaransa. Dukwiye kwimakaza politiki zituma urubyiruko ruba imbaraga z’iterambere. Ni yo mpamvu, nagira ngo nshimangire uruhare rw’ingenzi rw’urubyiruko mu guteza imbere indangagaciro z’Umuryango w’ibihugu bikoresha Igifaransa.”

Iyi nama yatanze urubuga rusesuye rwo kuganira ku bijyanye na politiki, imibereho myiza, ububanyi n’amahanga n’ubutwererane, ibijyanye n’imibanire y’Inteko zishinga Amategeko no gusangira ubunararibonye hagati y’ibihugu bikoresha ururimi rw’Igifaransa.

Dr. Ngirente yavuze ko kuba abahuriye muri iyi nama baturutse mu mpande enye z’Isi, bitanga amahirwe yo kurushaho gusangira ubunararibonye buri wese akagira ibyo yigira ku wundi mu guharanira kugera ku miyoborere myiza kandi irambye.

Yagarutse ku buryo icyorezo cya COVID-19 cyahinduye byinshi mu rwego rw’ubuzima no mu miyoborere, aho Isi yose yahakuye isomo ryo gukorana bya hafi mu kubaka ubushobozi buhagije bwo guhangana n’ibibazo by’ubuzima ndetse n’iby’umutekano w’abantu muri rusange

Yavuze kandi ko Inteko zishinga amategeko zikwiye gukorana n’inzego z’ubuyobozi mu guharanira gushaka umuti w’ibibazo byiyongera ku Isi. Yagize ati: “Abagize Inteko zishinga amategeko mu bubasha bwabo bwo kuba Intumwa za Rubanda, bagira uruhare rukomeye mu ishyirwa mu bikorwa no kunoza politiki rusange.”

Yakomeje avuga ko Inteko zishinga amategeko ari inkingi ya mwamba yo kwimakaza demokarasi no kubaka amahoro arambye, kuko hatariho imiyoborere myiza zigiramo uruhare imbaraga zishyirwa mu kubaka iterambere zaba imfabusa.

Yanakomoje no ku bibazo by’umutekano muke byibasiye Isi, by’umwihariko mu bihugu bikoresha ururimi rw’Igifaransa, aho usanga ibyo bibazo byambukiranya imipaka nk’uko byagenze no kuri COVID-19.

Yakomeje agira ati: “Nk’uko tubizi twese, ibihugu byinshi bihuriye muri uyu muryango byugarijwe n’icyorezo cy’iterabwoba.”

Yaboneyeho gushima ko imyanzuro izafatirwa muri iyi nama izagirira akamaro u Rwanda n’ibindi bihugu bihuriye muri iryo huriro, anatanga ubutumwa bwa Perezida Kagame wifurije ikaze abashyitsi bose bitabiriye iyi nama.

Ati : “Perezida wa Repubulika yifuje kubana namwe uyu munsi ayoboye uyu muhango, ariko kubera gahunda zahuriranye ntibyamukundiye… Ni iby’igiciro cyinshi kuba igihugu cyacu cyakiriye iyi nama ya 47 y’Inteko Zishinga Amategeko za Francophonie.”

Yashimiye ubuyobozi bwa APF bwatoranyije gukorera iyi nama y’ingirakamaro mu Rwanda, anashima by’umwihariko umubano uzira amakemwa urangwa hagati y’iri huriro n’Inteko Ishinga Amategeko y’u Rwanda.

Perezida w’Inteko Ishinga Amategeko ya Côte d’Ivoire akaba n’Umuyobozi wa APF, Adama Bitcogo, yavuze ko APF ikwiye guharura inzira yagutse ku batuye mu bihugu bikoresha ururimi rw’Igifaransa, by’umwihariko na we akomoza ku mahirwe akwiye guhangirwa urubyiruko kugira ngo rurusheho kuba ba Ambasaderi beza ku Isi yose.

  • NTAWITONDA JEAN CLAUDE
  • Nyakanga 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE