U Rwanda rwasabye ubufatanye mu kwigobotora ingaruka za COVID-19

  • Imvaho Nshya
  • Werurwe 30, 2022
  • Hashize imyaka 2
Image

Nyuma y’imyaka irenga ibiri ishize icyorezo cya COVID-19 cyadutse ku Isi, hagaragaye ingaruka z’ako kanya ndetse n’iz’igihe kirekire ku buzima, ubukungu n’imibereho y’abatuye Isi. Minisitiri w’Intebe w’u Rwanda Dr Edouard Ngirente, yongeye gusaba ubufatanye bw’ibihugu mu kwigobotora izo ngaruka zishobora guhindura icyerekezo cy’Isi hatagize igikorwa.

Mu nama mpuzamahanga ku miyoborere ya Guverinoma zo ku Isi (World Governments Summit) yaberaga i Dubai muri Leta Zunze Ubumwe z’Abarabu, Minisitiri w’Intebe yavuze ko hakwiye kubaho ubufatanye bw’ibihugu mu kuzahura ubukungu bwahungabanyijwe n’icyorezo cya COVID-19.

Iyi nama yari igeze ku munsi wayo wa 2 ari na wo wa nyuma, wanatanzwemo ikiganiro kivuga ku Ntego z’Iterambere Rirambye (SDGs). Ni inama yasubitswe inshuro ebyiri zose nanone bitewe n’iki cyorezo kitari cyoroheye Isi yose mu myaka ibiri ishize.

Dr. Ngirente yatangaje ko u Rwanda rushyize imbaraga mu gushyiraho ingamba zigamije kuzahura ubukungu bwahungabanyijwe n’icyorezo cya COVID-19 kugira ngo ruzashyire mu bikorwa izo Ntego z’Iterambere Rirambye.

Yavuze ko ubukungu bw’u Rwanda burimo kuzanzamuka kubera ingamba zafashwe zirimo nko gushyiraho Ikigega Nzahurabukungu (ERF), gahunda yo gufasha inganda zikora ikoresho bikenerwa mu buzima bwa buri munsi n’ibindi.

Indi ngamba yagize uruhare mu izahuka ry’ubukungu yagaragaje, ni ubwitabire bw’abaturarwanda muri gahunda y’ikingira aho kugeza ubu abari hejuru y’imyaka 18 bangana na 60% by’abaturage bose bakingiwe byuzuye.

Ingamba zose zashyizwe mu bikorwa kuva icyo cyorezo cyagera mu Rwanda muri Werurwe 2020 kugeza ubu, zatumye ubukungu bw’u Rwanda buzamuka ku kigero cya 10.9% mu mwaka wa 2021.

Yagize ati “Uyu munsi gahunda za Leta y’u Rwanda zo kuzahura ubukungu zirimo gutanga umusaruro ugaragara, u Rwanda rurimo kugaragaza ibimenyetso byo kuzahuka aho mu 2021 ubukungu bwazamutse ku kigero cya 10.9%, bikaba biteganyijwe ko buzazamuka ku kigero cya 7.2% mu 2022.”

Minisitiri w’Intebe yanavuze ko kugira ngo Intego z’Iterambere rirambye zigerweho uko bikwiye bitarenze mu 2030, hakwiye kujyaho ingamba zigamije kuzahura ubukungu ku bufatanye bw’ibihugu n’imiryango mpuzamahanga.

Ati «Kutagira ishoramari rihagije kuri gahunda z’iterambere rirambye muri iki gihe, bituma hari ibihugu bihazaharira bitewe n’ihungabana ry’ubukungu ryatewe n’icyorezo cya COVID-19. Hakenewe ubufatanye bukomeye kugira ngo habeho kuzahuka k’ubukungu mu buryo burambye, ubufatanye ku rwego muzamahanga no gushyira gahunda z’Iterambere rirambye mu igenamigambi ryo kuzahura ubukungu haba mu bihugu byateye imbere no mu bihugu bikiri mu nzira y’amajyambere.”

Yakomeje agira ati: “Kuzahura ubukungu kandi bigomba kugendana n’ubufatanye hagati ya za Leta, imiryango mpuzamahanga, ibigo by’imari ku rwego mpuzamahanga, imiryango itari iya Leta, urwego rw’abikorera n’ibigo by’ubushakashatsi, kugira ngo habeho intego zihuriweho zigamije gushyira ibintu ku murongo.”

Yakomeje ashimangira ko u Rwanda rurimo gukora ibishoboka byose muri uru rugendo rw’impinduramatwara rusaba ubwitange no gushishoza kugira ngo ibyo Isi yiyemeje kugeraho mu myaka igera ku munani iri imbere bizashoboke, cyane cyane binigaragaze ku mugabane w’Afurika ruherereyemo.

Iyo nama ku miyoborere yari ihuje abaturutse muri za guverinoma mu bihugu binyuranye, irimo abari mu nzego zifata ibyemezo n’impuguke zo hirya no hino ku Isi. Ni inama yateranye ku nsanganyamatsiko igira iti: “Gutegura Leta z’Ahazaza”, ikaba yagarutse ku ngingo zitandukanye zirimo ibijyanye no kubaka imijyi ijyanye n’igihe, gutegura uburezi n’imirimo by’igihe kizaza, kwihutisha izahuka ry’ubukungu, kubaka imishinga iramba kandi izana impinduka, kurenga imbibei mu bushakashatsi n’ibindi.

  • Imvaho Nshya
  • Werurwe 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE