U Rwanda rwakiriye Inama ikomeye mu bihugu bikoresha Igifaransa

  • NTAWITONDA JEAN CLAUDE
  • Nyakanga 5, 2022
  • Hashize imyaka 2
Image

Guhera kuri uyu wa Kabiri taliki ya 05 kugeza ku ya 09 Nyakanga 2022, mu Mujyi wa Kigali hateraniye Inama ya 47 y’Inteko Rusange y’Inteko zishinga Amategeko z’ibihugu bikoresha ururimi rw’Igifaransa (AFP).

Iri huriro rihuza inteko zishinga amategeko zisaga 90 zo mu bihugu byo ku migabane itanu, na ho iyi nama iteraniye i Kigali ikaba imwe mu zikomeye zihuza abayobozi cyangwa intumwa za rubanda mu bihugu bikoresha Igifaransa. 

Ihuje abahagarariye Inteko zishinga Amategeko z’ibihugu byabo basaga 200. Iyobowe na Perezida w’Umutwe w’Abadepite mu Nteko Ishinga Amategeko y’u Rwanda Mukabalisa Donatile afatanyije na Perezida w’Inteko Ishinga Amategeko ya Côte d’Ivoire akaba n’Umuyobozi wa AFP, Adama Bitcogo. 

Mu kiganiro n’abanyamakuru, Madamu Mukabalisa yavuze ko iyi nama ari urubuga rwiza rwo kuganira ku bijyanye na politiki, imibereho myiza, ububanyi n’amahanga n’ubutwererane, ibijyanye n’imibanire y’Inteko zishinga Amategeko no gusangira ubunararibonye hagati y’ibihugu bikoresha ururimi rw’Igifaransa.

Ati: “Ni umwanya mwiza wo kungurana ibitekerezo n’abagize Inteko zishinga Amategeko mu bihugu bikoresha ururimi rw’Igifaransa, tukareba n’ibibazo by’isi y’abavuga urwo rurimi. haba hari intego z’ingenzi zashyizweho n’inama z’Abakuru b’ibihugu na Guverinoma. U Rwanda ruzagira umwanya wo gusangiza abandi ubunararibonye ku nsanganyamatsiko igira iti: Ubudaheranwa bw’Abanyarwanda n’Iterambere rizana Impinduka z’Abanyarwanda mu myaka 28 tumaze nyuma ya Jenoside yakorewe Abatutsi.”

Yatangaje ko muri iyi nama, Inteko Ishinga Amategeko y’u Rwanda yiteguye gusangiza abitabiriye ikiganiro ku nsanganyamatsiko ijyanye n’ubudaheranwa bw’Abanyarwanda n’urugendo rw’iterambere rihindura imibereho y’abaturage mu myaka 28 nyuma ya Jenoside yakorewe Abatutsi.

Yavuze kandi ko iyi nama ari umwanya mwiza wo kwerekana ibyiza nyaburanga bikurura ba mukerarugendo biri mu Rwanda, kugira ngo bashobore kubisura, haba mu gihe cy’inama na nyuma yayo. 

Yahamije ko abitabiriye inama bitezweho kuba ba Ambasaderi beza mu bihugu baturukamo ku buryo bashobora no kujya baza gukorera ibiruhuko mu Rwanda basura ibyiza birutatse, akararikira n’abandi kuza kwihera ijisho. . 

Yashimiye itangazamakuru ku ruhare rigira mu kumenyekanisha ibikorwa, asaba Abanyarwanda gukomeza kugaragaza umuco mwiza basanganywe wo kwakira abashyitsi, gutanga serivisi nziza, kurushaho kumenyekanisha ku banyamahanga isura nziza y’u Rwanda.

Adama Bitcogo, wavuze ko bishimiye uko bakiriwe neza mu Rwanda, yashimangiye ko ihuriro ry’Inteko zishinga Amategeko mu bihugu bikoresha Igifaransa zikwiye kuba umuryango ukomeye kandi ufite ibikorwa by’ingirakamaro. 

  • NTAWITONDA JEAN CLAUDE
  • Nyakanga 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE