U Rwanda rwakiriye Ihuriro ry’abashakashatsi mu by’ubuhinzi

  • NTAWITONDA JEAN CLAUDE
  • Mata 30, 2022
  • Hashize imyaka 2
Image

Ikigo cy’Igihugu gishinzwe guteza Imbere Ubuhinzi n’Ubworozi(RAB) cyakiriye Ihuriro mpuzamahanga ry’Ibigo bikora ubushakashatsi mu by’ubuhinzi (CGIAR), hagamijwe guhuza imikorere muri urwo rwego ngo habeho kwihaza mu biribwa.

Ni inama yateguwe n’Ihuriro Mpuzamahanga ry’Ibigo bigera kuri 13 ku Isi bikora ubushakashatsi ku buhinzi (Consultative Group on International Agricultural Research, CGIAR), abayitabiriye barigira hamwe uko ubushakashatsi bwagira uruhare mu gukemura ikibazo cy’ibura ry’ibiribwa by’umwihariko muri Afurika.

Iyi nama y’iminsi ibiri yateguwe na CGIAR, yitabiriwe n’abayobora ibigo bishinzwe ubuhinzi, abashakashatsi, abikorera mu rwego rw’ubuhinzi n’abandi baturutse mu bihugu byo mu Burengerazuba bw’Afurika n’Afurika yo Hagati.

Mu gice cy’Afurika yo hagati kizashyirwa mu bikorwa mu bihugu bitatu, ari byo Repubulika Iharanira Demokarasi ya Congo, u Rwanda, n’u Burundi.

Umuyobozi Mukuru wa RAB, Dr. Karangwa Patrick yavuze ko guhurira hamwe bizakemura ibibazo byajyaga biboneka ahantu hatandukanye ku Isi, ariko ugasanga mu kubikemura byo bidakorewe hamwe.

Umuyobozi Mukuru wa RAB, Dr. Karangwa Patrick (Foto MINAGRI)

Yagize ati “Turahurira hamwe ukareba uko habaho gufashanya, ukareba uko ikibazo kiba cyavutse hano mu Rwanda cyangwa ahandi, hari ubwo usanga kiri no mu kindi gihugu, ni ukugira ngo Isi yose ibashe gufashanya mu byerekeye ubushakashatsi mu buhinzi n’ubworozi”.

Yongeyeho kandi ko ari nyungu kugira ibihurizwaho mu rwego rw’ubuhinzi.

Ati: “Aya mahugurwa ni inyungu nyayo, ifatika kandi ni umuyoboro w’imbaraga zo kwagura no kurushaho kunoza ubufatanye bwacu kugira ngo twihutishe iterambere no gufata ingamba zo kugera ku Ntego z’Iterambere Rirambye (SDGs)”.

Umuyobozi w’Umuryango uhuza ibigo bishinzwe iterambere ry’ubuhinzi mu Karere (International Institute of Tropical Agriculture, IITA) Dr. Regina Kapinga, we yatangaje ko ibibazo bikigaragara mu rwego rw’ubuhinzi bishobora kubonerwa ibisubizo muri Afurika.

Ati “Tuba twahurije hamwe abashakashatsi n’abafite aho bahuriye n’iterambere ry’ubuhinzi muri Afurika kugira ngo twicare turebe icyakorwa mu gukemura ikibazo cy’ibura ry’ibiribwa n’inzara muri Afurika.”

Yanakomoje ku kuba abashakashatsi bahuriye hamwe bitanga icyizere cyo kwihutisha kugera ku Ntego z’Iterambere rirambye ku Isi.

Ati: “Turakora tuganisha ku ntego z’Isi z’Iterambere rirambye (SDGs), zizagera mu mwaka wa 2030, turashaka amahoro ashingiye ku kubona ifunguro, guhangana n’imirire mibi mu babyeyi n’abana, kubonera imirimo urubyiruko, kubahiriza uburinganire no kudaheza, ndetse no guhangana n’imihindagurikire y’ibihe”.

Ku ruhande rw’abashakashatsi bavuga ko guhuza ubushakashatsi bizatuma bunguka ubumenyi bakabuhanahana kandi hakabaho no kubaka ubushobozi.

  • NTAWITONDA JEAN CLAUDE
  • Mata 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE