U Rwanda rurashima Sosiyete Sivile yahisemo gukora idahanganye

  • NTAWITONDA JEAN CLAUDE
  • Kamena 29, 2022
  • Hashize imyaka 2
Image

Ubuyobozi bw’Urwego rw’Igihugu rw’Imiyoborere (RGB) rwashimiye Imiryango itandukanye igize Sosiye Sivile mu Rwanda ku kuba yarafashe amahitamo anyuranye n’asanzwe amenyerewe y’uko imiryango itegamiye kuri Leta buri gihe gukora isa n’ihanganye ubwayo ndetse inyuranya na Leta.

Umuyobozi Mukuru wa RGB Dr. Usta Kaitesi, yavuze ko mu gihe abantu benshi bakeka ko Sosiyete Sivile ibereyeho guhangana no kutavuga rumwe, mu Rwanda ho hakomeje kuboneka umusaruro w’uko imiryango itari iya Leta ikorera hamwe yuzuzanya, mu guharanira intego imwe iganisha ku iterambere ry’Igihugu.

Dr. Kaitesi yabigarutseho mu muhango wo Kwibuka ku nshuro ya 28 Jenoside yakorewe Abatutsi wabereye ku Rwibutso rwa Jenoside rwa Nyanza ku wa Kabiri, wahuje abahagarariye imiryango itegamiye kuri Leta yo mu Rwanda n’abagize ihuriro ry’imiryango mpuzamahanga itari iya Leta (NINGO).

Yagize ati: “Abantu benshi bakeka ko sosiyete sivile ikora neza iyo ihisemo gukora itumvikana. Ndashimira abagize Ihuriro rya Sosiyete Sivile Nyarwanda bari hano kubera ko mwahisemo uburyo butandukanye. Mwashinze ihuriro mushaka kuba hamwe no kurebera hamwe ibintu mushinzwe mufatanyije. Ndashimira ko Sosiyete Sivili mu Rwanda yumviye ubusabe bwa Leta yahisemo inzira igaragara yo guharanira kuba umwe.”

Dr. Kaitesi yakomeje ashimangira ko kunga ubumwe biri mu byafashije u Rwanda kugera ku iterambere rwishimira uyu munsi. Yavuze ko nubwo nyuma y’imyaka 28 hibukwa abishwe muri Jenoside yakorewe Abatutsi, hanazirikanwa imbaraga y’ubumwe bw’Abanyarwanda yubatse Igihugu kubwo gusangira intego n’icyerekezo cy’ahazaza.

Umuyobozi w’Ihuriro rya Sosiyete Sivile Nyarwanda Dr.Nkurunziza Joseph Ryarasa, yavuze ko Sosiyete Sivile zitazatezuka gufatanya na Leta mu guharanira iterambere ry’u Rwanda no kunoza imibereho y’abaturage harimo n’abarokotse Jenoside yakorewe Abatutsi.

Leta na Sosiyete Sivile bamaganye ingengabitekerezo ya Jenoside mu Karere

Ubuyobozi bwa RGB, n’Ihuriro ry’imiryango itegamiye kuri Leta bwamaganye ingengabitekerezo ikomeje kugaragara mu bihugu by’Akarere u Rwanda ruherereyemo, by’umwihariko muri Repubulika Iharanira Demokarasi ya Congo (RDC) aho Abanyekongo bafite inkomoko mu Rwanda bahohoterwa mu buryo bunyuranye.

Izo nzego zavuze ko ingengabitekerezo ya Jenoside yose aho iva ikagera ikwiye guhagarikwa mu maguru mashya hashingiwe ku masezerano mpuzamahanga yo kurwanya Jenoside.

Ayo masezerano yemejwe n’Inteko Rusange y’Umuryango w’Abibumbye ku ya 9 Ukuboza 1948, aho amahanga yose yiyemeje guharanira ko urugomo n’ubwicanyi bwabaye muri Jenoside yakorewe Abayahudi, Intambara ya Mbere n’iya Kabiri y’Isi n’ahandi, bidazongera kubaho ukundi.

Nyamara, ayo masezerano ntiyabujije itegurwa n’ishyirwa mu bikorwa rya Jenoside yakorewe Abatutsi yatwaye ubuzima bw’abasaga miliyoni mu gihe cy’iminsi 100 yo guhera muri Mata kugeza muri Nyakanga 1994.

Nyuma y’imyaka ikabakaba 30 gusa, ingengabitekerezo n’ibikorwa byabanjirije Jenoside yakorewe Abatutsi bikomeje kugaragara muri RDC.  Mu byumweru bike bishize, ku mbuga nkoranyambaga hakwirakwiye amafoto n’amashusho y’Abanyekongo bazunguza imihoro, batema abitwaga Abanyarwanda, babafata nabi abandi babatwika n’ibindi bikorwa bigize ibyaha byibasiye inyoko muntu.  

Dr. Kaitesi yagize ati: “Mu gihe twibuka uyu munsi, dukwiye kuzirikana ko amagambo y’urwango n’ingengabitekerezo ya Jenoside bitari kure cyane yacu ndetse no kuri murandasi; kandi ntekereza ko muri urwp rwego rwese turi indwanyi. Nifuza ko twese twiyemeza ko imvugo “Ntibizabe Ukundi” yaba ingiro iteka.”

Umuyobozi w’Ishami rishinzwe Ubufatanye n’Itumanaho muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) na we yongeyeho ko ijambo “Ntibizasubira Ukundi” rikwiye kuba impamo.

Ati: “Twumvise ingengabitekerezo ya Jenoside mu Karere k’Ibiyaga Bigari, muri RDC. Dukwiye gukomeza kurwanya izo ngengabitekerezo mu gihugu no hanze yacyo. Ijambo Ntibizasubira Ukundi rigomba kuba impamo.”

  • NTAWITONDA JEAN CLAUDE
  • Kamena 29, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE