U Rwanda n’u Bubiligi basinye amasezerano ya Miliyari 131 Frw

  • NYIRANEZA JUDITH
  • Mutarama 31, 2024
  • Hashize amezi 4
Image

U Rwanda n’u Bubiligi basinye amasezerano y’ubufatanye angana n’amafaranga y’u Rwanda miliyari zisaga 131 azafasha guteza imbere inzego zitandukanye.

Ni amasezerano yashyizweho umukono na Minisitiri w’Imari n’Igenamigambi Dr Uzziel Ndagijimana ku ruhande rw’u Rwanda n’Umuyobozi Mukuru ushinzwe iterambere ry’ubutwererane n’ibikorwa by’ubutabazi muri Minisiteri y’Ububanyi n’Amahanga y’u Bubiligi, Heidey Rombouts ku ruhande rw’u Bubiligi.

Ayo mafaranga azakoreshwa mu buhinzi n’ubworozi, ubuzima no guteza imbere imijyi yunganira Umujyi wa Kigali.

Mu rwego rw’ubuhinzi n’ubworozi, mu myaka itanu ishize ENABEL yagize uruhare by’umwihariko mu guteza imbere ubworozi bw’amatungo magufi harimo inkoko, n’ingurube.

Mu buzima hakozwe ibikorwa bitandukanye harimo kubaka ibitaro bya Nyarugenge n’ibikoresho by’ubuvuzi bugezweho.

Umuyobozi Mukuru ushinzwe iterambere ry’ubutwererane n’ibikorwa by’ubutabazi muri Minisiteri y’Ububanyi n’Amahanga y’u Bubiligi, Heidey Rombouts asura ibi bitaro yavuze ko ari ibyo kwishimira kuba umushinga nk’uyu ukomeje kugirira akamaro abaturage.

Yagize ati: “Muri uyu mushinga mushya, u Rwanda n’u Bubiligi byongereye imikoranire yabyo iganisha ku iterambere rirambye. Nishimiye kuba ndi hano nk’umufatanyabikorwa ku byo u Rwanda rwiyemeje, impinduka ku bijyanye no kwihaza mu biribwa n’iterambere ry’imijyi yunganira Kigali ritangiza ibidukikije.”

Dr Uzziel Ndagijimana Minisitiri w’Imari n’Igenamigambi ubwo yashyiraga umukono kuri aya masezerano yashimye ubufatanye buri hagati ya Leta z’ibihugu byombi.

Yagize ati: “Uyu mushinga mushya ugaragaza ubushake bw’iterambere, ushimangira ubushake bwacu mu guteza imbere inzego zirimo ubuhinzi, ubuzima, iterambere ry’imijyi n’uburyo bw’imicungire y’imari ya Leta, nk’inkingi ikomeye ku iterambere ry’imibereho myiza mu Rwanda. Aya masezerano ashimangira kandi ubufatanye hagati y’ibihugu byacu.”

Ku mpande zombi mu gusinya ayo masezerano bavuze ko ari ikimenyetso cy’ubufatanye n’imikoranire myiza hagati y’Ibihugu byombi, u Bubiligi n’u Rwanda.

  • NYIRANEZA JUDITH
  • Mutarama 31, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE