U Rwanda ntirugipimisha mu mahanga  ibimenyetso byifashishwa mu butabera

  • NTAWITONDA JEAN CLAUDE
  • Werurwe 31, 2022
  • Hashize imyaka 2
Image

Kuba Leta y’u Rwanda yarashyize ingufu mu guteza imbere Labolatwari ipima ibimenyetso  byifashishwa mu  butabera n’ahandi byakuyeho  kujya gushaka izo serivisi  mu mahanga, bituma n’igiciro cyazo kigabanyuka.

Byagarutsweho mu kiganiro Ubuyobozi bwa Labolatwari  y’u Rwanda y’Ibimenyetso bya Gihanga byifashishwa mu butabera (RFL) bwagiranye n’abanyamakuru, cyabereye Kigali, uyu munsi ku wa 31Werurwe 2022.

Umuyobozi wa RFL Lt Col. Dr Karangwa Charles, yatanze urugero rw’uburyo ibiciro byagabanyutse ku bijyanye no gupima uturemangingo ndangasano (ADN/DNA).

Yavuze ko gupima abantu batatu (umugore, umugabo, umwana) uyu munsi bitwara amafaranga ibihumbi 267 mu gihe mbere u Rwanda rukijya gukoresha ibizamini hanze byatwaraga Amayero 1000 ni ukuvuga amafaranga y’u Rwanda agera kuri  miliyoni imwe. 

Yongeyeho ko nko kugira ngo agasanduku kamwe kagiye gukorerwa ibizamini kagezwe mu Buholandi byatwaraga Amayero 500 ni ukuvuga amafaranga y’u Rwanda asaga ibihumbi 500. Ibi byatumaga n’ibyo bohereza gupimwa biba bike cyane serivisi ntizihute.

Yagize ati: “Iyi ni intambwe ikomeye kandi ishimishije ku Gihugu cyacu. Uyu munsi habayeho kongera umubare w’ibyakorwaga kuko twabyoherezaga mu bihugu by’amahanga ariko ubu nta na kimwe kikijya hanze. Ikindi ni uko byagabanyije ingengo y’imari yakoreshwaga”.

Umuyobozi wa RFL Lt Col. Dr Karangwa Charles

Avuga ko uretse kuba igiciro cyaragabanyutse  byakumiriye n’imbogamizi zashoboraga kubaho mu gihe ibimenyetso byangirikiye mu rugendo.

Mu myaka itatu RFL itangiye, imaze gukora dosiye zatangiwe raporo  zigera ku bihumbi 25 zijyanye no gupima ibimenyetso, muri izo izigera ku 14,600 ni izirebana no gusuzuma ibikomere bituruka ku ihohoterwa,  4500 zo gusuzuma uturemangingo kugira ngo hagaragazwe amasano.

Hari izindi zakiriwe zigera ku 850,000 zo gupima ibikumwe n’inyandiko zigibwaho impaka, izirebana n’ibiyobyabwenge (imiti, urumogi,..),  ni ibihumbi 223, izigera ku 1587 zo gupima ingano y’alukoro n’uburozi mu maraso, 6 zo gusuzuma amajwi, 26 zijyanye no gupima imbunda n’amasasu, 16 zijyanye n’ibyaha bikorwa hifashishijwe ikoranabuhanga, 13 zirebana na mikorobe zateje ibyago.

Lt Col. Dr Karangwa yagaragaje ko ibimaze kugerwaho  bituruka ku kuba  Igihugu  cyarashyize imbaraga mu guteza imbere iki kigo  haba mu gushyiraho  abakozi no kubahugura bakavoma ubumenyi  mu bihugu byateye imbere.

Ubu  ngo hatangiye  n’urugendo rwo kugira ngo iki kigo kijye ku rwego mpuzamahanga.

Yagaragaje kandi ko cyatangiye no kuganwa n’abanyamahanga, aho kugeza ubu cyakiriye dosiye 22 zaturutse muri Repubulika iharanira Demokarasi ya Congo, 4 zaturutse muri Togo, 10 zo muri Cameroun na 17 zo muri Leta Zunze Ubumwe z’Amerika.

Ku kibazo cy’uko hari Abanyarwanda bari hirya no hino mu ntara bakigorwa no kugera kuri izi serivisi, Umuyobozi wa RFL Lt Col. Dr Karangwa Charles yavuze ko batangiye gahunda yo gushyiraho amashami hakurikijwe ubwiyongere bw’abagana iki kigo.

Bamwe mu baganiriye n’Imvaho Nshya bagarutse cyane ku bijyanye no gupima ADN, bavuga ko ari umuti ku kibazo cy’ababyeyi bihakana abana.

Nyiramana wo mu Karere ka Kicukiro yagize ati: “Ubu kuvuga ngo urihakana umwana byakugora kuko hari uburyo bwo gupima amasano […]. Bizatuma n’abakora ibyaha  birimo ihohotera bagabanyuka kuko hari uburyo bwo kubatahura”.

Abanyarwanda barakangurirwa kumenya ko ari uwahumanyijwe n’ibyo yariye, ari uwahohotewe, uwafashwe ku ngufu… hari uburyo bwo kumufasha kugira ngo ahabwe ubutabera.

  • NTAWITONDA JEAN CLAUDE
  • Werurwe 31, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE