U Rwanda ni nka Dawidi wanesheje Goliyati-Perezida Kagame

  • NTAWITONDA JEAN CLAUDE
  • Gashyantare 27, 2022
  • Hashize imyaka 2
Image

Kuri iki Cyumweru taliki 27 Gashyantare 2022, Perezida wa Repubulika y’u Rwanda na Madamu Jeannette Kagame, bitabiriye amasengesho ngarukamwaka yo gusengera Igihugu n’abayobozi bacyo azwi nka ‘National Prayer Breakfast’.

Muri ayo masengesho Perezida Kagame yavuze ko u Rwanda bibaye ngombwa ko uruhuza n’izina ry’umuntu waryitirira Dawidi, imwe mu ntwari zo muri Bibiliya yanesheje igihangange Goliyati cyari cyigabije ubwoko bw’Imana nk’uko biboneka mu rwandiko rwa 1 rwa Samweli 17:1-58.

Igitekerezo cya Dawidi kivuga ko yari umwana wa Umunyefurati w’i Betelehemu y’i Buyuda witwaga Yesayi, kandi Yesayi uwo yari afite abahungu munani. Ku ngoma ya Sawuli yari ageze mu za bukuru. Abahungu bakuru batatu ba Yesayi bari baratabaranye na Sawuli… Dawidi yari umuhererezi, kandi bakuru be uko ari batatu, bari baratabaranye na Sawuli. Ariko Dawidi yajyaga acuragana kwa Sawuli, aragira intama za se i Betelehemu.

Goliyati yari yarazengereje ingabo za Isiraheli uko bwije n’uko bukeye n’uko bwije akabasatira, agenza atyo iminsi mirongo ine yigaraganza. Maze Dawidi wari mu kigero cy’imyaka 15 avugana n’abantu bamuhagaze iruhande ati: “Uzica uwo Mufilisitiya agakuraho Isirayeli igitutsi, bazamugororera bate? Mbese uwo Mufilisitiya utakebwe usuzugura ingabo z’Imana Ihoraho, ni muntu ki?”

Dawidi yasatiriye Goliyati akura mu mvuba ye ibuye ararirekera, arikocora Umufilisitiya mu ruhanga ririgitamo, yikubita hasi yubamye. Uko ni ko Dawidi yahanguje Umufilisitiya ibuye ry’umuhumetso, aramunesha aramwica kandi nta nkota Dawidi yari yitwaje. Dawidi aravuduka amuhagarara hejuru asingira inkota ye, ayikura mu rwubati rwayo aramuhorahoza rwose, ayimucisha igihanga.

Pererezida Kagame yavuze ko agendeye ku miterere y’u Rwanda [ruto mu bigaragara] n’amateka yarwo n’ibyo rwagiye ruhangana na byo byinshi kandi bikomeye cyane, na rwo rumeze nka Dawidi bitewe n’ibintu byinshi rwanyuzemo by’umwihariko ibya COVID-19.

Igitekerezo cya Dawidi kigaragaza ukwihangana ari na byo byaranze u Rwanda ati: “Ngira ngo rero biragaruka no kuri rya jambo ryavuzwe ryo kwihangana. Ibyo twanyuzemo abo bitahitanye byabasigiye imbaraga zirenze izo bari basanganywe. Igihugu cyacu rero ni uko kimeze. Ndetse Igihugu cyacu kimeze nka Davidi batubwiye. Ugiye kugiha izina ry’umuntu kimeze nka Dawidi. Dawidi yahanganye n’ibihangage arabihirika byashakaga kumuhitana.”

Yakomeje avuga ko u Rwanda ari Igihugu cy’Imana ndetse cyishimira amahirwe menshi cyahawe na yo asaba abayobozi kutinanirwa mu gihe Imana yabahaye byose bakeneye.

Ni amasengesho abaye ku nshuro ya 27, akaba ategurwa n’Umuryango Rwanda Leaders Fellowship uhuza abayobozi bakuru b’Igihugu, ukaba ari na wo usanzwe utegura igikorwa cy’amasengesho yo gusengera u Rwanda.

Ayo masengesho yagombaga kuba taliki ya 9 Mutarama 2022 yabaye asubitswe kubera ubwiyongere budasanzwe bw’icyorezo cya COVID19.

Ni mu gihe iki cyorezo cyatumye ayo masengesho, asanzwe aba muri Mutarama, yongera gusubikwa muri Mutarama 2021 kuko na bwo muri uko kwezi icyorezo cyari cyongeye gukaza umurego bitewe n’uko cyabonye icyuho mu minsi mikuru isoza umwaka wa 2020 n’itangira umushya.

  • NTAWITONDA JEAN CLAUDE
  • Gashyantare 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE