U Bushinwa bwasoneye u Rwanda umwenda wa miliyari 7.7 Frw

  • NTAWITONDA JEAN CLAUDE
  • Ugushyingo 30, 2022
  • Hashize umwaka 1
Image

Leta y’u Bushinwa yemeye gusonera u Rwanda umwenda wa miliyoni 7.1 z’amadolari y’Amerika, ni ukuvuga amafaranga y’u Rwanda asaga miliyari 7.5, akazifashishwa mu kubaka umuhanda wa Masaka-Kabuga w’ibilometero 6.36 mu mushinga wo kuvugurura ibikorwa remezo by’Umujyi wa Kigali.

Itangazo ryashyizwe ahagaragara na Guverinoma y’u Rwanda ritangaza ko isonerwa ry’uwo mwenda wa miliyari 7.7 z’amafaranga y’u Rwanda rikubiye mu kuba Guverinoma y’u Bushinwa yariyemeje kudohorera bimwe mu bihugu by’Afurika bikiri mu nzira y’Amajyambere.

Leta y’u Rwanda ivuga ko umwanzuro w’u Bushinwa wo guhagarika uwo mwenda ugize icyemezo icyo gihugu cyafashe cyo gutanga inguzanyo zitishyurirwa inyungu nk’uko bikubiye mu masezerano y’ubukungu n’ubutwererane mu bya tekiniki hagati y’ibihugu byombi.  

Nyuma yo gusinya amasezerano yo guhagarika uwo mwenda mu ntangiriro z’iki cyumweru, Minisitiri w’Imari n’Igenamigambi Dr. Ndagijimana Uzziel, yagize ati:”Ibihugu byombi byishimira ubutwererane bwabyo buzira amakemwa. Ibi bigaragazwa n’umusanzu ukomeye Repubulika y’u Bushinwa itanga mu cyerekezo cy’iterambere ry’u Rwanda. Aya masezerano twasinyanye uyu munsi ashimangira uyu mubano.”

Minisitiri Dr. Ndagijimana yagaragaje uburyo u Rwanda rukomeje kuryoherwa n’inyungu zihebuje rubonera mu butwererane buzira amakemwa rufitanye n’u Bushinwa, cyane ko hari inzego zagaragayemo impinduka z’iterambere rifatika kubera imikoranire myiza n’icyo gihugu.

Muri izo nzego zahinduwe n’ubutwererane bw’u Rwanda n’u Bushinwa harimo urwo kubaka ibikorwa remezo bigezweho kandi biramba, iterambere ry’urwego rw’ingufu, uburezi n’urwego rw’ubuzima.

Ambasaderi w’u Bushinwa mu Rwanda Wang Xuekun, wari ahagarariye Igihugu cye mu isinywa ry’amasezerano, yagize ati: “U Bushinwa bwizera ko mu gutanga iyi nkunga y’amafaranga butanze umusanzu ukomeye mu iterambere ry’u Rwanda no mu rugendo rwo kwikura mu ngaruka z’icyorezo cya COVID-19.”

Yakomeje agira ati: “Mu gihe kizaza, u Bushinwa buzakorana n’u Rwanda mu guharanira kubaka ubutwererane burushijeho kwimbika mu nzego zitandukanye zirimo izijyanye no kubaka imihanda mu mishinga ibyarira inyungu abaturage b’ibihugu byombi.”

Umubano w’u Rwanda n’u Bushinwa umaze imyaka irenga 50, cyane ko ibihugu byombi byatangiye umubano wemewe mu bya dipolomasi guhera taliki ya 12 Ugushyingo 1971. Kuva icyo gihe kugeza n’uyu munsi, ibihugu byombi byishimira ko umubano wabyo wakomeje gutanga umusaruro ufatika mu nyungu z’abaturage babyo.

Kuva mu mwaka wa 1971 kugeza uyu munsi, u Bushinwa bumaze kugenera u Rwanda inkunga ya miliyoni zisaga 170 z’amadolari y’Amerika zatanzwe nk’impano. Ubucuruzi hagati y’ibihugu byombi na bwo bugenda bwiyongera buri mwaka cyane ko ibicuruzwa by’u Rwanda bikabakaba 5,000 byamaze kugera ku isoko ry’u Bushinwa ndetse hakaba harimo n’ibikunzwe cyane.

  • NTAWITONDA JEAN CLAUDE
  • Ugushyingo 30, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE