Twabonye inzira mu kwishakamo ibisubizo- Perezida Kagame

  • NTAWITONDA JEAN CLAUDE
  • Nzeri 30, 2022
  • Hashize imyaka 2
Image

“Ku bantu benshi b’indorerezi, icyo Abanyarwanda bagombaga guhanga amaso mu bisekuru bikurikira amateka mabi kwari ukubara ubukeye. Gutegura inzira igana ku burumbuke byasaga nk’inzozi z’ubugoryi.” Perezida wa Repubulika y’u Rwanda Paul Kagame, yabigarutseho mu kiganiro yagejeje ku bagera ku 1000 bahuriye muri Kaminuza y’Ikoranabuhanga ya Nanyang muri Singapore (NTU Singapore).

Icyo kiganiro cyari gihanzwe amaso na benshi mu biyandikishije ndetse bakaba banitabiriye bavuye muri Singapore, mu Rwanda no mu bindi bihugu. Umukuru w’Igihugu cy’u Rwanda yagaragaje uburyo Abanyarwanda bishatsemo ibisubizo mu gihe byagaragaraga nk’ibidashoboka, aboneraho gushima uruhare rwa Singapore muri urwo rugendo rushya.

Perezida Kagame yagaragaje uburyo mu mwaka wa 1994, u Rwanda rwari rugeze aho rutakibonwa nk’igihugu, kubera ko abasaga miliyoni bari bamaze kwicwa mu baturage babarirwaga muri miliyoni 7, ndetse bitewe n’ingengabitekerezo ya Jenoside n’abakabaye basigaye mu gihugu bakaba bari bagihunze.

Icyo gihe buri kigo cya Leta cyari cyasenywe ndetse n’umutungo w’igihugu wose warasahuwe, ari na byo byatumaga ababirebera kure batekereza ko abaturage bashobora kuvukira muri icyo gihugu kimeze gutyo bazabaho babara ubukeye, badafite icyizere cy’ahazaza.

Perezida Kagame yagize ati: “Turacyafite urugendo rurerure imbere yacu, ariko igihugu cyubatse umusingi mwiza w’iterambere. Twabonye inzira itwerekeza imbere mu guhanga udushya binyuze mu kwishakamo ibisubizo mu nzego eshatu z’ingenzi.”

Yakomeje atanga ingero muri izo nzego eshatu  u Rwanda rwahanzemo udushya, ahera ku mbaraga zashyizwe mu guhanga udushya tujyanye n’Ubumwe bw’Abanyarwanda n’imibanire myiza y’abaturage.

Ati: “Twatangiriye ku kubaka amahoro, kubera ko ni wo musingi w’ibindi byose byakurikiraho. Twahise nanone dutangiza urugendo rwo guhuza ingabo zabohoye Igihugu n’izatsinzwe zakoreraga Leta yabanje. Igihugu kidafite inkomoko nta hazaza kiba gifite. Amateka y’ubumwe bwacu yari yaravangiwe gakegake n’ubutegetsi bwa gikoloni na Guverinoma zakurikiyeho”

Yavuze ko hakurikiyeho gutangiza bundi bushya imigenzo gakondo ihuza Abanyarwanda harimo Igikowa cy’umuganda gihuriza abaturanyi hamwe kugira ngo basukure aho batuye. Nyuma y’igihe gito, abakekwaho ibyaha bya Jenoside yakorewe Abatutsi batangiye kurekurwa basubira mu miryango yabo, aho bagendaga bacirwa imanza mu Nkiko Gacaca, hagamijwe guhana no kugaragaza ukuri bikozwe n’abagize umuryango.

Ati: “Iki cyari ingenzi cyane ku barokotse Jenoside yakorewe Abatutsi n’abayibakoreye kugira ngo bongere kubana mu mahoro.  Twibanze cyane ku kwigisha urubyiruko rw’u Rwanda kubumbatira Ubunyarwanda dusangiye, aho kwibanda ku bidutandukanya. Umusaruro uhari uyu munsi ni uko ubushakashatsi bwihariye bwagaragaje ko u Rwanda ruri mu bihugu biza imbere ku Isi mu kubaka icyizere mu muryango.”

Imiyoborere ishyira umuturage ku isonga

Icya kabiri, Perezida Kagame yavuze ko hahanzwe udushya mu miyoborere idaheza, ishyira umuturage imbere, mu gihe imiyoborere yagejeje u Rwanda kuri Jenoside yatumye ibigo bya Leta n’imitungo bifatwa nk’umutungo wa bamwe na bo bake.

Ati: “No kwiga mu mashuri yisumbuye byari isumbwe ryaharirwaga ababaga bafite uko baziranye n’abanyepolitiki. Ariko igihe cyose abaturage batanyuzwe no gufatwa kimwe cyangwa guhabwa uburenganzira bungana, umutekano w’Igihugu uba uri mu kaga. Ni yo mpamvu turimo guharanira kubaka umuco wo guha amahirwe abafite ubushobozi, aho urubyiruko rw’u Rwanda ruzi ko gukora cyane n’ubudashyikirwa bitanga umusaruro hatitawe ku mateka y’umuntu.”

Yagaragaje ko kimwe mu bikorwa bimaze kuba umuco mu Rwanda ari icyo gusinya Imihigo, aho abayobozi bo mu nzego zitandukanye za Leta bagaragaza ibikorwa bifatika kandi bishya bazakora mu gihe cy’umwaka n’uburyo bizagenzurwa.

Ati: “Icyo ni kimwe mu bikorwa twatangije bishishikariza abaturage kubaza no kugenzura inzego za Leta ibyo zikora. Ni igikorwa cyoroshye ariko gifite imbaraga, kandi gihendutse.”

Kwimakaza ikoranabuhanga

Icya gatatu, Perezida Kagame yavuze ko gishingiye ku kwimakaza ikoranabuhanga mu nzego zose z’ubuzima bw’Igihugu. Mu mpera z’imyaka ya 1990, Leta y’u Rwanda yafashe umwanzuro wo gushyira ikoranabuhanga rya internet n’ubumenyi mu by’ikoranabuhanga rigezweho ku ruhembe rw’imbere muri gahunda z’iterambere ry’ubukungu bw’Igihugu.

Ati: “Bamwe mu bafatanyabikorwa bacu babanje kubirwanya, abaterankunga bariho icyo gihe, kuko batekerezaga ko ikoranabuhanga ryaba ari ukwaya (ugusesagura) mu gihugu gikennye. Ku bw’amahirwe twakomeje gusunika, none uyu munsi serivisi ziri mu bigize igice kinini cy’ubukungu bw’u Rwanda, zubakiye ahanini kuri rya shoramari mu bikorwa remezo no mu mahugurwa.”

Kuri ubu serivisi nyinshi za Leta, nko kubona icyemezo cy’amavuko, kwishyura imisoro n’izindi zitangirwa kuri internet, binyuze ku rubuga Irembo rwateguwe rukaba runakoreshwa n’impuguke z’Abanyarwanda.

Yakomeje avuga ko kuva icyorezo cya COVID-19 cyatera, u Rwanda kimwe na Singapore rurimo guharanira kuba ihuriro ryo gukora inkingo n’imiti. Mu mwaka utaha uruganda rwa mbere rw’inkingo zo mu bwoko bwa mRNA muri Afurika ruzatangizwa n’Ikigo cy’Abadage BioNTech, i Kigali.

Ati: “Ariko hari indi mpamvu twiyemeje kwimakaza ikoranabuhanga no guhanga udushya. Ikoranabuhanga riguhuza n’Isi yose, cyane cyane urubyiruko. Rifasha kubaka ukwifungura n’amatsiko. Ibyo byari ingirakamaro kuri twe, mu gihe twaharaniraga kurenga amacakubiri y’ahahise. Igihuza izo ngingo eshatu zishingiyeho udushya twagaragaje itandukaniro mu rugendo rw’u Rwanda ni agaciro ko guhindura imyumvire.

Kuva ahafunze ukagera ahafunguye. Kuva aho ku gutegera abandi amaboko ukagera ku kwigira. Hejuru ya byose habanje kwigirira icyizere cyo guharanira kuba abo turibo ba nyabo, nk’Abanyarwanda cyangwa nk’Abanyafurika, aho kugerageza gukopera cyangwa kwigana abandi.”

Perezida Kagame yagaragaje ko guhanga udushya ari ingenzi cyane mu mibereho ya muntu, atanga rugero rw’uburyo bifasha mu gukemura ibibazo by’ingufu n’ibiribwa. Yavuze ko ari udushya twatumye Singapore yubaka umuryango ukomeje kwaguka mu iterambere.

Yavuze ko icyo gihugu cyabigezeho binyuze mu gushora imari mu baturage, guhitamo politiki nziza, kubazanya inshingano mu badatanga umusaruro n’ibindi. Ati: “Ntabwo ari ibintu byikoze umuntu wese yafata uko yiboneye. Bisobanuye ko kugera ku iterambere ryihuse ari intego ibindi bihugu bishobora guharanira, kandi bikabigeraho hatitawe ku kigero bitangiriyeho.”

Perezida Kagame yaboneyeho gushima ba rwiyemezamirimo b’urubyiruko baturutse muri Singapore batuye kandi bakorera mu Rwanda, kuko bakomeje gutanga umusanzu w’ingirakamaro ku Gihugu, avuga ko biteguye kubona ubufatanye na Singapore burushaho kwiyongera mu bigo bitandukanye.

Yashimiye Kaminuza y’Ikoranabuhanga ya Nanyang yasinyanye amasezerano na Minisiteri y’Uburezi mu Rwanda, aho guhera mu mwaka utaha abanyeshuri b’Abanyarwanda bazatangira koherezwa muri yo.

Yavuze ko ubwo bufatanye ari ikindi gice cy’ingenzi cyiyongereye ku mubano w’u Rwanda na Singapore uzira amakemwa, agaragaza ko yishimiye kuba abanyeshuri  n’abashakashatsi  b’Abanyarwanda n’abo muri Singapore bagiye gukorana kandi ayo mahirwe bakaba bazayakoresha neza.

Asoza uruzinduko muri NTU Singapore, Perezida Kagame yateye igiti cy’Umukunde muri Singapore kikaba cyitwa Asam

  • NTAWITONDA JEAN CLAUDE
  • Nzeri 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE