Sobanukirwa ubutwari n’isano bufitanye na Ndi Umunyarwanda

  • NYIRANEZA JUDITH
  • Mutarama 29, 2024
  • Hashize ibyumweru 3
Image

Tariki ya 1 Gashyantare buri mwaka, u Rwanda rwizihiza Umunsi w’Intwari z’Igihugu. Muri uyu mwaka, Umunsi w’Intwari z’Igihugu uzizihizwa ku nshuro ya 30 ufite insanganyamatsiko igira iti: “Ubutwari mu Banyarwanda, Agaciro kacu”.

Ni byiza ko Abanyarwanda basobanukirwa neza ubutwari icyo ari cyo kandi bakanamenya isano bufitanye na Ndi Umunyarwanda.

Umunyamabanga Nshingwabikorwa w’Urwego rushinzwe Intwari z’Igihugu, Imidali n’Impeta by’Ishimwe CHENO Nkusi Deo, asobanura ubutwari icyo aro cyo ndetse n’isano iri hagati ya “Ndi Umunyarwanda” n’ubutwari.

Yagize ati: “Intwari ni umuntu ukurikirana icyo yiyemeje kugeza igihe cya kintu yiyemeje kivamo igikorwa cy’ingirakamaro ku muryango, kikaba igikorwa akora mu bwitange buhebuje, kikaba igikorwa akora adategereje inyungu, adategereje ibihembo ariko kikagirira akamaro umuryango, abantu benshi ubwo ni igihugu ni wo muryango mugari.”

Nkusi yakomeje asobanura isano iri hagati y’ubutwari na Ndi Umunyarwanda.

Ati: “Aho bihurira na Ndi Umunyarwanda ni uko wa muryango mugari umuntu abarizwamo burya ari igihugu. Guteza imbere igihugu, kurinda igihugu kugira za ndangagaciro zubaka igihugu ni byo bimugira intwari.”

Yakomeje asobanura ko indangagaciro usanga zifite ukuntu zihura zikuzuzuzanya, ariko iya mbere ari ugukunda igihugu kandi ko kugira ngo ukunde igihugu unakirengere ugomba kuba intwari kandi ko icyifuzo ari uko Abanyarwanda bose baba intwari.

Umunyamabanga Nshingwabikorwa wa CHENO yagarutse ku ndangagaciro remezo enye buri Munyarwanda akwiye kumenya n’izindi zishamikiyeho.

Gukunda igihugu

Yavuze ko indangagaciro ya 1 ari ugukunda igihugu, abaturarwanda, ubuyobozi bwabo, n’ubukungu bw’igihugu na kera bavugaga mu muco wa kera ubusugire bw’abaturarwanda, ubusugire bw’inka ni bwo bwari ubukungu bukomeye icyo gihe n’ubusugire bw’ingoma ni ukuvuga ubuyobozi bwabo.

Kunga ubumwe

Icya kabiri ni ubumwe, kunga ubumwe Abanyarwanda bakumva ko ari Abanyarwanda, ko bava indimwe, ko bafatanyije byose basangiye gupfa no gukira, bakarwanira gukomeza cya gihugu cyabo no kugiteza imbere.

Umurimo

Icya gatatu ni Umurimo, kuko ni wo uteza imbere abantu,umujryango , gukora umurimo unoze, aho werekeje amaboko uhashyira ubwenge bwawe, ukahashyira n’umutima wawe bikavamo umusaruro ufitiye benshi akamaro.

Ubupfura

Icya kane ni ubupfura, kurangwa n’ubupfura, imyifatire myiza, imyitwarire myiza, imibanire myiza ishimwa na benshi bishobotse ishimwa na bose.

Muri ibyo byose hakazamo ubutwari kugira ngo bya bintu byose mubisigasire, mubigereho mubigeze n’aho bigomba kugera mubiteze imbere kandi ntaho bigarukira kuko iterambere rirakomeza.

  • NYIRANEZA JUDITH
  • Mutarama 29, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE