Sobanukirwa intambara y’Inyenzi n’inkomoko y’iri zina

  • KAYITARE JEAN PAUL
  • Ukuboza 6, 2023
  • Hashize amezi 6
Image

Tito Rutaremara, Umuyobozi w’Urwego Ngishwanama rw’Inararibonye z’u Rwanda, yasobanuye inkomoko y’izina Inyenzi n’intambara zitandukanye urubyiruko rwiswe iryo zina rwarwanye nyuma y’umwaka wa 1962 u Rwanda rumaze kubona ubwigenge.

UNAR (Union Nationale Rwandaise) yari ifite urubyiruko rwari rwishyize hamwe (JUNAR) guhera hasi ku musozi kuzamuka kuri Su-Sheferi no kugera kuri Sheferi, bikagera kuri Perefegitura yari nk’Intara y’ubu.

Aho abakoloni na Parmehutu birukaniye abayobozi ba UNAR birukanyemo n’abakuru b’urubyiruko abenshi bahungiye muri Uganda.

Abayobozi bakuru b’urubyiruko rwa UNAR ni ho batangiriye urugamba (Struggle); icyicaro cyabo cyari i Kizinga hafi y’umupaka w’u Rwanda.

Ibikorwa byabo byari ukurwanya ubutegetsi bw’abakoloni mu bukungu bwabo; bahagarika ibikamyo byazanaga amapeteroli.

Umwe mu bayobozi ba JUNAR witwa Nyabujangwe yafashwe bari bagiye kurasa ibikamyo byazanaga peteroli mu Rwanda; yiciwe mu itsinda rya Ruhengeri mu 1963.

Hazagamo kandi kurwanya ba Burugumesitiri n’aba Konseyi bicaga Abatutsi, akenshi bagacikisha Abatutsi babaga bagiye kwicwa no gutera Leta y’i Rwanda ndetse byashoboka bakayikuraho.

Aho izina Inyenzi ryaturutse

Urubyiruko rwa JUNAR iyo rwajyaga gutera rwahuriraga mu Ntoki za Gakamba hafi ya Kizinga muri Uganda; umunsi umwe bicaye bari butere mu bice bya Byumba […], umwe muri bo witwaga Mutayi w’Umusinga, yumvise aba JUNAR bagenda mu isaso y’urutoki bimeze nk’Inyenzi zigenda mu isakamburira y’inzu aravuga ati “Aba-JUNARI babaye nk’Inyenzi”.

Bakora inama yabo bafata gahunda yabo yo gutera; bemeranya ko ijambo ry’ibanga baza gukoresha ku rugamba nijoro; bafata izina Mutayi yavuze ry’Inyenzi.

Muri ibyo bice bya Byumba bateye za Gitoki banyuze Ngarama; mu ijoro bagenda bavuga Knyenzi nka kode (Code) bari bemenyeranyijwe, abaturage babyutse bavuga hose ko batewe n’abantu bahamagaranaga “Inyenzi”.

Ndetse Parmehutu muri ibyo bice bya Byumba bashyiraho urubyiruko rwitwa Imbuma (Umuti urwanya inyenzi) rwo kurwanya Inyenzi, ni aho izina ‘Inyenzi’ ryaturutse.

Amashami y’Inyenzi

Ishami rya Uganda

Iri shami ari na ryo shami rya mbere ryatangiye, ryakomeje kurwana rigeza mu 1965. Ryarwaniraga mu Mutara, mu bice bya Byumba no mu bice by’Ubuganza.

Hari n’ubwo abahungu bateye bava mu mu Mutara banyura mu Rwanda bagera mu Burundi.

Mu nyenzi zo mu Bugande harimo abantu nka Ngurumbe (Yagiye kwiga Czechoslovakia) hari Kayitare (Umuhungu wa Rucyeba) yagiye i Burundi aza gupfirayo, hari undi witwaga Numa yiciwe Tanzania.

Ishami rya Burundi

Mu gihe cya Perezida Micombero, ishami ry’u Burundi ryaje gukomera bituma n’Inyenzi zimwe zari Uganda zijyayo zirimo Ngurumbe, Kayitare n’abandi bose babaga bavuye kwiga mu Bushinwa na Czechoslovakia.

Izi Nyenzi ni zo zateye zifata Nyamata ariko ziratsindwa zisubira mu Burundi nkuko Inyenzi za Uganda zateye zigafata Nyagatare ziratsindwa zisubira muri Uganda.

Ingaruka z’ibi bitero bya Nyamata na Nyagatare; Kayibanda yakoze ubukangurambaga bw’aba Parmehutu bica Abatutsi benshi Cyanika muri Gikongoro (Byaranditswe mu binyamakuru nka Le Monde na Radio Vatican irabivuga ko habaye Jenoside mu Rwanda) abandi Batutsi biciwe i Byumba.

Ishami ry’Inyenzi muri Kivu y’Epfo

Aba barimo benshi bari barwanye muri Congo hamwe na ba Mulele.

Iri tsinda ryarwanaga hamwe n’ingabo za Kabila; Che Guevara yaje kubasangayo ndetse aza kwandika ko Abanyarwanda bari bazi icyo bakora kurusha abo kwa Kabila.

Ariko aba na bo barateye bagarukira mu ishyamba rya Nyungwe basubizwayo ntacyo bakoze, ariko bafashije Abanyamurenge kwirwanaho.

Ishami rya Kivu ya Ruguru

Iri shami ryiyitaga ‘Intare’ ryayoborwaga na Mukurarinda, ryarwaniraga mu Birunga na bo nta kintu kinini bakoze.

Aba bose intambara zabo zo gutera u Rwanda zarangiye mu 1967.

Kuki batsinzwe?

Nta murongo wa Politiki bari bafite (Ideology) ikindi nta buyobozi bari bafite.

Ruswa; amafaranga babonaga yaribwaga na bamwe. UNAR yari yarasenyutse abayobozi baratatanye. Umwami Kigeli na we ntiyari yishoboreye.

Inyenzi zari zigizwe n’urubyiruko rufite ubushake ariko rubuze ubuyobozi.

Inyandiko ya Tito Rutaremara

  • KAYITARE JEAN PAUL
  • Ukuboza 6, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE