Sobanukirwa imikorere y’Ikigo cy’Igihugu gishinzwe ibizamini n’ubugenzuzi NESA

  • NTAWITONDA JEAN CLAUDE
  • Kamena 28, 2023
  • Hashize amezi 8
Image

Ikigo cy’Igihugu gishinzwe Ibizamini n’Ubugenzuzi bw’Amashuri (NESA) ni ikigo cyashyizweho n’Iteka rya Perezida No 123/01 ryo ku wa 15 Ukwakira 2020, ritangazwa mu Igazeti ya Leta taliki 19 Ukwakira 2020.

NESA ni kimwe mu bigo bishamikiye kuri Minisiteri y’Uburezi (MINEDUC), gishinzwe gushyiraho ibipimo ngenderwaho mu kwemeza amashuri yigenga y’uburezi bw’ibanze n’aya TVET yo ku rwego rwa mbere kugeza ku rwa gatanu.

Mu zindi nshingano NESA yahawe, ni ukugenzura ishyirwa mu bikorwa ry’amategeko n’ibipimo ngenderwaho mu mashuri y’uburezi bw’ibanze n’aya TVET yo ku rwego rwa mbere kugeza ku rwa gatanu ya Leta, ay’abafatanya na Leta ku bw’amasezerano n’ayigenga.

Hari kandi no kwita ku ireme ry’uburezi mu mashuri y’uburezi bw’ibanze n’aya TVET yo ku rwego rwa mbere kugeza ku rwa gatanu ya Leta, ay’abafatanya na Leta ku bw’amasezerano n’ayigenga.

NESA ifite inshingano zo gutegura, gukoresha no gukosora ibizamini bya Leta, gutangaza amanota yavuye mu bizamini bya Leta, gushyira mu myanya abanyeshuri batsinze ibizamini bya Leta barangije amashuri abanza n’ay’icyiciro rusange (O’Level).

Ikigo cy’Igihugu gishinzwe Ibizamini n’Ubugenzuzi bw’Amashuri gifite ububasha bwo gutanga impamyabushobozi ku banyeshuri batsinze ibizamini bya Leta mu mashuri y’uburezi bw’ibanze n’aya TVET yo ku rwego rwa gatanu, kwemerera ishuri ryigenga ritanga uburezi bw’ibanze cyangwa irya TVET ryo ku rwego rwa mbere kugeza ku rwa gatanu gutangira gukora.

Itanga uruhushya rw’ahakorerwa umwuga wo gutanga inyigisho z’imyuga n’ubumenyi ngiro n’impamyabushobozi bitarenze ku rwego rwa gatanu, guhagarika cyangwa gufunga ishuri ritanga uburezi bw’ibanze cyangwa irya TVET ryo ku rwego rwa mbere kugeza ku rwa gatanu, iyo bibaye ngombwa.

NESA kandi ifite ububasha bwo kugereranya no kugena agaciro k’impamyabushobozi n’impamyabumenyi zatanzwe n’amashuri yo mu mahanga atanga uburezi bw’ibanze na TVET yo ku rwego rwa mbere kugeza ku rwa gatanu.

Kanamugire Camile, Umuyobozi w’agateganyo w’ishami ry’ibizamini by’uburezi bw’ibanze n’amashuri ya tekiniki, yagaragaje uko ibizamini byakorwaga mbere ya Jenoside yakorewe Abatutsi mu 1994, bitandukanye n’uko bikorwa ubu.

Asobanura ko ibizamini byategurwaga na Minisiteri y’Uburezi binyuze mu kigo gishinzwe ibizamini. 

Icyo gihe ibizamini byakorerwaga ku ishuri akaba ari ho bikosorerwa, yaba ikizamini cyanditse cyangwa igikorwa mu buryo bw’ikiganiro (Interview).

Gukora ibizamini byari ukwemererwa bidashingiye ku bumenyi ahubwo ngo wagombaga kuba uzwi.

Atangaza ko higaga abanyeshuri bake akavuga ko hari uburyo bwo kwirukana. Ati: “Amashuri yari make n’abigaga bari bake ku buryo abatsindwaga bitabaga ikibazo”.

Kanamugire avuga ko imitegurire y’ikizamini yari myiza ikibazo kikaba cyari uko ibizamini byategurirwaga muri Minisiteri. 

Imitegurire y’ibizamini bya Leta nyuma ya Jenoside 

Kanamugire avuga ko nyuma ya Jenoside yakorewe Abatutsi mu 1994, Abanyarwanda bavuye mu bihugu bitandukanye kandi barize mu buryo bunyuranye.

Avuga ko icyo gihe Igihugu cyakoze uko gishoboye gitegurira abanyeshuri bose ikizamini cya Leta.

Mu 1997 hashyizweho Inama y’Igihugu y’Ibizamini kandi bigakorwa n’abantu bize mu buryo (System) butandukanye.

Mu 2007 ikigo gishinzwe ibizamini cyahise gihinduka ikigo cyigenga.

Akomeza agira ati: “REB ije bya bigo bifite ibizamini mu nshingano byahurijwe hamwe muri REB mu ishami rishinzwe ibizamini”. 

NESA itangaza ko kugira ngo hategurwe ibizamini, habanza umukoro wo guhuza abarimu bakabitegura.

Kanamugire yagize ati: “Dushaka abarimu bazakosora ibizamini ariko icyo navuga ni uko boherezwa n’Uturere hanyuma NESA ikabemeza”.

Kanamugire Camile, Umuyobozi w’agateganyo w’Ishami ry’ibizamini by’uburezi bw’ibanze n’amashuri ya tekiniki (Foto Germain)

Yongeraho ko ikibazo cyo kutishyura abarimu bakosoye ibizamini bya Leta kitakibaho kuko kuri Noheli baba barishyuwe bose. 

Kugeza ubu abanyeshuri bitegura gukora ibizamini bya Leta, ntibacyishyura amafaranga yo kwiyandikisha mu gukora ibizamini bya Leta.

NESA igaragaza kandi ko yongereye umubare w’abakosora ndetse ibigo bikosorerwaho ibizamini byariyongereye biva kuri 19 bigera kuri 34.

Nyuma yo gutegura ibizamini, hategurwa ibikoresho by’ibizamini, ibizamini nyir’izina, kubikosora, kubishyira mu ikoranabuhanga, hanyuma amanota agatangazwa.

Umunyeshuri watsinze ahabwa seritifika. Abanyeshuri batsinze bategurirwa amanota hakurikijwe uko batsinze by’umwihariko abazoherezwa muri Kaminuza y’u Rwanda.

NESA kandi itegura ibizamini by’abanyeshuri mu gihembwe cya gatatu, kuva mu mwaka wa Mbere w’amashuri abanza kugeza mu wa Gatandatu w’amashuri abanza.

Hakoreshwa ibizamini abanyeshuri biga mu wa Gatatu no mu wa Gatandatu w’amashuri abanza kugira ngo harebwe urwego bagezeho.

Mu bindi NESA ikora, ni ugukosora amazina ari kuri seritifika cyangwa ari ku cyangombwa (Results Slip) kigaragaza ko umunyeshuri yakoze ikizamini gisoza ikiciro rusange (O’Level).

Ikigo cy’Igihugu gishinzwe Ibizamini n’Ubugenzuzi bw’Amashuri nanone gitanga icyangombwa gisimbura impamyabumenyi y’amashuri yisumbuye (dipolome). 

Ubuyobozi bwa NESA buvuga kandi ko impamyabumenyi zajyaga zikorerwa mu Bwongereza ariko ubu ngo zikorerwa mu Rwanda mu kigo Rwanda Printery Company Ltd (RPC) akaba ari na cyo gicapa ibizamini bya Leta. 

Imibare y’agateganyo itangwa na NESA, igaragaza ko uyu mwaka abanyeshuri bazakora ibizamini bya Leta ari 421,973.

Abiga mu mwaka wa Gatandatu w’amashuri abanza ni 209,829, abo mu cyiciro rusange (O’Level) ni 131,482. Abazakora ibizamini bya Leta mu mashuri y’uburezi bw’ibanze ni 48,543. 

Mu mashuri y’imyuga n’ubumenyinginro, abazakora ni 28,141 mu gihe abo muri TTCs ari 3,978.

  • NTAWITONDA JEAN CLAUDE
  • Kamena 28, 2023
  • Hashize amezi 8
TANGA IGITEKEREZO
Victor says:
Nyakanga 26, 2023 at 2:20 pm

Ariko hari ibyanyobeye,kera gahunda yo gukora ibizamini yabanzirizwaga nibyo bita gushusha(guhitamo amashuri mubigo bitandukanye bagahitamo namasomo bazakurikira)nyuma haje kuzamo igitekerezo giha agaciro ingendo bagahitiramo umunyeshuri hafi yaho atuye ,ibyo byashimishije abanyeshuri ndetse nababyeyi,bidatinze ntawamenya uwazanye igitekerezo cyabitesheje akaciro,ibyo bitaribagirana haba haje ibyo bise gusaranganya ubumenyi batitaye kuho umunyeshuri yasabye cyangwa se kumanota yagize bakamuta ahantu nawe ubwe abona ko ari gihano ibyo byaciye intege abanyeshuri kuko babona ko gushyiraho umuhate kugira ngo azabone ishuri ryiza byateshejwe agaciro,twunva ko uwabishyize ho yashingiye kukugira ngo umunyabwenge azamure umuswa!!! ukibaza niba uwo munyeshuri abaye na mwarimu? Ibyo birabaye ariko se icyo nibaza kikanyobera kugeza ubu,ko gahunda yo gushusha nubu ikiriho,imaze iki niba umwana aho asabye atariho bamuha????
Tugenzuye ibihatakarira yaba ibikoresho yewe nigihe,ubiyobora abibonamo iyihe nyungu?
Ubyunva ambabarire ansobanurire.

Andika igitekerezo

AMATEGEKO AGENGA IYANDIKA RY'IGITEKEREZO CYAWE