Sobanukirwa gahunda TUBEGERE DUCA INGANDO yahinduriye amateka ab’i Rutsiro

  • NTAWITONDA JEAN CLAUDE
  • Ugushyingo 30, 2022
  • Hashize umwaka 1
Image

Gahunda TUBEGERE DUCE INGANDO ni gahunda idasanzwe ikaba n’umwihariko w’Akarere ka Rutsiro aho ubuyobozi bwihaye umukoro wo kumanuka bukamara iminsi itatu mu Murenge bukemura ibibazo by’abaturage.

Ni gahunda ubuyobozi buvuga ko bwafashe mu rwego rwo kurushaho kwegera abaturage bagakemurirwa ibibazo, bagasobanurirwa amahirwe ahari yabashiriweyho ngo abateze imbere ndetse bakajya inama mu rwego rwo gufatanya mu kugira uruhare mu bikorerwa umuturage kuko ngo ari byo biramba.

Ku wa  28 Ugushyingo 2022, umunyamakuru w’Imvaho Nshya yanyarukiye mu Karere ka Rutsiro, Umurenge wa Boneza ngo yirebere ibibera muri iyi gahunda idasanzwe yo kwegera abaturage.

Muri uyu Murenge, Umuyobozi w’Akarere Madamu Murekatete Triphose ari kumwe n’inzego zitandukanye zikorera mu Karere basuye ibikorwa by’iterambere biri muri uyu Murenge: amashuri, ikigo nderabuzima, ingo z’abaturage n’ibikorwa by’abashoramari.

Aganira n’itangazamakuru yavuze ko iyi gahunda bayitekereje mu rwego rwo kwegera abaturage n’abayobozi baganire ku bibazo  bihari babikemure ibyo badashoboye gukemura babikorere ubuvugizi aho imaze hafi amezi atatu.

Murekatete avuga ko n’ubundi mbere iyi gahunda yo kwegera abaturage yari isanzwe iriho aho begeraga abaturage mu gihe cy’umunsi ariko baje gusanga uwo mwanya ari muke bitewe n’ibibazo basangaga mu baturage.

Agira ati: “Twahise duhindura uburyo dutangiza gahunda ya TUBEGERE DUCE INGANDO, aho kuri ubu bajya mu Murenge bagatindamo bakareba ibibazo byose bihari bakagera ku muturage aho ari hose.”

Yungamo ko zimwe mu mpamvu zatumye bashyira imbaraga muri iyi gahunda idasanzwe ari uko hari abaturage batahwaga serivisi mu Nzego z’ibanze nkuko bikwiye, aho basura Imirenge mu gitondo bagasura ibikorwa naho nyuma ya saa sita bakaganira n’abaturage b’aho basuye.”

Bimwe mu byo bareba harimo kureba niba abaturage bararwanyije isuri, baracukuye ingarani, barateye ibiti by’imbuto banazikoresha ndetse ngo bajya mu ngo z’abaturage bakabyirebera.

Meya Murekatete avuga ko ku bijyanye n’imibereho myiza y’abaturage basura ibigo nderabuzima bakareba isuku ihari kuko ngo mbere batungurwaga n’umwanda igihe basuye mu bice bitandukanye.

Bareba ubwiherero ndetse bakareba n’imitangire ya serivisi harimo kureba n’uburyo abana bandika bakandukurwa mu bitabo by’irangamimerere ndetse ngo baboneraho umwanya wo kuganiriza abaje kwivuza ku mitangire ya serivisi na gahunda za Leta zibagenewe.

Uyu muyobozi avuga ko ku bigo by’amashuri bareba imyigire, niba abana bata ishuri ndetse ngo bareba n’ibijyanye n’aho barira n’isuku iharangwa bakanagenzura ibijyanye n’ireme ry’uburezi.

Agira ati: ”Hari aho tugera tugasanga abana baracucitse ntabwo biga neza nkuko bikwiye byose tukabikemura ntabwo birangirira aho kuko dufata umwanya wo kuganira n’abarimu tukumva ibibazo bafite ibyo dukemura tukabikemura ibindi tukabikorera ubuvugizi tunabibutsa ko bagomba gutanga uburezi bufite ireme bujyanye n’indangagaciro zikwiye kubaranga.”

Umusaruro ukomeje gutangwa

Meya Murekatete yemeza ko mbere basuraga ibigo by’amashuri bagasanga hari umwanda mu dusantere bagasanga hari ibibazo byatumye aho bageze mbere bagenda bagahana amakuru ko ibintu byahindutse.

Agira ati: ”Aho twatangiriye wabonaga ibintu bitameze neza, isuku ari nke tukabakebura noneho byageze aho bizana impinduka nziza kuko bagenda bahana amakuru bitewe n’ibibazo byagaragaye hamwe bagashaka uburyo  bitagaragara ahandi.”

Yungamo ko aho basanze hari ibibazo bikabije hariho uburyo bwo guhana uwakoze amakosa kugira ngo n’abandi barebereho ibintu bikorwa binyuze mu kanama gashinzwe ikinyabupfura no gucunga imyitwarire.

Ku munsi wa kabiri

Mu Karere ka Rutsiro ku munsi wa kabiri muri gahunda ya TUBEGERE DUCA INGANDO, Umuyobozi w’Akarere Wungirije Ushinzwe Iterambere ry’Ubukungu Havugimana Etienne ari kumwe n’Umunyamabanga Nshingwabikorwa w’Akarere Bagirishya Pierre Claver, na bo bagiranye inama n’abakozi b’Umurenge wa Boneza igamije kunoza imikorere.

Havugimana yavuze ko bafashe umwanya wo kuganira n’abakozi mu rwego rwo kujya inama mu buryo serivisi zigomba kurushaho kunozwa bafasha umuturage nabo bakora neza inshingano zabo.

Agira ati: ”Muri gahunda TUBEGERE DUCE INGANDO tuyimazemo iminsi hano mu Murenge twaganiriye n’abaturage ku buryo bwo gutanga serivisi nziza, isuku aho dukorera, kwita ku bikoresho bya leta gusura abo dushinzwe, imihigo, imyitwarire y’umukozi wa Leta n’ibindi bifasha mu kwitegura kwakira no guha serivisi nziza abaturage.”

Nshimiyimana Epa umwe mu baturage batuye mu Murenge wa Boneza yashimye iyi gahunda yo kubegera yemeza ko bagenda ibibazo byinshi mu yo bafite bibonewe igisubizo.

Agira ati: ”Ntako bisa gusurwa n’ubuyobozi bakatuganiriza bafite umwanya uhagije batari kwiruka ngo bagiye mu zindi nama, twashimye uburyo batugejejeho gahunda y’iterambere ry’umujyi wacu aho bagiye kutwongerera amazi n’imihanda ya kaburimbo.

Mutoni Arlette Umunyamabanga Nshingwabikorwa w’Akagari ka Bushaka muri Boneza na we ashima iyi gahunga yo gutindana n’abayobozi kuko ngo itanga umusaruro.

Agira ati: ”Tuboneraho umwanya wo kurushaho kwiga,  wo kumenya byinshi mu byo dukorerwa, ni umwanya mwiza wo kugeza ku bayobozi ibyo abaturage baba badutumye bigamije kubateza imbere turashima ubuyobozi buba bwateguye iyi gahunga kuko ituma barushaho kumenya gahunda zose zibagenewe.”

Ni kenshi ubuyobozi bw’igihugu bwagiye bukangurira abayobozi b’Inzego z’ibanze kurushaho kwegera abaturage mu rwego rwo gukemura ibibazo bibangamiye iterambere ryabo no gufatanya kubikemura.

Kuri ubu ubuyobozi bwo mu Karere ka Rutsiro bwemeza ko iyi gahunda izafasha mu kugabanya umubare w’abatonda umurongo bagiye kubaza ibibazo byaburiwe umuti Nyakubahwa Perezida Kagame mu gihe aba yasuye abaturage.

  • NTAWITONDA JEAN CLAUDE
  • Ugushyingo 30, 2022
  • Hashize umwaka 1
TANGA IGITEKEREZO
Elie uwiringiyimana says:
Ukuboza 1, 2022 at 9:14 am

Iyo photo ibanza aho ni Mumurenge wa kivumu ( Rutsiro) yafashwe ubwo abadepite basuraga uyu murenge sinzi impamvu mutubwirako ari muri boneza kandi aha nari mpibereye.

Andika igitekerezo

AMATEGEKO AGENGA IYANDIKA RY'IGITEKEREZO CYAWE