SGI Sports Academy yasoje ingando zo mu biruhuko zitabiriwe n’abana basaga 500

  • Imvaho Nshya
  • Kanama 30, 2022
  • Hashize imyaka 2
Image

Ku Cyumweru taliki 28 Kanama 2022, SGI Sports Academy yasoje ku mugaragaro ingando zateguriwe abana mu biruhuko ” SGI RISE UP CAMP” aho zari zitabiriwe n’abagera kuri magana atanu (500). Ni igikorwa cyabereye muri Cercle Sportif de Kigali.

Izi ngando zari zatangiye taliki 4 Nyakanga 2022, abana bakaba bigishwa gukina imikino itandukanye irimo umupira w’amaguru, umukino w’intoki wa Basketball ndetse na Karate.

Rurangayire Guy, Umuyobozi wa SGI Sports Academy agaruka kuri iyi ngando bateguye yagize ati: “Ubu twari dufite nk’abana 186 muri Karate, muri Basketball dufite abana 160, no mu mupira w’amaguru hari abana 100, bakaba hafi abana 500 bazaga mu buryo buhoraho Guhera ku wa Mbere kugeza ku wa Gatanu tukitoza kuva saa tatu kugeza saa sita mu byiciro by’imyaka itandukanye, ariko tukaba twari dufite abana 216 twatangiranye mu kwezi kwa mbere dufungura iyi gahunda y’irerero.”

Rurangayire Guy, Umuyobozi wa SGI Sports Academy

Avuga ko intego bafite nka SGI Sports Academy ari iyo gutegura abakinnyi beza b’ejo hazaza.

Ati : “Intego y’Irerero ryacu, ni ukwigisha abana imikino kandi mu buryo bwa gihanga hanyuma tukaba dutegura abakinnyi beza bo mu gihe kiri imbere ku buryo mu myaka mike cyane ishoboka itarenze 5 mu bana twatangiranye bafite imyaka 9, 10 tuzaba dufite abana dushobora kumurikira amakipe bakaba bakina ku rwego rw’ababigize umwuga no kuzamura ubumenyi bw’abatoza bacu.”

Uyu muyobozi asoza ijambo rye, akaba akangurira ababyeyi kuzana abana babo kugira ngo bahabwe ubumenyi mu mikino itandukanye.

Ati : “Nkaba nakangurira ababyeyi kuba batugana, ikintu cya mbere kugira ngo utugane ni ubushake ukahagera hanyuma ibindi bijyanye no kuba umunyamuryango babimenya binyuze ku mbugankoranyambaga za SGI, ibiciro byose biba biriho, amafaranga dusaba ababyeyi ni amafaranga aba atari menshi ku buryo umubyeyi wese ufite icyo akora ashobora kuba yayabona.”

Aba bakina Karate

SGI Sports Academy yashinzwe muri Mutarama 2022, abana bayigana bakaba basanzwe bakora imyitozo iminsi 3 mu cyumweru ku masaha atandukanye. Muri izi ngando, abana bahabwa ubumenyi n’abatoza batandukanye babifitiye ubumenyi.

Mu gihe gisanzwe cy’imyitozo itangwa muri iri rerero, mu mupira w’amaguru, Basketball na Karate bitoza buri wa Kane, ku wa Gatandatu ndetse no ku Cyumweru.

Mu gusoza izi ngando abana bahize abandi muri buri mukino bahawe imidali.

Muri Karate abahize abandi ni Uwadata Irebe Mouna, Uwimana Innocent Junior, Ineza Senga Nive, Mizero Ines Gaellana Bwiza Katia.

Mu mupira w’amaguru ni Rwamucyo Imena Blessing, Ineza Ganza Elvis Blessed, Ihirwe Akiva, Ishami Nolan Timeo, Kamana Joao.

Mu mukino wa Basketball  abitwaye neza ni Karera Jared, Ganza Laika , Niyomungeri Daniella, Cyusa Kenny na Munezero Aimable.

Abana bitwaye neza mu byiciro byose
  • Imvaho Nshya
  • Kanama 30, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE