Sena yashimiye Perezida Kagame kubera CHOGM yagenze neza

  • NTAWITONDA JEAN CLAUDE
  • Kamena 28, 2022
  • Hashize imyaka 2
Image

Abayobozi, urubyiruko n’abagore baturutse imihanda yose bitabiriye Inama y’Abakuru b’Ibihugu na Guverinoma y’Umuryango w’Ibihugu bikoresha Icyongereza (CHOGM), bakomeje kugaragaza uburyo bishimiye uko bakiriwe mu Rwanda n’uko iyo nama yagenze neza.

Abasenateri mu Nteko Ishinga Amategeko na bo batanze ubutumwa bushimira Perezida wa Repubulika Paul Kagame, ku bw’iyo ntsinzi n’igitego u Rwanda rwatsinze, kuri ubu akaba ari na we ukomeje kuyobora Umuryango w’Ibihugu bikoresha Icyongereza (Commonwealth) mu gihe cy’imyaka ibiri.

Mu Nteko Rusange ya Sena yateranye ku wa Mbere 27 Kamena 2022, Abasenateri batanze ubutumwa bugira buti: “Sena irabashimira ku mugaragaro, Nyakubahwa Perezida wa Repubulika, ku ruhare ntagereranywa mwagize kugira ngo Inama ya CHOGM igende neza kandi igere ku ntego zayo, bigatuma n’izina ry’u Rwanda rirushaho kubahwa, kandi Igihugu cyacu kigashimwa nk’Igihugu kigendwa, gifite umutekano kandi cyakira neza abashyitsi.”

Abasenateri basanga kuba u Rwanda rwarakiriye Inama ya CHOGM kuva ku itariki ya 20 kugera ku ya 25 Kamena 2022, ari intambwe ikomeye itewe nyuma y’imyaka 13 gusa u Rwanda rwinjiye mu Umuryango `Commonwealth’

Inteko Rusange ya Sena yashimiye Perezida Kagame, imaze kubona ko Inama ya CHOGM yitabiriwe n’abantu barenga ibihumbi bine, bakakirwa neza cyane, Inama ikaba yaragenze neza, irangira mu mutekano.

Yashingiye kandi ku mitegurire nta makemwa n’imigendekere myiza y’Inama ya CHOGM, bikaba byarongeye kugaragaza Ubudasa bw’u Rwanda, kandi byishimirwa n’Abanyafurika bagaragaje ko batewe ishema n’isura nziza y’Afurika u Rwanda rwagaragaje mu nama ya CHOGM.

Yanahereye kandi ku butumwa Abakuru b’Ibihugu na Guverinoma n’abandi batandukanye bakomeje  kwandika, bagaragaza ko bishimiye uko bakiriwe mu Rwanda n’uko Inama ya CHOGM yagenze.

Sena irashima byimazeyo uburyo Inama ya CHOGM yateguranywe ubuhanga, ubushishozi, n’ubufatanye bw’inzego zaba izo mu Gihugu, Ubunyamabanga Bukuru bw’Umuryango ‘Commonwealth’ n’iz’ibihugu byayitabiriye, byatumye intego yayo igerwaho, kandi abayitabiriye n’abayikurikiranye bose bakishimira uko yari iteguye n’uko yagenze.

Perezida Kagame na we yavuze ko imigendekere myiza ya CHOGM ishingiye ku bufatanye bw’inzego zitandukanye n’Abanyarwanda muri rusange, ashimira abagize uruhare bose agira ati: Ndashimira abafashije mu gutegura iyi nama bose, abashinzwe umutekano barinze abantu bose, abakozi hirya no hino ahaberaga inama zitandukanye, hamwe n’Abanyarwanda bose bitanze kugira ngo #CHOGM2022 igende neza! Ndabashimiye cyane, mwahesheje ishema igihugu!”

Umukuru w’igihugu yanavuze ko byari ishema ku Rwanda kwakira abayobozi bose bitabiriye iyo nama yashimangiye ubushake bwo guharanira ejo hazaza heza, hiyubashye ku baturage bo mu muryango wa Commonwealth.

  • NTAWITONDA JEAN CLAUDE
  • Kamena 28, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE