Se yaguye mu ndege ya Habyarimana Nyina azira Jenoside… Ubuhamya bwa Uwonkunda

  • Imvaho Nshya
  • Ukwakira 30, 2023
  • Hashize amezi 7
Image

Uwonkunda Irѐne ni umukobwa wa Dr. Akingeneye Emmanuel wari umuganga wa Perezida Habyarimana Juvénal akaba na we ari mu baguye mu ndege ubwo yahanurwaga ku ya 6 Mata 1994.

Kuri ubu Uwonkunda ni Umuyobozi ushinzwe imirire iboneye mu Kigo cy’Igihugu gishinzwe Imikurire no Kurengera Umwana (NCDA).

Yatanze ubuhamya bwagarutse ku buzima bwe bwite, mu gitaramo cyahuriyemo Abanyamuryango ba Unity Club Intwararumuri ndetse n’abandi bitabiriye Ihuriro rya 16 ry’uyu Muryango ku Cyumweru tariki ya 29 Ukwakira.

Uwonkunda avuga ko Ndi Umunyarwanda ayibonamo ibice bibiri birimo uruhare rwa Leta n’uruhare rw’Umuryango.

Yatanze urugero ku giti cye kugira ngo ashobore gusobanura icyo Ndi Umunyarwanda kuri we ivuze.

Yagize ati: “Njyewe ndi umukobwa wa Dr Akingeneye yari umuganga wa Perezida Habyarimana, yaguye mu ndege hamwe na we, iyo nkuru tumaze kuyumva ntabwo byari byoroshye.

Byari bikomeye cyane ariko icyaje kuduhungabanya kurushaho ni uko haje kuba Jenoside yakorewe Abatutsi, umuryango wa mama hafi ya wose barawuhitana”.

Avuga ko ibyo byabaye ikibazo gikomeye, ibi bintu byose byamuhuriyeho ntabwo byari byoroshye ariko ngo bitewe n’uburere yabonye buzira amacakubiri byamwubatsemo ubunyarwanda.

Ati: “Kubera uburere nahawe, baturinda amacakubiri, byabashije kumfasha nkaba ndi mu Rwanda kandi igihugu kikaba cyarangiriye icyizere kikaba cyarampaye inshingano ariko muri izo nshingano kikaba cyarambonyemo ubushobozi.”

Yagiye mu kazi agakorana imbaraga ariko aza guhura n’abantu batabyishimiye nabyo bimutera irindi hungabana ariko agira Umuryango n’abandi bantu bamufashije komora ibyo bikomere.

Kuri we, Ndi Umunyarwanda yaba iy’umuntu bihereye mu muryango kuko ngo ugira inshingano zo guha abana uburere buboneye kandi n’ibikomere yaba yaragize, akabirinda abana kugira ngo nabo baziyubake.

Yishimira ko Leta yereka buri munyarwanda ko afite Uruhare rwo kubaka igihugu nayo igashyira imbere ubumwe bw’Abanyarwanda.

KAYITARE JEAN PAUL

  • Imvaho Nshya
  • Ukwakira 30, 2023
  • Hashize amezi 7
TANGA IGITEKEREZO
Eraste Mupenzi says:
Ugushyingo 1, 2023 at 4:52 am

Yagize ibyago pe kubura papa we akabura na family nyina avukamo birababaje Imana imuhe gukomera kd na abandi bameze nkawe

Andika igitekerezo

AMATEGEKO AGENGA IYANDIKA RY'IGITEKEREZO CYAWE