Rwanda: Haracyagaragara akato gahabwa abafite agahinda gakabije

  • Imvaho Nshya
  • Nzeri 29, 2023
  • Hashize amezi 8
Image

Ibibazo bitandukanye abantu bahura nabyo, bakabyakira mu buryo butandukanye, hari abo bisigira uburwayi bwo mu mutwe, bikaba byanagera ku gahinda gakabije, umuryango mugari muri rusange ntumwibonemo ahubwo ukamuha akato.

Kayigire Epiphanie utuye mu Mudugudu wa Kidudu, mu Kagari ka Cyugaro, mu Murenge wa Ntarama, Akarere ka Bugesera ni umwe mu bagize agahinda gakabaije bitewe n’ubuzima yanyuzemo.

Kayigire kuri ubu ufashwa n’inzobere mu isanamitima zikorera mu Kigo Aheza (Centre Aheza) mu Karere ka Bugesera avuga ko yashyizwe mu kato n’abantu batandukanye.

Aganira na Imvaho Nshya yavuze ko mu gihe umuntu afite agahinda gakabije aba afite imyitwarire yatuma abandi bamuha akato.

Yagize ati: “Iyo umuntu afite ikibazo cyo mu mutwe usanga abantu bamwitaza bakeka ko ashobora kubagirira nabi. Usanga abo tudahuje ibibazo baduhunga bakatunnyega mu byiciro bitandukanye, mu banyeshuri, mu bantu bakuru”.

Munyankore Jean Baptiste wahoze ari umurezi, avuga ko aho atuye mu Karere ka Bugesera, ari naho yarokokeye JenosIde yakorewe Abatutsi mu 1994. Avuga ko imyaka amaze yose yahuye n’ibibazo byinshi byatumye agira ihungabana ndetse n’agahinda gakabije.

 Yagize ati: “Twagize ibibazo bikomeye batwiciye abana, ababyeyi, Ikigo Aheza cyatugiriye akamaro. Njya kuza hano abakozi ba Centre Aheza baratuganirije, baduha inyigisho, twari dufite ibibazo abantu baradushyize mu kato,”

Dr. Ndacyayisenga Dynamo avuga ko abarwayi bo mu mutwe bagihabwa akato

Mukamwiza Anastasie we yatangarije Imvaho Nshya ko mbere yo kuza kuri Centre Aheza, yari afite agahinda n’umubabaro, kandi hari bamwe babafataga nk’aho ari abasazi.

Avuga ko hari n’ababatoteza bakanabatera amabuye, bakabasagarira, bakabafata nk’abatagize icyo bamaze.

Yagize ati: “Mbere yo kuza kuri iyi Centre twari mu bwigunge, tutameze neza kubera ibibazo byagiye bitubaho, ducecetse, twigunze, baje kudutekerezaho bakajya batuzana hano muri siporo, bakatuganiriza, bakadufasha noneho bya bindi byari biturimo bikagenda bituvamo buhoro buhoro”.

Umuhuzabikorwa w’Ikigo Aheza (Centre Aheza), Mulisa Aime Josiane   ahamya ko koko abafite ibibazo byo mu mutwe bahabwa akato, ariko ko ubukangurambaga n’inyigisho z’isanamitima baha ababagana zitanga umusaruro.

Ibi yabitangaje ubwo Itsinda ry’Abanyamakuru barwanya SIDA n’izindi ndwara bibumbiye muri ABASIRWA  basuraga iki kigo nka hamwe mu hantu hasuwe n’abitabiriye amahugurwa mu bukangurambaga bwo kurwanya SIDA, Indwara zo mu mutwe, igituntu n’izindi.

Yakomeje avuga ko ariko bakomeza ubukangurambaga kuko iyo begerewe, ikibazo cy’ubuzima Yagize ati: “Hari akato n’ihezwa bikorerwa abafite ibibazo byo mu mutwe, umuntu ashobora kuba arwara umutwe ukomeye udakira, adasinzira bakamurangira ko azajya kwivuza i Ndera ngo bamucishe mu cyuma barebe niba nta bindi bibazo afite by’imyakura cyangwa ibijyanye n’ubundi buzima, ariko iyo ubwiye umuntu ko wivuza i Ndera usanga aguhaye akato”.

bwo mu mutwe ari uburwayi nk’ubundi ndetse ko muri iki kigo bafasha abafite ubu burwayi koroherwa.

Asaba Abanyarwanda muri rusange kudashyira mu kato abafite ibibazo byo mu mutwe n’agahinda gakabije.

Umukozi muri porogaramu ishinzwe kwita ku buzima bwo mu mutwe, ushinzwe kurwanya ikoreshwa ry’ibiyobyabwenge mu Kigo cy’Igihugu cy’Ubuzima Dr. Ndacyayisenga Dynamo, yahamije ko koko abarwayi bo mu mutwe bagihabwa akato.

Yagize ati: “Birababaje cyane […] umurwayi wo mu mutwe ni umuntu uyu munsi ushobora kugira uburwayi ariko ejo ashobora gukira. Akato rero karacyahari   sinabura kukubwira ko hari akato gahabwa umuntu ufite uburwayi bwo mu mutwe. Umuntu ashobora guhabwa akato n’abagize umuryango we, cyangwa nawe akiha akato ntamenye ko afite uburwayi ngo yivuze”.

Ubushakashatsi bwakozwe n’Ikigo cy’Igihugu Cy’Ubuzima (RBC) bwagaragaje ko umuntu umwe muri batanu aba afite ibibazo by’uburwayi bwo mu mutwe.

NYIRANEZA JUDITH

Umuhuzabikorwa w’Ikigo Aheza (Centre Aheza), Mulisa Aime Josiane 

NYIRANEZA JUDITH

  • Imvaho Nshya
  • Nzeri 29, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE