Rwamagana: Imiryango yasezeranye yaterwaga ipfunwe no kwitwa ingaragu

  • NTAWITONDA JEAN CLAUDE
  • Nzeri 26, 2022
  • Hashize imyaka 2
Image

Bamwe mu miryango yasezeranye ku Cyumweru tariki 25 Nzeri 2022, baratangaza ko baterwaga ipfunwe no kwitwa ingaragu mu gihe bagiye gusaba ibyangombwa by’uko ari ingaragu.

Babigarutseho ubwo hasozwaga icyumweru cyahariwe uburinganire n’ubwuzuzanye mu muryango mu Murenge wa Muyumbu mu Karere ka Rwamagana mu Ntara y’Iburasirazuba.

Hasezeranijwe imiryango 50 yo mu Murenge wa Muyumbu.

Mukashema Clementine utuye mu Kagari ka Bujyujyu yishimiye gusezerana imbere y’amategeko kuko ngo kubana n’umugabo batarasezeranye ari ikibazo.

Avuga ko hashize imyaka 10 abana n’umugabo we bitemewe n’amategeko bakaba bafitanye abana batatu. Yakomoje ku cyamubabaje mu kubana n’umugabo bitemewe n’amategeko.

Ati: “Hari byinshi bibaho ugasanga ubuze amahirwe kubera ko mutasezeranye cyangwa bakadutumizaho twese ku buryo umuntu umwe atabyigiramo.

Iyo mwasezeranye ugakenera dosiye runaka, hagenda umwe ariko iyo mutasezeranye mujyana mwese kugira ngo mubyemeze.

Ikindi kibabaza ni ukubana n’umugabo imyaka 10 ariko nkafatwa nk’ingaragu ukumva ntabwo bihuye. Ukitwa ingaragu kandi warashatse, ntabwo biba bisobanutse”.

Nyiranshimiyimana Yvone utuye mu Kagari ka Murehe mu Murenge wa Muyumbu yishimiye gusezerana n’uwo bashakanye byemwe n’amategeko.

Na we avuga ko yari amaze imyaka 10 abana n’umugabo batarasezeranye byemewe n’amategeko, yajya mu bandi bagore agaterwa ipfunwe no kubwirwa ko utarasezeranye umugabo yamuta igihe icyo ari cyo cyose.

Yagize ati: “Ubwo dusezeranye kubana byemewe n’amategeko ndumva ntuje mu mutima wanjye. Nabaga ndi kumwe n’abandi badamu bakambwira ko umugabo wanjye ashobora kunta kuko ntakindengera, ibyo bikantera ipfunwe”.

Ashishikariza ababana bitemewe n’amategeko gusezerana kuko ngo nibyo bituma babana mu rugo bumvikana.

Sibomana Emmanuel na we wasezeranye yashimye ubuyobozi bwabatekerejeho bagashishikarizwa kubana n’abagore babo byemewe n’amategeko.

Umutoni Jeanne, umuyobozi w’Akarere ka Rwamagana wungirije ushinzwe Imibereho myiza, avuga ko igishimishije ari uko imiryango yabanaga bitemewe n’amategeko yahisemo gusezerana.

Ati: “Ikintu gishimishije ni imiryango yasezeranye ikaba yiyemeje kureka amakimbirane, ikarera abana neza”.

Akangurira abasezeranye kugira umuryango ushoboye kandi utekanye.  Abatarasezerana abasaba kubana byemewe n’amategeko.

Mu cyumweru cyahariwe uburinganire n’ubwuzuzanye mu muryango, imiryango yabanaga itarasezeranye yarasezeranijwe, abana babyariye iwabo baraganirizwa ndetse n’abana bandikwa mu bitabo by’irangamimerere.

Umunyamabanga Nshingwabikorwa w’Umurenge wa Muyumbu, Bahati Bonny, yahamirije Imvaho Nshya ko nyuma y’igikorwa cyo gusezeranya imiryango yabanaga bitemewe n’amategeko, imiryango icyenda yaremewe amatungo maremare n’amagufi.

  • NTAWITONDA JEAN CLAUDE
  • Nzeri 26, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE