Rusizi: Uwahondaga amabuye yakubise umutwe ku ibuye ahita apfa

  • BAHUWIYONGERA SYLVESTRE
  • Werurwe 31, 2024
  • Hashize ibyumweru 4
Image

Bangineza Venestor w’imyaka 60, wo mu Mudugudu wa Nyabigoma, Akagari ka Murwa, Umurenge wa Bweyeye, Akarere ka Rusizi, yafashwe n’isereri arimo guhonda amabuye, akubita umutwe kuri rimwe muri yo ahita ashiramo umwuka.

Iyo mpanuka bikekwa ko ari igicuri yabaye ubwo yari kumwe na mukuru we bari muri ako kazi ko guhonda amabuye mu mugezi wa Koko uherereye mu Mudugudu wa Banana, Akagari ka Rasano muri Bweyeye.

Abo bagabo bombi basanzwe bakora ako kazi bakagurisha ayo batunganyije akifashishwa mu bwubatsi, ariko uyu munsi wabaye uwa nyuma kuri Bangineza kubera iyo mpanuka yabaye mu buryo butunguranye.

Mushiki we Barakamfitiye Esther, yabwiye Imvaho Nshya ko musaza we yari amaranye imyaka myinshi indwara y’igicuri yamufataga akagira isereri akikubita hasi hashira akanya agahembuka.

Yakomeje ahamya ko hari n’ubwo uyu mugabo yafatwaga n’isereri akicara akanya gato, imbaraga zagaruka akagenda cyangwa se agakomeza imirimo.

Yavuze kandi ko musaza we nta buvuzi yabonye bitewe n’uko nta kigo cy’ubuvuzi na kimwe kibegereye, aho Ikigo Nderabuzima kibari hafi kiri mu bilometero bitari munsi ya 25.

Ati: “Kubera ibibazo bikomeye byo kwivuza tugira mu Kagari ka Rasana aho kugera ku Kigo Nderabuzima cya Bweyeye ari urugendo rw’ibilometero 25, amasaha agera kuri 4 yose ku muntu urwaye kugira ngo ahagere, abenshi dufatwa n’uburwayi tukabugendana ntitubwivuze.”

Yakomeje agira ati: “Yagiye kuri Poste de Santé ya Rasano, bamuha ibinini abimaze ntiyakira avuga ko yumvaga bidahuye n’uburwayi bwe, abura imbaraga n’amafaranga bijya ku Kigo Nderabuzima cya Bweyeye kuko hari n’igihe umuntu agenda akarara mu nzira.”

Umunyamabanga Nshingwabikorwa w’Umurenge wa Bweyeye Ndamyimana Jean Daniel, yemeje amakuru y’uru rupfu, agira ati: “Ni byo, yari ari kumwe na mukuru we bahonda amabuye yo kubaka ku mugezi wa Koko, agira isereri akubita umutwe ku ibuye arapfa. Ariko abo mu muryango we batubwiye ko yarwaraga igicuri, atari ubwa mbere yari afashwe. Turihanganisha umuryango we ni impanuka nta kindi twabivugaho.”

Nyakwigendera asize abana 15 yabyaye ku bagore 4 banyuranye yashatse. Uretse uwa mbere wapfuye babyaranye abana 8, abandi 2 barimo uwo babyaranye umwana 1 n’uwo babyaranye abana 3 bivugwa ko bagiye bamuta bakigendera kubera ubwo burwayi bw’igicuri, uwo babanaga ubu bakaba bari bafitanye abana 3.

Ku baturage bagorwa no kubona serivisi z’ubuvuzi cyane cyane abo mu Tugari twa Rasano na Murwa mu Murenge wa Bweyeye, Umuyobozi Mukuru w’Ibitaro bya Gihundwe Mukayiranga Edith, avuga ko  gihangayikishije.

Yemeza ko kwivuza kw’abo baturage kukigoranye, ndetse bikaba binashoboka ko hari abagendana indwara bazizi cyangwa batazizi kubera ko batabona aho bazisuzumisha biboroheye.

Ati: “Ni ikibazo kiduhangayikishije twese kuko bigaragara rwose ko bariya baturage batabona ubuvuzi nk’uko babukeneye. Ku bufatanye n’akarere ka Rusizi na Minisiteri y’Ubuzima (MINISANTE) hakaba higwa uburyo hakubakwa Ikigo Nderabuzima  hariya i Rasano nubwo nta mwaka twavuga bizakorwa.”

Hagati aho, yemeza ko buri mezi atatu bohereza abaganga batatu bo kuvura abo baturage ku Ivuriro ry’Ibanze rya Rusano, agasaba abaturage ko igihe bumvise ko baje bajya babagana ku bwinshi bakabafasha.

Avuga ko uburwayi bw’igicuri ari indwara yo mu mutwe iterwa n’ibibazo by’utunyangingo ndangasano cyangwa ikibazo cyo gukomereka k’ubwonko guterwa n’ihungabana cyangwa stroke.

Nanone kandi hari indwara y’igicuri iterwa n’inzoka ya taenia yarenze umuntu ikagera mu bwonko.  

Hari abo gutakaza ubwenge cyangwa isereri bimara akanya n’abo bidatinda, igicuri kikaba gishobora gufata abantu bo mu byiciro byose kuva ku bana ukagera ku bakuze.

Impungenge zihari ni ko bamwe bitiranya Igicuri n’amarozi, bagatangira kwishyiramo abaturanyi bityo amakimbirane mu miryango akarushaho guhabwa intebe.

  • BAHUWIYONGERA SYLVESTRE
  • Werurwe 31, 2024
  • Hashize ibyumweru 4
TANGA IGITEKEREZO
Xavelin says:
Mata 1, 2024 at 10:12 am

Nihanganishije Umuryango Wanyakwigenera Babomeze Kwihanganga Imana Imwakire Mubayo.

Karamage Emmanuel says:
Mata 1, 2024 at 5:48 pm

Mubyukuri ubuvuzi mugace ka Rasano na Murwa biratugora cyane peee.Mudukoreye ubuvugizi Haboneke abaganga kugirango bajye batanga ubujyanama abantu bareke kujya bicwa nizindwara ziteye gutya Kandi bagakwiye kugirwa inama bakivuza hakiri kare.

Andika igitekerezo

AMATEGEKO AGENGA IYANDIKA RY'IGITEKEREZO CYAWE