Rusizi: Urubyiruko rurashimira Perezida Kagame umuhanda wa Kaburimbo Bugarama-CIMERWA

  • BAHUWIYONGERA SYLVESTRE
  • Ukuboza 30, 2023
  • Hashize amezi 5
Image

Abasore batwara amagare mu muhanda wa kaburimbo Bugarama-CIMERWA bavuga ko bafite ishimwe rikomeye cyane kuri Perezida Paul Kagame, kuko nyuma yo kuwubona ubuzima bwahindutse, byoroheje imikorere bakiteza imbere.

Ni umuhanda wa kilometero 11, abaturage b’Imirenge ituriye ikibaya cya Bugarama basabye Perezida Paul Kagame ubwo yabasuraga ku  wa 17 Mutarama 2013. Watangiye gukorwa mu 2016 hanyuma mu 2018 uruzura uba nyabagendwa.

Urwo rubyiruko rutangaza ko mbere yo kuwubona nta mirimo babonaga, ubu bakaba bayibona batunze imiryango, bamwe banateye intambwe yo gushinga ingo zikomeye.

Mahoro Moses w’imyaka 20, utuye mu Kagari ka Gakoni, Umurenge wa Muganza, avuga ko kaburimbo itarajyamo, wari umuhanda mubi cyane, ariko umaze gushyirwamo kaburimbo wabagejeje kuri byinshi, bikura mu bukene.

Ati: “Ntitwabona uburyo tuvuga cyangwa dushima umubyeyi wacu, Perezida Kagame, yadukuye mu bukene, ubwigunge bukabije no kubura imirimo ifatika, kuko mbere n’uwawujyagamo ntacyo yacyuraga uretse imvune gusa no kwangirika kw’igare rye.’’

Yongeyeho ati: “Ninjiza nibura amafaranga 4000 ku munsi kandi nkora buri munsi. Intego ni uko ngiye gushaka uruhushya rwo gutwara ibinyabiziga, ku buryo mu myaka 2 cyangwa 3 nzaba mfite moto yanjye bwite. Birashoboka cyane ko iyo tutagira uyu muhanda tuba turi abajura n’abanywi b’ibiyobyabwenge kubera kwiheba.’’

Niyokwizerwa Moise w’imyaka 26 wo mu Murenge wa Bugarama avuga ko mu basore barenga 100 batunzwe n’uyu muhanda, abenshi barangije amashuri abanza kandi ko nta kindi babona cyari kubaha akazi bose iyo batagira uyu muhanda.

Ati: “Imyaka 3 maze mu bunyonzi yampinduriye ubuzima bifatika. Natangiriye ku igare nakoraga nishyura, ribaye iryanjye ndarikoresha, ubu narikuyemo irindi, yombi nyagurishije sinabura amafaranga 150.000. Ndi gukusanya amafaranga ngo nubake inzu nziza kuko ngikodesha. Ndanashaka gutera intambwe irenze ubunyonzi kuko sinzabuhoramo. Iyo tutabona uyu muhanda,mba ndi inzererezi.

Babihuriraho na Asifiwe Pierre w’imyaka 27, uvuga ko umwaka n’igice gusa amaze abonye igare rye agashyira muri uyu muhanda ubukene agenda abutera ishoti.

 Ati: “Mfite umugore twakoze ubukwe byemewe n’amategeko. Ni iri gare ryanteje iyi ntambwe. Mfite ihene 3 ntaragiraga n’urukwavu, kandi maze umwaka n’igice gusa muri aka kazi. Ndi mu kimina bampa ngakora indi mishinga, mbikesheje uyu muhanda. Gushima Perezida Kagame tuzabihorana kuko aho yadukuye n’aho atugejeje kubera  uyu muhanda harafatika rwose”.

Bavuga ko bazarushaho kuwubyaza umusaruro ufatika bagura imitekerereze, bibumbira mu makoperative bikabafasha mu kudapfusha ubusa ayo mahirwe bahawe.

Umuyobozi w’Akarere ka Rusizi wungirije ushinzwe iterambere ry’ubukungu, Ndagijimana Louis Munyemanzi avuga ko atari abanyonzi bonyine wafashije.

Yagize ati: “Ishimwe ry’uru rubyiruko rirumvikana kuko mbere kano gace kabagamo urubyiruko rwinshi rwigunze, rutagira imirimo n’imitekerereze yagutse, ubu rukaba rukora, rwiteza imbere”.

Yakomeje agira ati: “Nk’uko politiki y’igihugu ari ukubumbira abantu mu makoperative, twarubumbiyemo, hari arenga 3. Turukurikiranira hafi kuko ziriya ni imbaraga zikomeye cyane z’igihugu, tukarutoza kwizigamira, haba muri EjoHeza, mu bimina no mu bigo by’imari, rukanakora ibirubyarira inyungu, kandi biragaragara ko hari aho ruva n’aho rugera mu iterambere”.

  • BAHUWIYONGERA SYLVESTRE
  • Ukuboza 30, 2023
  • Hashize amezi 5
TANGA IGITEKEREZO
Ndisabiye Raphael says:
Ukuboza 31, 2023 at 6:51 am

Yego ni byiza kuba iriya kaburimbo yarabonetse, gusa irabura amatara. Nibanawucanire bizarushaho kuba byiza, kuko hari abajura bambura abantu kubera umwijima uba uhari, cyane cyane ahitwa murubumba ugiye gushyika kumugezi wa cyagara ugana cimerwa.

Andika igitekerezo

AMATEGEKO AGENGA IYANDIKA RY'IGITEKEREZO CYAWE