Rusizi: Abafite ubumuga batewe inkeke n’ihenda ry’insimburangingo n’inyunganirangingo

  • BAHUWIYONGERA SYLVESTRE
  • Ukuboza 5, 2023
  • Hashize amezi 6
Image

Ikibazo cy’ihenda ry’insimburangingo n’inyunganirangingo  gikomeje kubera umutwaro uremereye abantu bafite ubumuga mu Karere ka Rusizi, cyane cyane abo mu bice by’icyaro batabona ubushobozi bwo kuzigondera ntizinishingirwe na mituweli.

Byagaragarijwe mu Murenge wa Muganza ku Cyumweru tariki 3 Ukuboza, ubwo ku rwego rw’Akarere, hizihirizwaga Umunsi Mpuzamahanga w’abantu bafite ubumuga, abantu bafite ubumuga bakaba basaba ubuvugizi ngo igiciro cy’ibyo bikoresho kigabanyuke.

Ngabonziza Eugène w’imyaka 63 utuye mu Kagari ka Gakoni, Umurenge wa Muganza, avuga ko ubumuga afite bwatewe n’uburwayi rw’akaguru yagize mu myaka 30 ishize, muri icyo gihe cyose akaba yicumba inkoni kuko atabonye ubushobozi bwo kwigurira inyunganirangingo.

Ati: “Sinigeze mbona ubuvuzi bufatika, nta n’insimburangingo nigeze, ni aka gakoni mumbonana kanteza ibibazo aho kumbera igisubizo, kuko hari nk’igihe ngakoza mu cyondo cyangwa mu mabuye kakaba kanyerera nkikubita hasi kandi urumva ingorane nahakura.”

Yarakomeje ati: “Kubera uburyo insimburangingo n’inyunganirangingo twumva ngo zihenda cyane, n’amatsinda turimo tukaba tutarazihawe, sinjya nanita kumenya aho zigurirwa n’ayo zigura kuko mbifata nk’ibitandeba kubera ubukene bukabije mbamo. Nzibonye nabasha kugira icyo nikorera, zigabanyuye ibiciro zikanajya kuri Mituweli, nk’abo mu byaro hari byinshi byatumarira.”

Ngabonziza Eugène avuga ko kwicumba inkoni bimugiraho ingaruka zitandukanye

Uwimana Odette wahawe inyunganirangingo yari amaze imyaka 18 akoresha iz’ibiti yakorewe n’abo baririmbana muri Korali. Avuga ko kuzihabwa byamushimishije cyane kubera ubundi bumuga iz’ibiti zamuteye.

Ati: “Mu kwaha hahindutse umukara kubera guhora mbyicumba ari ibiti bidakoze neza. Iyo ngira ubushobozi cyangwa inziza zihendutse, abo turirimbana ni zo bari kungurira. Ariko ubushobozi buke butera ubumuga bwacu kwiyongera kuko ibyakadufashije tutabibona, n’ibyo twishakiye bikadutera ubundi bumuga aho kudufasha.”

Umuhuzabikorwa w’Inama y’Igihugu y’abantu bafite ubumuga mu Karere ka Rusizi Hagenimana Sylvère, avuga ko iki ari ikibazo gikomeye cyane bafite, cyane cyane ko abenshi  nta bushobozi bafite bwo kuzigurira.

Ati: “Ni ikibazo gikomeye cyane dufite tunakomeza kugaragaza, tunasaba inzego zibishinzwe kudufasha kureba uko cyakemuka cyane cyane ko inyinshi zitanishingirwa na Mituweli,  ntizinaboneke muri aka Karere. Iziboneka mu Bitaro bya Gihundwe zibona umugabo zigasiba undi uretse ko dufite amahirwe ko Akarere kadufasha kubona abafatanyabikorwa batugoboka.”

Avuga ko nubwo abo bafatanyabikorwa bahari, bigoye kuzibonera abazikeneye bose kubera n’uko guhenda kwazo, akizera ko ubwo n’inzego zo hejuru zizi ko ari ikibazo gikomeye cyane, zizagira icyo zigikoraho.

Hagenimana ashimira cyane Leta yabahaye agaciro, bakagira umunsi bahuriraho n’abayobozi bakabagaragariza ibibazo byabo, bakaba bumvwa mu nzego zose.

Yongeraho ko nubwo bitabuza ko hari bamwe mu bantu bafite ubumuga bacyitinya bitewe n’ubumuga bafite, hari n’abandi babukorana bakiteza imbere bifatika mu Karere ka Rusizi.

Umuyobozi wungirije w’Akarere ka Rusizi ushinzwe imibereho myiza y’abaturage Dukuzumuremyi Anne-Marie, avuga ko iki kibazo kizwi, kandi kiremereye nk’uko babivuga, ariko igihe kigishakirwa igisubizo kirambye n’inzego nkuru z’Igihugu bakora ibishoboka byose bagafasha uko bashoboye abafite ibi bibazo.

Ati: “Ni ikibazo kizwi n’uburemere bwacyo, ariko ku bufatanye n’abafatanyabikorwa bacu tugerageza gukora ibyo dushoboye kuko nk’uyu munsi hari abo twazihaye, turanateganya gutanga amagare 60 mu Mirenge hirya no hino, gusa biba bihenze cyane ariko nibikemuka bizoroshya byinshi.”

Akarere ka Rusizi kabarurwamo abantu bafite ubumuga 14 773 barimo abagore 7 979 n’abagabo 6 794. Uretse guhabwa inyunganirangingo n’insimburangingo kuri bamwe muri bo, abagera kuri 50 banorojwe amatungo magufi ku Cyumweru.

Musenyeri Edouard Sinayobye, Umushumba wa Diyosezi Gatolika ya Cyangugu, yasabye buri wese kumva no kudahutaza umuntu ufite ubumuga, kuko buri wese afite uburenganzira busesuye bwo kubaho neza kubera ko aba yararemwe mu ishusho y’Imana.

  • BAHUWIYONGERA SYLVESTRE
  • Ukuboza 5, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE