Rulindo: Bagorwa no kwambuka Akarere bajya kugura inyama

  • NGABOYABAHIZI PROTAIS
  • Ugushyingo 22, 2023
  • Hashize amezi 6
Image

Bamwe mu baturage bo mu Murenge wa Base, Akarere ka Rulindo, bavuga ko babangamiwe n’ingendo ndende bakora bajya kugura inyama mu Turere twa Gakenke na Burera kubera Ibagiro rya Base rimaze igihe rifunze bitewe nuko ryubatswe mu gishanga.

Iri bagiro ryubatse mu Murenge wa Base, abaturage bavuga ko rimaze amezi agera kuri atanu rifunze imiryango, bakaba bagorwa no kubona inyama ari na byo bituma bayoboka kuzigura mu buryo bwa magendu cyangwa bakambuka imbibi z’Akarere bajya kuzihiga ahandi hari amabagiro yemewe.

Zikamabahari Aimable, umwe mu bafite inzu yacururizagamo inyama akizikura ku ibagiro rya Base, avuga ko kugeza ubu ubushabitsi bwe bwahagaze kuko nta nyama akibona akaba afite impunge ko n’abakiliya be bazamwibagirwa.

Yagize ati: “Ubu kuva bafunga ibagiro rya Base riri muri santeri y’ubucuruzi ya Base, inyama zabaye ikibazo. Tekereza gukora urugendo werekeza muri Gakenke n’i Burera ugiye gushaka inyama! Mu maresitora inyama zarahenze baguha burushete ukagira ngo ni udupesu, rwose ubu inyama hano yabaye ikibazo gikomeye kandi ntituzi igihe tuzabonera ibagiro nk’uko byari bisanzwe”.

Kuba hari ikibazo cy’ibagiro ritagikora kandi, bamwe mu baturage bo mu Karere ka Rulindo bavuga ko barya inyama zidapimwe kubera ko hari bamwe mu baturage basigaye bagurisha inyama z’amatungo yipfushije, abandi bakaba babagira mu bisambu.

Zirikana Robert yagize ati: “Kuri ubu ba Veterineri nta kazi bakigira kajyanye no gupima inyama kuko na bo basigaye bazirya mu maresitora zihiye ariko batazi inkomoko yazo. Ejobundi duherutse kurya inka yipfushije tutabizi nyuma tuza kubwirwa ko hari inka yapfuye, umwe mu bacuruza resirora akaza kuyigura, akayiteka tukayiryamo boyiro. Rwose ubuyobozi nibudohore tubone aho tujya tugurira inyama tudakubise urugendo”.

Guverineri w’Intara y’Amajyaruguru Mugabowagahunde Maurice, yavuze ko iri bagiro rya Base ryafunzwe kubera ko ryari ryubatse mu gishanga rikaba ryarangizaga ibidukikije, kandi  ritujuje ibyangombwa bikwiye ibagiro.

Yagize ati: “Ibagiro ryo kuri Base urebye ntiribungabunga ibidukikije kuko ababishinzwe na bo bararisuye basanga ribangamiye ibidukikije kubera ko riri mu gishanga. Ikindi basanze iri bagiro ritujuje ibisabwa kugira ngo ribe ryakomeza guha Abanyarwanda inyama zujuje ubuziranenge nk’ibikoresho bikwiye ibagiro”.

Guverineri Mugabowagahunde akomeza asaba abaturage ba Rulindo begereye igice cya Gakenke kugana ibagiro rya Gakenke kuko ryo ryujuje ibyangombwa, kandi ritanga inyama zitabatera indwara.

Yakomoje no kuri bariya bayobotse inzira yo kubagira ku makoma, kimwe n’abarya amatungo yipfushije, ahamya ko uzabifatirwamo azahanwa bikomeye.   

Yagize ati: “Ndasaba Abanyarulindo kwirinda inyama zipfushije, birinde kandi kugarura ububazi bwa gakondo bwo kubagira ku makoma, kuko ubu igihe tugezemo ntibikwiye. Ahubwo abashoramari bo muri Rulindo bishyire hamwe bubake ibagiro rya kijyambere.”

Mu gihe hari gahunda yo kurya itungo rimaze iminsi ibiri ribazwe, kuri ubu kuyishyira mu bikorwa byagorana cyane ko kuri Base nta bugenzuzi bw’inyama buharangwa.

  • NGABOYABAHIZI PROTAIS
  • Ugushyingo 22, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE