Rulindo: Bajujubijwe no kumara amezi ane bavoma amazi y’ibirohwa

  • NGABOYABAHIZI PROTAIS
  • Mutarama 31, 2024
  • Hashize amezi 4
Image

Abaturage bo mu Mirenge ya Murambi mu Karere ka Rulindo, bavuga ko bamaze amezi 4 barabuze amazi meza kubera ko ngo isoko ya Mutagata bakuragaho amazi meza imashini iyazamura yapfuye kuva mu Ukwakira 2023 kugeza ubu; bikabagiraho ingaruka zinyuranye.

Mukabasinga Iluminata wo mu Murenge wa Murambi, Akagari ka Rutongo, avuga ko kuba batakibona amazi meza birimo kubagiraho ingaruka zirimo kuba barwara inzoka, kimwe no kuba bambara imyenda itameshe.

Yagize ati: “Kuri ubu isuku iratugora cyane kubera ko nta mazi meza akirangwa muri uyu Murenge wacu wa Murambi kimwe na Masoro duhana imbibi, ntitugikaraba pe kuko iyo twatumye abana kujya kutuzanira ibiziba mu miferege tuvanaho ayo gutekesha urumva gukaraba rero aba ari ikibazo twifuza ko bakongera bagakora uriya muyoboro”.

Uyu mubyeyi akomeza avuga ko ngo kuba abana babo babyukira kujya gushaka amazi bakerwa kujya ku ishuri yewe ngo hari n’ubwo bagera ku ishuri bagasabewa kujya gushakira amazi ikigo

Yagize ati: “Kuba nta mazi meza akiboneka mu Murenge wacu ntabwo bigira ingaruka ku miryango yacu gusa kuko abana na bo bashobora gusiba ishuri kubera nyine kujya gushakisha amazi ku masoko no mu miferege, ikindi ni uko hari ubwo n’ibigo bishobora kubatuma kuvoma, mbese ubu twaragowe, tekereza noneho ko hari n’ibigo by’amashuri bisigaye bituma abana amazi yo kunywa kandi kuyabona ntibitworoheye agacupa ka Nil cyangwa Inyange ntikari munsi y’amafaranga 400.”

Nzamurambaho Fidele we avuga ko kuba nta mazi akiboneka ubu indwara zibafata buri munsi, kandi mu buryo bunyuranye.

Ababyeyi bajyana n’abana gushaka amazi mu tubande tw’imisozi ya Murambi wa Rulindo

Yagize ati: “Hari bamwe turara twishimagura kubera kutoga, inda zacu zihora zagugaye kubera inzoka, ikindi ni uko iyo ugize amahirwe abafite ibigega byabo bakakugurisha ijerekani kuri ubu ni amafaranga 200, nayo kandi arimo kudutera inzoka  n’inkorora, gukaraba bwo ubu twihaye gahunda yo gukaraba nibura umubiri wose kabiri mu cyumweru, ubundi twihanagura mu maso tukagenda”.

Nzamurambaho yongeraho ko ngo kuba nta mazi bagira meza ndetse n’amabi hafi yabo bituma hari bamwe batinya kujya aho abandi bari.

Yagize ati: “None wagera mu bandi utameshe, utakarabye, ukajya kubanukira? Ubu kuba nta mazi meza bisa n’ibyahagaritse imigenderanire ni ukuri, ubu ni bwo mbonye imbaraga z’amazi meza mu buzima, tekereza kumara amezi 4 nta mazi meza, twifuza ko bakongera bagasana imiyoboro ndetse n’imashini zizamura amazi”.

Kuba ikibazo cy’amazi ari ingorabahizi muri kariya gace ka Murambi ndetse bikagira ingaruka ku banyeshuri bishimangirwa n’Umuyobozi w’Urwunge rw’amashuri rwa Murambi   Baribuze Jean Baptiste.

Yagize ati: “Twebwe kuri ubu dufite ibigega 11 dufatiramo amazi y’imvura ntabwo ari meza yo kunyobwa, ahubwo turayatekesha, tukayakoresha isuku, kuba nta mazi meza akiboneka muri uyu Murenge wacu rero bigira ingaruka nyinshi ku bantu bose, ku banyeshuri bacu twasabye ababyeyi kujya babapfunyikira amazi kugira ngo bajye bazana amazi meza birinda indwara zikomoka ku mwanda”.

Uyu muyobozi akomeza avuga ko kuba nta mazi ya robine bafite ari  ikibazo gikomeye akaba yifuza ko bakongera guhabwa amazi meza  kuko gukoresha amazi mabi atari byiza ku buzima,  kandi hashakwa uburyo burambye ziriya mashini kimwe n’imiyoboro bigatunganywa.

Umuyobozi w’Akarere ka Rulindo Mukanyirigira Judith, nawe ashimangira ko iki kibazo kiri mu Mirenge ya Murambi na Masoro kizwi, kandi  kirimo gushakirwa umuti ko nibura mu gihe gito amazi araba yongeye kuboneka ari meza.

Yagize ati: “Imashini zazamuraga amazi ziyakwirakwiza zarapfuye, hashize amezi agera kuri ane koko, ariko kuri ubu turimo gutanga amasoko ngo ba rwiyemezamirimo baze kubaka iriya miyoboro ya Musagata n’indi ifite ibibazo kuko ingengo y’imari irahari, mu gihe cy’amezi abiri amazi araba yabonetse abaturage bakomeze kwihangana”.

Uyu muyobozi akomeza asaba abaturage kujya banywa amazi atetse kandi bakagerageza kugira isuku ku mazi make bagenda babona, abumva bagenda bagerwaho n’ingaruka z’amazi mabi na bo basabwa kujya kwa Muganga.

Mukabasinga Iluminata avuga ko kutagira amazi bibagiraho ingaruka
  • NGABOYABAHIZI PROTAIS
  • Mutarama 31, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE