Ruhango yungutse umuhanda wa kaburimbo w’ubukerarugendo uzatwara miliyari 3 Frw

  • AKIMANA JEAN DE DIEU
  • Ukuboza 31, 2023
  • Hashize amezi 2
Image

Akarere ka Ruhango katangiye kubaka umuhanda wa kaburimbo wa w’ibilometero 4.5 wahariwe ubukerarugendo bushingiye ku iyobokamana, kuko ugarukira ‘Kwa Yezu Nyirimpuhwe’ ahamenyekanye cyane ko hakirizwa abarwayi mu isengesho riba ku cyumweru cya mbere cya buri kwezi.

Uyu muhanda wa Bunyogombe uturuka ahazwi nk’i Kibingo ugaca ahitwa i Karambo ukagera ku Kagari ka Buhoro, biteganywa ko uzuzura utwaye miliyari zisaga 3 z’amafaranga y’u Rwanda.

Bamwe mu baturiye uwo muhanda bahawe, bishimiye ko uzabagirira umumaro kuko ugiye gutuma igice batuyemo kirushaho kwihuta mu iterambere.

Murenzi Etienne, umwe muri abo baturage, avuga ko uretse kuba hagiye kwihuta mu iterambere, bagiye no kubona abantu benshi baza kuhatura ku buryo n’ubutaka bwabo buhita bwongera agaciro.

Yagize ati: “Tugiye guhabwa umuhanda wa Kaburimbo utuma iki gice dutuyemo kigiye guturwa; hagiye kugira agaciro kandi natwe tuzongera ibikorwa bituzamura tugatera imbere. Turashimira Perezida wacu Paul Kagame ukomeje kuduha ibi bikorwa remezo”.

Mugenzi we witwa Mugeni Hodali, na we avuga ko bashimishijwe n’uko bahawe umuhanda uzabafasha kugera ku iterambere, bakaba barijejwe ko uzazana n’amazi meza n’amashanyarazi bigezwa ku bo bitarageraho.

Yagize ati: “Turishimimye cyane kuko tugiye kubakirwa umuhanda uzatugeza ku iterambere kandi tugiye kwegerezwa ibikorwa remezo birimo amazi n’amashanyarazi ku batari babifite. Mbese natwe tugiye kugira uruhare rusesuye ku iterambere ryacu n’abacu.”

Muakamwiza Jeannette we avuga ko uyu muhanda bamaze igihe kitari kinini bawijejwe, bityo imvugo y’ubuyobozi ikaba ibaye ingiro bidatinze.

Imirimo yo kubaka uyu muhanda irarimbanyije

Yagize ati: “Hashize igihe gito batubwiye ko muri gahunda z’Akarere bazaduha umuhanda uzaca i Buhoro ugahingukira i Kibingo, none imvugo y’ubuyobozi bwacu yabaye ngiro kuko ntabwo bitinze. Ubusanzwe batubwiraga ibintu tugategereza iminsi n’iminsi.”

Ubuyobozi bw’Akarere ka Ruhango bwemeza ko imirimo yo kubaka uyu muhanda igeze kure, ukaba witezweho uruhare rukomeye mu kwagura Umujyi wa Ruhango no kugabanya urujya n’uruza mu muhanda mugari wa Muhanga-Huye.

Habarurema Valens, Umuyobozi w’Akarere ka Ruhango, avuga ko imirimo yo kubaka uwo muhanda igeze ku kigero cya 10%, ukaba uzanyura mu Tugari twa Munini na Buhoro.

Yashimangiye ko uzafasha by’umwihariko abaza gusengera kwa ‘Yezu Nyirimpuhwe’, ari na yo mpamvu wiswe ‘umuhanda w’ubukerarugendo bushingiye ku Iyobokamana.’

Yagize ati: “Ni byo koko twatangiye kubaka umuhanda uva i Kibingo ukagera ki Kagari ka Buhoro ndetse imirimo igeze ku 10%, ukazajya wifashishwa n’abaza gusengera kwa Yezu Nyirimpuhwe mu bukerarugendo bushingiye ku Iyobokamana.”

Yemeje ko muri uwo muhanda hari abazajya bahakorera urugendo rw’amaguru berekeza kuri iyo site y’ubukerarugendo bushingiye ku Iyobokamana, ariko ngo gushyirwamo kaburimbo bizarushaho korohereza n’abagenda n’imodoka, bikagabanya umuvundo mu muhanda Kigali-Huye.

  • AKIMANA JEAN DE DIEU
  • Ukuboza 31, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE