Ruhango: Bakora umunyu wongerera inka umukamo n’ubudahangarwa 

  • NTAWITONDA JEAN CLAUDE
  • Kamena 30, 2023
  • Hashize amezi 11
Image

Abagize Itsinda ‘Abaharanira iterambere mu nka zitanga umukamo’ ribarizwa mu Karere ka Ruhango bishimira ko bakomeje gutezwa imbere no gukora umunyu inka zirigata zikubaka ubudahangarwa ndetse bikongera umukamo.

Ni igikorwa cy’iterambere giterwa inkunga  n’Umushinga RDDP uterwa inkunga n’Ikigega Mpuzamahanga gishinzwe iterambere ry’ubuhinzi n’ubworozi (IFAD). 

Uwo mushinga wagizwemo uruhare na Leta y’u Rwanda binyuze muri Minisiteri y’Ubuhinzi n’Ubworozi ugashyirwa mu bikorwa n’Ikigo cy’Igihugu gishinzwe iterambere ry’Ubuhinzi n’Ubworozi (RAB). 

Bamwe mu borozi bo mu Murenge wa Kinihira, mu Karere ka Ruhango bishimira kuba barahawe ubumenyi bwo gukora umunyu w’inka n’Umushinga RDDP, ukaba utuma inka ziwushotse cyangwa ziwurigase zigira ubudahangarwa kandi umukamo wazo ukiyongera.

Umunyamuryango w’itsinda ‘Abaharanira iterambere mu nka zitanga umukamo”, Muteteli Violette yagize ati: “Ubumenyi tubukesha umushinga RDDP waduhuguye, watujyanye mu ngendo shuri, turabyiga natwe turaza turabikora hano iwacu. 

Twatangiye gukora umunyu duha inka zikagira ubudahangarwa mu mubiri ndetse uwo mushinga waduhaye n’ubwatsi bidufasha kongera umukamo. Uyu munyu inka yawurigase irarisha cyane kandi ikanywa amazi n’umukamo ukiyongera”.

Yongeyeho ko mu kwezi bakora imyunyu 100 ifite agaciro k’amafaranga y’u Rwanda 400 000.

Mukunduhirwe Aloysie utuye mu Mudugudu wa Ntinyishi, Akagari ka Buhoro, Umurenge wa Ruhango mu Karere ka Ruhango, avuga ko umunyu watumye inka ye izamura umukamo.

Yagize ati: “Uyu munyu wayibereye mwiza kandi yongereye umukamo. Mbona umukamo utubutse, kandi iri tsinda riradufasha tukizigama, tukagurizanya amafaranga ku buryo tubasha kubona ubwisungane mu kwivuza tutavunitse kuri za nguzanyo zacu tugurizanya ku yo tuba twizigamye iyo tuje gukora imyunyu”.

Umuyobozi w’Akarere ka Ruhango Wungirije Ushinzwe Iterambere ry’Ubukungu, Rusilibana Jean Marie Vianney, yatangarije Imvaho Nshya ko nk’Akarere gafite inshingano zo gushyigikira ibikorwa by’abaturage.

Ati: “Akarere kabereyeho gushyigikira ibikorwa byiza by’abaturage cyane cyane ibyo baba baragejejweho. Turimo kuganira na Minisiteri y’Ubuhinzi n’Ubworozi n’Ikigo RAB yuko tugize amahirwe tukabona Umushinga RDDP II yafatira ku bikorwa RDDP I yagezeho, hakazamo kuba bakwigisha aborozi gutunganya imyunyu ku buryo bwo hejuru bugezweho atari ku rugero nk’urwo babikoraho, byaba ngombwa hakubakwa n’aho bayitunganyiriza.

Visi Meya Rusilibana Jean Marie Vianney ahamya ko Akarere kazaba hafi abaturage mu kubafasha kunoza ibyo bakora

Hari gahunda ya nkunganire tuba dushaka ko abaturage bagira aho bayitunganyiriza, bakoresha n’ibikoresho byiza bigezweho byabugenewe hafi  y’inzuri  cyangwa hafi y’ingo zabo  ku buryo bashobora kubona imyunyu hafi”.

Aborozi bagaragaje ikibazo cyo kuba batarabasha gukora umunyu mwinshi, kubera ubushobozi, Akarere kakaba kavuga ko kazakomeza kureba uko kafatanya n’abaturage mu gukemura icyo kibazo.

Visi Meya Rusilibana ati: “Turimo turareba n’andi mahirwe atandukanye ahari, ariko igihe ataraza ntituzaceceka, tuzagerageza guhuza abaturage n’andi mahirwe ahari atandukanye mu buryo dushobora gufatanya kugira ngo hagurwe ibikorwa, ariko bikazagenda byaguka uko ubworozi bwaguka.

Muzi ko harimo kubakwa uruganda rw’amata ku rwego w’igihugu mu Ntara y’Iburasirazuba kandi ruzakenera amata ava mu gihugu hose.

Natwe rero dufite gahunda zitandukanye zo kongera umukamo biciye muri izo gahunda zitandukanye wo kuba inka zabona ibikenewe byose ngo umukamo wiyongere”.

Itsinda ‘Abaharanira iterambere mu nka zitanga umukamo’ ryatangiye mu 2018, ritangira gukora umunyu muri Kamena 2022, rigizwe n’abanyamuryango 40, abagore 2 n’abagabo 15.

Mukunduhirwe Aloysie ahamya ko umunyu bakora watumye Inka zongera umukamo
Abanyamuryango barimo gushaka ibyangombwa ngo babone ubuzima gatozi
  • NTAWITONDA JEAN CLAUDE
  • Kamena 30, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE