Rubavu: Abaturage bemereye RIB ko hari ibyaha bakora batabizi

  • Imvaho Nshya
  • Nyakanga 31, 2023
  • Hashize amezi 10
Image

Urwego rw’Igihugu rw’Ubugenzacyaha (RIB) rwashishikarije abaturage batuye mu Karere ka Rubavu kurwanya ihohoterwa iryo ari ryo ryose n’ibyaha byibasira ibidukikije bikunze kugaragara muri aka Karere.

Ubuyobozi bwo mu Karere ka Rubavu, bwemeza ko bimwe mu byaha bikunze kugaragara cyane muri Nyamyumba hamwe mu hakorewe ubukangurambaga harimo ihohoterwa rishingiye ku gitsina no ku mutungo n’ubwo bakomeje gukora byinshi ngo ricike burundu kuko rimunga iterambere ry’umuryango.

Hakiyongeraho ibyaha byibasira ibidukikije birimo kuvogera inkengero z’ ikiyaga cya Kivu bahinga muri metero 50 uvuye ku kiyaga ndetse n’abandi bakomeje kugaragara mu bucukuzi bw’amabuye y’agaciro.

Ubwo Urwego rw’Igihugu rw’Ubugenzacyaha (RIB) rwakoraga ubu bukangurambaga  mu karere ka Rubavu, abaturage bamenyeshejwe ko bakwiye kubungabunga ibidukikije, kugira ngo bakomeze kugira imibereho myiza n’ubuzima bwiza birinda ibibazo bishobora gukurikira ibyaha bibangamira ibidukikije.

Mahoro Bazir umwe mu bakozi ba RIB ishami rishinzwe kugenza ibyaba byibasira ibidukikije, mu kiganiro yatanze yasobanuriye abaturage bimwe mu byaha bikorwa, ingaruka bigira n’uburyo bihanwa mu mategeko abasaba kwitwararika no kigaragaza uwo ari we wese wagaragara muri ibi byaha kugira ngo ahanwe.

Agira ati: “Ibyaha byibasira ibidukikije ni byinshi hari ababikora batabizi ariko hari ababikora nkana kandi ingaruka zigera kuri buri wese yaba umuturage n’igihugu muri rusange, turi mu bice bikunda kwibasirwa n’inkangu, ibiza usanga biterwa ahanini na bya bikorwa byakozwe n’abacukuzi b’ibirombe, amabuye y’agaciro.

Hari n’aho abaturage bagera bakabona ni icyaha kiri gukorwa tukabyirengagiza nkana ndabasaba kujya mukumira icyaha, kuko ejo wasanga ibyo bikorwa bije bikagutwarira ibyawe, ubuzima n’ibindi tubimenye tunabikumire.”

Murindangabo Eric, Umunyamabanga Nshingwabikorwa w’Umurenge wa Nyamyumba mu Karere ka Rubavu, yemeza ko mu Murenge ayoboye hakigaragara ibyaha byibasira ibidukikije ariko bafatanyije n’abaturage bakomeje kubikumira.

Agira ati: “Inaha ibyaha bikunze kugaragara usanga ari ibyo mu bucukuzi aho umuturage abona amabuye y’agaciro mu murima we agatangira gucukura nta ruhushya, nta nyigo yakozwe usanga ari icyaha kuko ababikora hari ibyo basabwa hakarebwa niba bitangiza ibidukikije rero iyo tubafashe barahanwa.”

Murindangabo avuga ko abaturage bagirwa inama yo kugana ababimazemo agihe bafite ibyangombwa bagakorana, ikindi cyaha gikunze kugaragara muri aka gace harimo kuba bamwe mu baturage bavogera metero y’ikiyaga nubwo ngo bigenda bicika agasaba buri wese gusenyera umugozi umwe.

Nyiragihurwa Esperance, umwe mu baturage batuye mu Murenge wa Nyamyumba Akarere ka Rubavu, ashima RIB yaje kubibutsa ibyaha bibangamira ibidukikije kuko ngo usanga bimwe babikora batabizi.

Agira ati: “Usanga hari ibyaha dukora tutabizi bikaba byatugiraho ingaruka tujya kubona tugasanga ubutaka bwacu bwamanutse kubera inkanga ntitumenye ko bishoboka ko hari abakoze ibyaha byibasira ibidukikije rimwe na rimwe turashima RIB iba yaje kudukebura kuko biradufasha cyane, natwe tubasezeranya kubirwanya no gutanga amakuru.”

Ubukangurambaga bwa RIB burakomeje mu bice bitandukanye by’Igihugu ku nsangamatsiko igira iti:”Uruhare rwa buri wese mu gukumira ibyaha bihungabanya ibidukikije n’ibindi byaha by’inzaduka”.

Muri ubu bukangurambaga Abaturage bakaba bahabwa serivisi zitandukanye basanzwe bahabwa iyo bagannye Sitasiyo za RIB ibibazo byabo bigahabwa umurongo.

  • Imvaho Nshya
  • Nyakanga 31, 2023
  • Hashize amezi 10
TANGA IGITEKEREZO
Sylvestre says:
Nyakanga 31, 2023 at 7:12 am

Ni byiza cyane Imvaho yacu tubashimira amakuru mutugezaho yiwacu
Ariko twe abaturage Bo mu kagari ka Nyaruteme mu murenge wa kanzenze natwe turasaba ko ubuyobozi Ku rwego rwa karere kacu rubavu barushaho kutwegera kuko umuyobozi twahawe Ku kagari ( executive secretary) cg gitifu witwa Gacamena Jean Nepo. Rwose atuyobora mu buryo butajyanye nicyerekezo: Ntiyaguha service NTA kantu umuturage atanze
Urugero: abatishoboye bahabwa amabati yo gusakara abashyira kuri list batanze hagati ya 20,000frw na 30000fr.
Gahunda ya girinka umuturage aziturirwa aruko yishyuye gitifu 15.000fr cg 20000fr.
Mu mudugudu wa kabere muri muri Ako kagari ni yo nzira ya fraude Kandi byose ABA abizi . Inama y’inteko ABA atuka abaturage ntajya avuga nezza na rimwe. Turasaba ubuyobozi bwacu kumwegera rwose agahindura imiyoborere Kuko nizo ruswa ahabwa we zinyuzwa Ku ba komisiyoneri yishyiriyeho abaturage barabazi.
Abayobozi bazagenzure badukorere ubuvugizi rwose Murakoze

Andika igitekerezo

AMATEGEKO AGENGA IYANDIKA RY'IGITEKEREZO CYAWE