Rubavu: Afungiwe magendu ya Caguwa na ruswa y’amadolari 140

  • Imvaho Nshya
  • Kamena 29, 2023
  • Hashize amezi 11
Image

Polisi y’u Rwanda, Ishami rishinzwe kurwanya magendu n’ibindi byaha (ASOC), yataye muri yombi umugabo w’imyaka 31, wageragezaga gutanga ruswa ingana n’amadolari y’Amerika 140,  nyuma yo gufatanwa amabalo 15 y’imyenda ya Caguwa agira ngo ayisubizwe.

Yafatiwe mu Mudugudu wa Giraneza, Akagari ka Bugoyi mu Murenge wa Gisenyi mu Karere ka Rubavu, ahagana saa kumi n’ebyiri za mu gitondo cyo ku wa Kabiri taliki 27 Kamena.

Umuvugizi wa Polisi mu Ntara y’Iburengerazuba, Chief Inspector of Police (CIP) Mucyo Rukundo, yavuze ko gufatwa kwe kwaturutse ku makuru yatanzwe n’abaturage. 

Yagize ati: “Abapolisi bo mu Ishami rya Polisi rishinzwe kurwanya magendu, bahawe amakuru n’abaturage ko mu rugo rw’uwo mugabo hari magendu y’imyenda igiye gupakirwa imodoka, ni ko guhita bajyayo mu masaha ya saa kumi n’ebyiri za mu gitondo bahasanga amabalo 15, abonye ko yafashwe yikoza mu nzu asohokana ruswa y’amadolari y’Amerika 140 yahise afatanwa agerageza kuyabahereza.”

CIP Mucyo akomeza avuga ko ubusanzwe uyu mugabo atuye muri ako Kagari ka Bugoyi, aho asanzwe akorera ubuvuzi bwa gakondo. 

Yiyemerera ko iyo myenda yavanywe muri Repubulika Iharanira Demokarasi ya Congo (RDC), akaba yari agiye kuyipakiza imodoka ikajyanwa mu Mujyi wa Kigali aho yari bucururizwe mu isoko rya Kimisagara.

CIP Rukundo yashimiye abatanze amakuru yatumye iyi myenda ya magendu ifatwa aboneraho kugira inama abakora ubucuruzi bwa magendu ko bakwiye kubireka kuko nta nyungu babukuramo.

Yagize ati: “Duhora tugira abantu inama yo kureka magendu bagakora ubucuruzi bwemewe n’amategeko, bakazirikana ko gutanga umusoro ku bicuruzwa baranguye ari ukwiyubakira Igihugu kandi ko nabo inyungu zibagarukaho kuko iyo misoro akenshi ikoreshwa mu kubaka ibikorwaremezo birimo n’ayo masoko baba bacururizamo.”

Yaburiye abatanga ruswa y’uko atari yo nzira ishobora gutuma barekurwa, ahubwo ko baba barushaho kwishyira mu kaga gakomeye kuko ruswa ari icyaha kitihanganirwa.

Hamwe n’ibyo yafatanywe yashyikirijwe Urwego rw’Igihugu rw’Ubugenzacyaha (RIB) kuri Sitasiyo ya Gisenyi kugira ngo hakomeze iperereza ku byaha akurikiranyweho.

Ingingo ya 87 y’Itegeko No. 026/2019 ryo ku wa 18/09/2019 rigena uburyo bw’isoresha, iteganya ko umuntu wese ugambiriye kutishyura umusoro ukoze igikorwa cyo guhisha ibicuruzwa bisoreshwa cyangwa imitungo ifitanye isano n’ubucuruzi; aba akoze icyaha cyo kunyereza umusoro.

Iyo abihamijwe n’urukiko, ahanishwa igifungo kitari munsi y’imyaka ibiri (2) ariko kitarengeje imyaka itanu (5).

Itegeko No 54/2018 ryo ku wa 13/08/2018 rirwanya ruswa, ingingo yaryo ya 4 ivuga ko umuntu wese uhamijwe n’urukiko gusaba, gutanga cyangwa kwakira, mu buryo ubwo ari bwo bwose, indonke iyo ari yo yose, ahanishwa igifungo kirenze imyaka 5 ariko kitarenze imyaka 7 n’ihazabu y’amafaranga y’u Rwanda yikubye inshuro kuva kuri 3 kugeza kuri 5 z’agaciro k’indonke yatse cyangwa yakiriye.

  • Imvaho Nshya
  • Kamena 29, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE