REG W BBC yatsinze umukino wa kabiri mu Mikino Nyafurika

  • Imvaho Nshya
  • Ukwakira 31, 2023
  • Hashize amezi 7
Image

REG Women BBC yatsinze Nile Legends yo muri Sudani y’Epfo amanota 95-73, ibona intsinzi ya kabiri mu mikino ya ‘FIBA Africa Women Basketball League 2023’

Uyu mukino wabaye ku mugoroba wo ku wa Mbere tariki 30 Ukwakira 2023 muri Lycée de Kigali.

REG WBBC yatangiye neza agace ka mbere ku mukino neza itsinda amanota menshi, mu gihe Nile Legends yatsinze inota rya mbere indi ifite amanota 11.

Nyota Mireille na Kalanga Betty ni bo batsindaga amanota menshi. Agace ka mbere karangiye REG W BBC iyoboye umukino n’amanota 27 kuri 15 ya Nile Legends.

Mu gace ka kabiri REG W BBC yashyizemo Chelsea Jennings nawe atangira gukorera bagenzi be mu ngata.

Ubwo haburaga iminota ine ngo aka gace karangire, REG WBBC yazamuye ikinyuranyo kigera mu manota 20. Nile Legends yageragezaga gutsinda ariko gutangira nabi umukino bigatuma icyo kinyuranyo kigumamo.

Igice cya Mbere cyarangiye REG WBBC yatsinze Nile Legends amanota 53-35.

Mu agace ka gatatu Ikipe yo muri Sudani y’Epfo yatangiranye imbaraga igabanya ikinyuranyo kigera mu manota 12.

Mu minota itanu ya nyuma y’aka gace Ikipe ya REG WBBC yongeye kuyobora Umukino ibifashijwemo na Kalanga Betty wakomeje gutsinda amanota menshi.

Aka gace karangiye REG WBBC ikiyoboye umukino n’amanota 80 kuri 56 ya Nile Legends.

Mu gace ka nyuma k’umukino REG W BBC yahinduye abakinnyi, ishyiramo abakinnyi badakunze kubona umwanya, mu rwego rwo kugira ngo abandi baruhuke, bafite umukino ukomeye ikina kuri uyu wa kabiri na Kenya Ports Authority.

Iyi kipe kandi yakomeje gukina neza cyane yongera ikinyuranyo kigera mu manota 29.

Umukino warangiye REG WBBC yatsinze Nile Legends amanota 95-73 yegukana intsinzi ya kabiri muri iyi mikino.

Undi Mukino wabanjirije uyu, Kenya Ports Authority yanyagiye JKT Stars amanota 105-43

Iyi mikino irakomeje kuri uyu  wa Kabiri tariki 31 Ukwakira 2023 aho JKL Lady y’i Bugande ikina na JKT Stars yo muri Tanzania saa sita, mu gihe saa cyenda Gladiators y’i Burundi irakina na Equity Bank yo muri Kenya.

Saa kumi n’ebyiri REG WBBC irahura na Kenya Ports Authority mu mukino w’ishiraniro, mu gihe APR WBBC isoza ikina na Vijana Queens yo muri Tanzania saa tatu z’ijoro.

SHEMA IVAN

  • Imvaho Nshya
  • Ukwakira 31, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE