RDC: Loni igiye gutera inkunga ingabo za EAC

  • Imvaho Nshya
  • Nzeri 29, 2023
  • Hashize amezi 8
Image

Umuryango w’Abibumbye (Loni) wamaze kwemera ubusabwe bw’Umuryango w’Afurika y’Iburasirazuba (EAC) bwo gutera inkunga ingabo z’uyu Muryango (EACRF) zagiye mu butumwa bwo kugarura amahoro n’umutekano muri Repubulika Iharanira Demokarasi ya Congo (RDC).

Ubusanzwe izi ngabo zoherejwe mu Burasirazuba bwa RDC ziterwa inkunga n’ibihugu bihuriye muri EAC ndetse n’inkunga mvamahanga byakuraga mu bafatanyibikorwa babyo.

Mu kiganiro yahaye itangazamakuru nyuma yo kugirana ibiganiro n’abagize Akanama ka Loni gashinzwe umutekano ku Isi mu Mujyi wa New York muri Leta Zunze Ubumwe z’Amerika (USA) Umunyamabanga Mukuru wa EAC Peter Muthuki, yavuze ko gahunda yamaze kunozwa neza.

Yemeje ko mu gihe cya vuba, ingabo z’Umuryango w’Abibumbye ziri mu butumwa  bwo kugarura amahoro n’umutekano muri congo (MONUSCO) nizimara kuhava mu kwezi k’Ukuboza 2023, Loni izatangira gutera inkunga ingabo za EACRF.

Ubunyamabanga bwa EAC kandi buvuga ko iyi nkunga ya Loni izaba ari iyo gufasha izi ngabo za EAC kubaho ndetse no kuziha ibikoresho bya gisirikare.

Muthuki yongeyeho ati: “Ibyabereye muri iyi nama, Akanama gashinzwe umutekano ka Loni kashimiye EACRF ku bw’umusanzu wayo mu kugarura amahoro n’umutekano mu burasirazuba bwa Congo. Twemeranyijwe ko tugiye gufatanya mu gushakira ibikoresho bihagije izi ngabo muri RDC,  bavuga ko mu gihe  MONUSCO izaba yatangiye kugabanya abasirikare bayo  muri Congo bazatangira gufasha  ingabo za EACRF.

Mu nama twakoranye bavuze ko mu kwezi kwa 12 uyu mwaka bazongera bakaganira bareba ubufasha bagabanya bahaga MONUSCO, hanyuma bakareba n’ubwo baha EACRF”.

Izi ngabo za EAC zoherejwe muri congo kuva mu Kuboza kwa 2022 zifite intego zo kugarura amahoro n’umutekano ndetse guhagarara hagati y’impande zari zihanganye ari zo inyeshyamba za M23 n’ingabo za Congo FARDC barwaniraga mu Ntara ya Kivu y’Amajyaruguru.

Ni ingabo zaturutse mu bihugu bya Sudani y’Epfo, u Burundi, Kenya ndetse na Uganda. Kuri ubu ziri mu bice M23 yari yarambuye FARDC nk’uko byari bikubiye mu masezerano yazijyanyeyo.

Mu ntangiriro za Nzeri uyu mwaka, EAC yongereye igihe izi ngabo zagombaga kumara muri Congo ho amazi 3 zikaba zigomba kugeza tariki ya 8 Ukuboza 2023.

Muri iki gice cy’Iburasirazuba bwa Congo kibarizwamo imitwe yitwaje intwaro ihungabanya umutekano irimo iy’abanyamahanga n’abenegihugu irenga 130 ihamaze imyaka hafi 30.

Imbaraga zakoreshejwe harimo n’iza Loni mu kurwanya iyi mitwe, bisa nkaho ntacyo zatanze kugira ngo  amahoro agaruke muri aka gace, aho abantu bakomeje guhohoterwa, nyamara ingabo za MONUSCO zihamaze imyaka 25 zaraje zifite intego yo guhosha umutekano muke ariko byarananiranye abaturage bakomeje kwicwa.

ZIGAMA THEONESTE

  • Imvaho Nshya
  • Nzeri 29, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE