Rayon Sports yaguze umukinnyi ukomoka muri Niger 

Rayon Sports yatangaje ko yasinyishije Umunya-Niger Ibrahim Djingarey w’imyaka 19 ukina mu kibuga hagati yugarira wakiniraga ‘US Gendarmerie Nationale’ y’iwabo.

Mu ijoro ryo ku Cyumweru, tariki ya 28 Kamena 2026, ni bwo Rayon Sports yatangaje uyu mukinnyi mushya uzayifasha mu mwaka utaha w’imikino wa 2026/27.

Mu mwaka ushize w’imikino wa 2025/26, ‘US Gendarmerie Nationale’ yasoreje ku mwanya wa Kabiri n’amanota 57 irushwa na ‘ASN Nigelec’ ya mbere amanota icyenda. 

Abandi bakinnyi Rayon Sports iri kwitegura imikino irimo CECAFA Kagame Cup na CAF Confederation Cup yongeyemo ni Muhoza Daniel, Antonio Atisso Kodjo, Ndayishimiye Didier, Nshuti Didier, Nisingizwe Christian, Nkundimana Fabio na Nizeyimana Mubarak.

Kuri aba bakinnyi hiyongeraho umutoza w’abanyezamu mushya, Hugo Tricárico, uzafatanya na Ndayishimiye Eric ‘Bakame’.