Perezida Kagame yitezwe mu Birwa bya Seychelles

  • NTAWITONDA JEAN CLAUDE
  • Kamena 28, 2023
  • Hashize amezi 11
Image

Perezida wa Repubulika y’u Rwanda Paul Kagame, yitezwe mu Birwa bya Seychelles aho atangira uruzinduko rw’akazi nk’uko byemejwe n’Ibiro by’Umukuru w’Igihugu (Village Urugwiro). 

Muri urwo ruzinduko, biteganyijwe ko Perezida Kagame yitabira Umunsi w’Ubwigenge bwa Seychelles kuri uyu wa Kane taliki ya 29 Kamena, nk’Umushyitsi Mukuru muri uwo muhango ngarukamwaka. 

Ku wa 29 Kamena 1976 ni bwo Seychelles yabonye ubwigenge nyuma y’imyaka myinshi yarigaruriwe n’abakoloni b’Abongereza.

Ibyo birwa byabaye n’Ubukoloni bw’Abafaransa mu myaka ya 1700, byamaze imyaka irenga 150 ibihugu byinshi byo ku mugabane w’i Burayi biharanira kubyigarurira.

Impamvu nyamukuru yari iy’uko ibyo birwa byabonwaga nk’icyambu cy’ingenzi cyane mu Nyanja y’u Buhinde, mu gihe ubwikorezi bwari buhezweho icyo gihe bwari ubwo mu mazi.

Itangazo ryashyizwe hanze na Perezidansi y’u Rwanda, rigaragaza ko Perezida Kagame azanagirana ibiganiro na Perezida wa Seychelles Wavel Ramkalawan, bizibanda ku ngamba zo kurushaho kunoza umubano w’u Rwanda na Seychelles.

Biteganyijwe kandi ko nyuma y’Ibiganiro by’Abakuru b’Ibihugu, hazasinywa amasezerano menshi y’ubufatanye n’ubutwererane hagati y’ibihugu byombi, mu gushimangira ubushuti bukomeje gutera imbere. 

Itangazo riragira riti: ”Perezida Kagame azanayobora Inama idasanzwe y’Inteko y’Ishinga Amategeko.”

Uru ruzinduko rubaye urwa kabiri Perezida Kagame agiriye mu Birwa bya Seychelles, amakuru yarwo akaba yasakaye mu gihe icyo gihugu n’u Rwanda bikomeje kubaka umubano uzira amakemwa by’umwihariko mu nzego zirimo ubukerarugendo, uburezi n’umutekano. 

Muri Mata 2021, ubwo Ambasaderi w’u Rwanda muri Seychelles Maj. Gen Charles Kalamba yashyikirizaga Perezida Ramkalawan impapuro zimwemerera guhagararira u Rwanda mu Birwa bya Seychelles, yavuze ko ubukerarugendo n’uburezi ari byo biza imbere mu byo ibihugu byombi byiyemeje gufatanyamo.

U Rwanda na Seychelles ni ibihugu bigeze ku ntera ihebuje mu mbaraga bishyira mu kubyaza umusaruro urwego rw’ubukerarugendo. 

  • NTAWITONDA JEAN CLAUDE
  • Kamena 28, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE