Perezida Kagame yitabiriye irahira rya Perezida wa Nigeria (Amafoto)

  • Imvaho Nshya
  • Gicurasi 29, 2023
  • Hashize amezi 11
Image

Byari ibirori bibereye ijisho kuri uyu  wa Mbere taliki ya 29 Gicurasi, ubwo Bola Ahmed Tinubu uheruka gutorerwa kuyobora Nigeria yarahiriraga gutangira inshingano aho abaturage b’iki gihugu bamwitezeho impinduka nyinshi zijyanye n’icyizere bamufutiye.  

Perezida wa Repubulika y’u Rwanda Kagame, ni umwe mu banyacyubahiro batandukanye bitabiriye ubutumire bwo kwitabira uwo muhango wabereye ahitwa “The Eagle Square” i Abuja mu Murwa  Mukuru wa Nigeria.

Umutekano wari wakajijwe muri uwo muhango witabiriwe n’abarenga 5,000

Bola Tinubu w’imyaka 71 warahiriye kuyobora Nigeria muri manda y’imyaka 4, yavuze ko azubahiriza neza inshingano ze yisunze Itegeko Nshinga igihugu kigenderaho n’andi mategeko, kandi agashyira imbere ineza y’aba Nigeria bose.

Yashimangiye ko azashyira imbere Guverinoma idaheza, kandi abagore n’urubyiruko bagahagararirwa uko bikwiye.

Yakomeje agira ati: “Twihanganiye ibihe biruhije byashoboraga gusenya indi miryango byari kwibasira. Ariko twihanganiye umutwaro uremereye utugejeje kuri iki gihe cy’umunezero udasanzwe kivutsemo ubushobozi beo guhanga ahazaza twifuza.”

Taliki ya 1 Werurwe 2023, ni bwo Komisiyo y’Igihugu y’Amatora ya Nigeria yemeje ko Tinubu yatsinze amatora yabaye ku ku wa 25 Gashyantare, agira amajwi 37%. 

Icyo gihe yahatanaga na Atiku Abubakar ndetse na  Peter Obi mu matora yitabiriwe gusa na kimwe cya gatatu cya miliyoni 93 z’abaturage ba Nigeria bari biyandikishije kuri lisiti y’itora.

Bola Tinubu asimbuye Muhammadu Buhari wabaye Perezida Nigeria kuva mu 2015 kugeza 2023.

Aba bombi ni abo mu ishyaka All Progressives Congres (APC) ryavutse mu 2013 nyuma yo kwihuza kw’amashyaka akomeye ataravugaga rumwe n’ubutegetsi bwariho icyo gihe.

Bola Tinubu ayoboye Nigeria mu gihe muri iki gihugu gifite abaturage barenga miliyoni 200 gihugu, umuntu umwe muri batatu nta kazi afite.

Ni igihugu asanze mu bihe bigoye aho icyo gihugu kivugwamo amacakubiri ashingiye ku nyungu za Politiki, ashingiye ku iyobokamana no ku moko. 

Perezida Tinubu kandi ayoboye igihugu kiri mu myenda y’amadolari y’Amerika asaga miliyari 103, aho icyuho kiri hagati y’abakire n’abakene kigenda kirushaho kwiyongera. 

  • Imvaho Nshya
  • Gicurasi 29, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE