Perezida Kagame yakiriye Fodé Ndiaye uhagarariye amashami ya Loni mu Rwanda

  • NTAWITONDA JEAN CLAUDE
  • Nyakanga 5, 2022
  • Hashize imyaka 2
Image

Kuri uyu wa Kabiri taliki ya 5 Nyakanga 2022, Perezida wa Repubulika y’u Rwanda Paul Kagame, yakiriye Dr. Fodé Ndiaye urimo gusoza manda y’imyaka itanu nk’Umuhuzabikorwa w’Amashami y’Umuryango w’Abibumbye (OneUN) mu Rwanda.

Dr. Fodé Ndiaye yatangiye inshingano zo guhagararira amashami ya mu Rwanda guhera taliki ya 10 Nyakanga 2017, igihe abahabwaga izo nshingano ari na bo babaga bahagarariye Ishami ry’Umuryango w’Abibumbye rishinzwe Iterambere (UNDP) mu Rwanda.

Akigera mu biro, inshingano zarahinduwe mu mavugururwa yakozwe mu buyobozi bw’Umuryango w’Abibumbye (Loni),maze UNDP itandukanywa n’ubuyobozi bw’amashami ya Loni.

Dr. Fodé Ndiaye yasigaye akuriye Itsinda ry’abakozi ba Loni mu mashami atandukanye yose akorera mu Rwanda. Akorana na Guverinoma y’u Rwanda ndetse na bagenzi be mu guhuza ibikorwa by’amashami yose ya Loni, akaba Umuvugizi w’Imikorere yose yayo mu Gihugu.

Afite ubunararibonye bw’imyaka isaga 40 mu bijyanye n’ubuyobozi cyane cyane mu rwego rw’iterambere n’urw’icungamutungo. Mu nshingano amazemo imyaka itanu mu Rwanda, yashyigikiye gahunda y’Umuryango w’Abibumbye igamije iterambere binyuze mukwimakaza Gahunda z’Iterambere Rirambye (SDGs) zishamikiye ku bukungu, imibereho y’abaturage, imiyoborere byose bigamije kubaka ubukungu burambye, budaheza kandi butangiza ibidukikije.

Dr. Fodé Ndiaye (wa kabiri uturutse ibumoso) arimo gusoza manda y’imyaka 5 ahagarariye amashami ya Loni mu Rwanda

Mbere yo koherezwa mu Rwanda, Dr. Ndiaye yabaye Umuhuzabikorwa w’amashami ya Loni akuriye n’ibikorwa by’ubutabazi mu gihugu cya Niger mu gihe cy’imyaka itanu. Yanahoze mu myanya itandukanye mu Kigega cya Loni gishinzwe Guteza imbere Imari, harimo no kuba Umuyobozi w’Ishami ry’icyo kigega mu Karere k’Iburengerazuba no Hagati y’Afurika.

Dr. Ndiaye afite n’ubunararibonye buhambaye mu bigo by’imari, kuko mbere yo gukorera Loni yakoze muri Banki y’Igihugu y’Inguzanyo ku Buhinzi mu gihugu cye cya Senegal, aho yaje kuyibera Umunyamabanga Mukurugu hagati y’umwaka wa 1991-1998.

Yabaye Umujyanama wigenga w’amabanki menshi yo mu Karere n’imiryango mpuzamahanga, kandi yanayoboye imishinga myinshi y’iterambere ryo mu cyaro muri Senegal, hagati y’umwaka wa 1982 kugeza mu 1986. Yavuzweho byinshi mu nama zitandukanye ndetse anandikwaho inkuru n’ibitabo bigaragaza ibigwi bye mu rugendo rwo guharanira iterambere ry’Afurika.

Dr. Ndiaye nanone ni impuguke mu buhinzi, kuko yabwize mu Bufaransa mu Ishuri ry’Ubuhinzi rya Toulouse (ENSAT). Afite impamyabumenyi y’icyiciro cya gatatu (MPA)  mu bijyanye n’imiyoborere y’abaturage yakuye muri Kaminuza ya Harvard, akaba n’umunyeshuri wa Mason mu bijyanye na Politiki n’Imiyoborere.

Afite Impamyabumenyi y’ikirenga (PhD) mu bijyanye n’icungamutungo yakuye muri Kaminuza ya Erasmus Rotterdam mu Buholandi, akaba ari n’impuguke mu kubaka imari nto n’iciriritse n’urwego rw’imari muri rusange.

Uyu mugabo avuga neza indimi eshatu ari zo Wolof rwa kavukire, Igifaransa n’Icyongereza.

  • NTAWITONDA JEAN CLAUDE
  • Nyakanga 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE