Perezida Kagame yagaragarije urubyiruko ibyiza byo kwinjira muri RDF

  • Imvaho Nshya
  • Kanama 26, 2023
  • Hashize amezi 9
Image

Perezida wa Repubulika Paul Kagame yagaragarije urubyiruko rusoje Itorero Indangamirwa icyiciro cya 13, ibyiza byo kuba bakwinjira mu gisirikare cy’u Rwanda, RDF kugira ngo bagire uruhare mu kurinda igihugu cyabo.

Ubwo ryasozwaga kuri uyu wa Gatanu tariki ya 25 Kanama 2023, yagarutse ku ngingo irebana n’uburyo baza muri RDF bagakorera Igihugu cyabo bashyira mu ngiro ibyo bize kuko n’ubundi  nabyo bikenerwa mu gisikare.

Ati: “Mwaje kuvoma umuco wo kugira icyo gihugu icyanyu. Ndetse mwaje kubonamo n’uburyo ushobora kurinda icyo guhugu cyawe nk’icyawe ni yo mpamvu mwambaye iyo myambaro.  

Ni byo mwaterekezaga hano n’ibindi twabonye mbere byerekana ukuntu banabahaye umusongongero w’ukuntu ugomba kurinda Ighugu cyawe uri ku rugamba, uko urugamba  rurwanwa, ni byo batweretse tugera hano bamwe  muri mwebwe. Ibyo byose ni ibibategura bijyana n’imirimo mukora, amasomo mufata asanzwe hirya no hino mu mashuri.”

Umukuru w’Igihugu yakomeje abakumbuza kuba bajya muri RDF cyane cyane ko biberanye n’imyaka yabo. 

Ati: “Ndumva rero aho muri aha muri aho mukwiye kuba muri cyane cyane muri iyi myaka yanyu ndetse n’abandi nkamwe aho bakwiriye kuba muri bikanashingira ko hari n’abandi baje mbere, bahanyuze, ariko Abanyarwanda ni benshi ni nabyiza kandi [,…..] Uwitwa Umunyarwanda basanze ari Miliyoni 13,5 […] turacyari bake, ubwo muranyumva rero, ni bake ariko bake bakeneye kurindwa n’ibyabo, kandi ababirinda bava muri uwo mubare, ni twe bavamo.”

Yabashishikarije kwigana umurava, ati: “Ubu ni ugutera indi ntambwe rero buri umwe akiyubaka, mu byo mukora byose mu mashuri ukiga, ukagira umurava, ukagira umwuga aho ni ho uhera.

Muri ibyo byose wagezeho, uratanga uwuhe musanzu ku gihugu cyawe cya kindi ukunda, kimwe wajemo ukaza mu Itorero ugahura n’ababyeyi bawe n’abavandimwe bawe. [….] Kandi iyo myenda ubanza mutazayijyana, uyijyanye baragufata, usige uyizinze neza uyisige mu rugo iwanyu kandi nabyo usige ubimenyesheje.” 

Yongeyeho ati: “Babahaye rero umusogongero mu Itorero ndetse murihabwa n’ingabo z’Igihugu, RDF, muri mwe hakwiye kuvamo abagira ngo, bya bintu ko iyo bigitangira bishobora kuguhungabanya ariko iyo umaze icyumweru, uri mu cya kabiri ushobora kubikunda, mu cya gatatu ndetse ngira ngo urabikunda kurusha. 

Bamwe muri mwe rero cyangwa mwese nimushaka muzagaruke. Mugaruke mujye mu mwuga, mu mwuga wubaka urinda Igihugu.” 

Umukuru w’Igihugu Kagame yabasobanuriye ko kuba wiga andi masomo bitakubuza no kuba umusirikare wa RDF.

Ati: “Ni uko RDF uko yubatse n’ukuntu ikomeza kwiyubaka, iyo wize uri umuganga urataha ukabona umwanya wo gukora ubuganga muri RDF, uri enjenyei urataha, bakeneye enjenyeri, urataha bakeneye umwuga wawe kandi uri enjenyeri uri no mu mwuga wo kurinda Igihugu, iyo wize amategeko urataha ukabona umurimo ujyanye n’amategeko mu mwuga wo kurinda igihugu, ntaho binyurana, mwari mubizi, babibabwiye ntacyo mutakaza na busa.” 

Yasobanuye kandi ko kujyamo atari agahato, ari ukuba umuntu abishaka.

Agi: “Biguha umwanya iyo wabishatse, ariko icyo kintu Cyo kubishaka ni cyo nshaka guheraho. Ntuzaze muri RDF utabiteketeje cyangwa utabishaka, nta gahato ahubwo ni ukubigukundisha, umuntu agusobanurira icyo usangamo ibikorwa bitanyuranye n’ibyo ubuzima bwawe n’ubundi bukeneye cyo bwifuza hakiyongeramo gushobora gukora …wumva utabishaka wabyihorera ukajya mu bindi.”

Perezida Kagame yakomeje avuga ko kujya mu gisirikare harimo kwitanga k’uburyo bubiri.

 Ati: “Harimo kwitanga k’ubwoko buribiri, ibintu bimwe ukora uri hanze no mu mwuga wawe iyo ugeze muri RDF ni byo ukora ariko bifite uko bikugenzura imikorere kurusha hariya hanze.

Ubundi bwitange bwa 2 ni uko wagiye mu mwuga ushobora guhamagarirwa kurinda Igihugu isaha iyo ari yo yose. Rero ushobora kuvuga uti nk’ibyo ngibyo bampamagara ngo njye kwitanga  kurinda Igihugu ntabyo nshaka, niba utabishaka ntabwo nakugira inama yo kujya muri RDF uranyumva, ariko bikurimo nta wundi nifuza ahubwo muri RDF urenze wowe.”

Ikindi abasoje Itorero Indangamirwa, yababwiye ni uko hakwiye kubaho gahunda yo kuba babagarura, bakagera ku rundi rwego baramutse babikeneye cyangwa babishatse.

Uwavuze ahagarariye abasoje Itorero Indangamirwa, Harerimana Pascal, mu izina rya bagenzi be yijeje ko amasomo bahawe bagiye kuyifashisha bateza imbere u Rwanda kandi baharanira kurumenyekanisha neza aho baherereye hose.

NYIRANEZA JUDITH

  • Imvaho Nshya
  • Kanama 26, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE