Perezida Kagame na Tshisekedi ntibasinye amasezerano yo guhagarika intambara

  • NTAWITONDA JEAN CLAUDE
  • Nyakanga 8, 2022
  • Hashize imyaka 2
Image

Guverinoma y’u Rwanda yanyomoje ibihuha by’abakomeje guhwihwisa ko hari amasezerano yaba yarasinyiwe mu nama iheruka guhuza Perezida wa Repubulika y’u Rwanda Paul Kagame, uwa Repubulika Iharanira Demokarasi ya Congo (RDC) Felix Antoine Tshisekedi Tshilombo n’umuhuza wabo João Manuel Gonçalves Lourenço w’Angola.

Minisitiri w’Ububanyi n’Amahanga n’Ubutwererane w’u Rwanda Dr. Biruta Vincent, yavuze ko ayo makuru ari ibihuha bikomeje gukwirakwizwa n’abakomeje gufana no gutiza umurindi umwuka mubi wavutse hagati y’u Rwanda na RDC.

Minisitiri Dr. Biruta avuga ko ibyo bihuha no kuyobya abaturage mu nyungu za Politiki biri mu bikomeje kubangamira intego rusange yo kugera ku mahoro arambye muri Repubulika Iharanira Demokarasi ya Congo n’Akarere muri rusange.

Dr. Biruta yagize ati: “Umusaruro w’inama yahuje Abakuru b’Ibihugu batatu i Luanda wabaye gushyiraho gahunda ifite intego zisobanutse n’ibikorwa bigomba gushyirwa mu bikorwa n’inzego cyangwa abafatanyabikorwa batandukanye. Nta masezerano cyangwa gusaba guhagarika intambara byigeze bisinywa. Ibihuha no kuyobya abaturage mu nyungu za Politiki birashyira mu kaga intego yo kugera ku mahoro muri RDC no mu Karere.”

Icyemezo cyo gusaba umutwe wa M23 gushyira intwaro hasi ikayoboka inzira y’amahoro giheruka gufatwa n’Abakuru b’Ibihugu bya EAC mu nama iheruka kuba mu kwezi kwa Kamena 2022, ahanafatiwe umwanzuro wo kohereza Ingabo za EAC zitabarizwamo iz’u Rwanda ku busabe bwa Perezida Tshisekedi.

Inyeshyamba za M23 zikimara kumva ibyo bihuha by’uko haba hari amasezerano yasinywe hagati ya RDC n’u Rwanda mu biganiro byabereye i Luanda mu ntangiriro z’iki cyumweru, zahise zitangaza ko nta wundi wemerewe kuba yasinya mu izina ryazo.

Umuvugizi wa M23 Willy Ngoma yagize ati: “Twe turi Abanyekongo ntituri Abanyarwanda. Niba habaho kureka intambara byaba ari ubwumvikane hagati yacu na Guverinoma ya Congo. M23 yonyine ni yo ishobora gusinyana amasezerano yo kureka imirwano na Guverinoma.”

Nyamara Umuvugizi w’Ibiro bya Perezida w’u Rwanda Stephanie Nyombayire, yatangaje ko imyanzuro yafatiwe muri iyo nama igaragaza gahunda zikwiye gushyirwa mu bikorwa zirimo guhashya umutwe wa FDLR n’indi mitwe yabaye inkomoko y’amakimbirane hagati y’u Rwanda na RDC.

Uwo mutwe washinzwe n’abasize bakoze Jenoside yakorewe Abatutsi mu myaka 28 ishize, wakiriwe na Leta ya RDC aho ufatanyije n’ingabo za Leta FARDC mu kurwanya umutwe wa M23.

U Rwanda rusanga byaba bigoranye guharanira amahoro mu gihe Leta ihitamo gufatanya n’imitwe yitwaje intwaro mu guhangana n’indi mitwe yitwaje intwaro, kuko uretse FDLR, ingabo za Leta binavugwa ko zanifatanyije n’undi mutwe wa Mai-Mai na wo umaze imyaka myinshi muri icyo Gihugu.

Mu bindi yatangaje, yagaragaje ko Abakuru b’Ibihugu bateguye amatsinda abiri, iry’ubutasi na Komisiyo y’ubuhuza yitezwe kongera guhurira i Luanda ku ya 12 Nyakanga. Ayo matsinda ahuriweho n’ibihugu byombi mu rwego rwo guharanira ubwumvikane buciye mu biganiro no guhererekanya amakuru.

Bananzuye gushyiraho uburyo bunoze bwo gufasha abari impunzi gutahuka, no kurwanya amagambo y’urwango n’ihohoterwa rikorerwa Abanyekongo bakoresha Ururimi rw’Ikinyarwanda.

  • NTAWITONDA JEAN CLAUDE
  • Nyakanga 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE