Ozonnia Ojielo yagizwe Umuhuzabikorwa w’amashami ya Loni mu Rwanda

  • NTAWITONDA JEAN CLAUDE
  • Nyakanga 13, 2022
  • Hashize imyaka 2
Image

Umunyamabanga Mukuru w’Umuryango w’Abibumbye Antonio Guterres, yahaye Ozonnia Ojielo ukomoka muri Nigeria inshingano zo kuba Umuhuzabikorwa w’amashami y’Umuryango w’Abibumbye (Loni) mu Rwanda asimbuye Fodé Ndiaye wasoje manda y’imyaka itanu ku ya 10 Nyakanga 2022.

Ubuyobozi bw’Umuryango w’Abibumbye buvuga ko hategerejwe ko yemezwa na Guverinoma y’u Rwanda mbere yo gutangira izo nshingano, aho agiye gukomereza ku bikorwa by’indashyikirwa Fodé Ndiaye asize yubatse mu guharanira kugera ku ntego z’iterambere rirambye (SDGs).

Buvuga kandi ko uyu Ojielo azanye mu Rwanda ubunararibonye bw’imyaka isaga 25 mu bijyanye n’imirimo ijyanye no kubaka iterambere rirambye, harimo kuba yarayoboye imishinga na gahunda mpuzamahanga bitandukaye by’Umuryango w’Abibumbye muri Aziya yo Hagati ndetse no muri Afurika, byagutse bikagera ku migabane ine.

Mu Muryango w’Abibumbye, ubu yakoraga nk’Umuhuzabikorwa w’Amashami y’Umuryango w’Abibumbye mu Gihugu cya Kyrgyzstan kuva mu mwaka wa 2018. Mbere yo kwerekeza muri icyo Gihugu Ojielo yanabaye Umuyobozi w’Ishami ry’Imiyoborere no Kubungabunga Amahoro muri Afurika hagati y’umwaka wa 2014 kugeza mu 2017.

Yinjiye bwa mbere mu Muryango w’Abibumbye nk’Umukozi w’ishami rishinzwe Iterambere (UNDP) mu mwaka wa 2004, yanabaye uhagarariye Ikigega cy’Umuryango w’Abibumbye kigenewe iterambere ry’Abaturage (UNFPA) muri Kyrgyzstan mu gihe cy’umwaka umwe mbere y’uko agirwa Umuhuzabikorwa w’amashami ya Loni muri icyo Gihugu.

Yagiye agaragaza umwihariko no mu yindi myanya y’ubuyobozi itandukanye muri UNDP uretse kuba yari akuriye Ishami ry’Imiyoborere no kubaka amahoro muri Afurika aho yari afite icyicaro i Addis Ababa muri Ethiopia.

Yanayoboye Ishami rishinzwe gukumira amakimbirane ndetse no kwiyubaka ku Biro bishinzwe Gukumira intambara no guharanira kwiyubaka i New York muri USA. Yakoze indi mirimo y’ubuyobozi mu nzego zo hejuru za UNDP mu bihugu birimo Kenya nya Ghana.

Mbere yo gukorera Umuryango w’Abibumbye, Ojielo yabaye umunyamategeko, umwarimu wa kaminuza, umunyamakuru ndetse akaba yari umujyanama mu bijyanye no gukoresha ukuri, ubutabera n’ubwiyunge hamwe n’uburenganzira bwa muntu muri Ghana, Liberia, Malawi, Namibia na Sierra Leone.

Ojielo yanabaye kandi Umuyobozi w’Ikigo cy’Amahoro muri Afurika, Umuyobozi w’Umuryango  utegamiye kuri Leta muri Nigeria ari na we wawushinze, kandi yanabaye Perezida wa mbere w’Ikigo cy’Abahuza n’Abunzi muri Nigeria gifatwa nk’ihuriro rya mbere rinini ry’abahuza n’abunzi muri Afurika.

 Ojielo yanditse ibitabo bitandukanye byaba ibijyanye n’ubushakashatsi bwa kaminuza ndetse n’ibindi yanditse ku ruhande, akaba afite ipamyabumenyi y’ikirenga (PhD) mu bijyanye n’Amasomo y’Amahoro n’Intambara yakuye muri Kaminuza ya Ibadan muri Nigeria.

Afite nanone impamyabumenyi y’icyiciro cya gatatu (Master’s) mu bijyanye no gucunga imishinga yakuye mu Ishuri Rikuru ryigisha Icungamutungo ry’i Paris mu Bufaransa. Afite n’indi Master’s yakuye  muri Kaminuza ya Nigeriya mu bijyanye n’amateka, n’impamyabumenyi y’icyiciro cya kabiri cya kaminuza yakuye muri iyo kaminuza mu bijyanye n’amateka n’amategeko.

  • NTAWITONDA JEAN CLAUDE
  • Nyakanga 13, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE