Nyamasheke: Inka 5 za Girinka zapfuye mu Kagari, abazihawe baravugwaho kuzirutsa

  • BAHUWIYONGERA SYLVESTRE
  • Ukuboza 7, 2023
  • Hashize amezi 3
Image

Kuva mu mpera z’ukwezi k’Ukwakira, inka eshanu zahawe abaturage muri Gahunda ya Girinka mu Kagari ka Banda, Umurenge wa Rangiro, Akarere ka Nyamasheke zimaze gupfa rw’amayobera, bigakekwa ko abazihawe batubahirije inama bahawe na Veterineri bagahitamo kuzirutsa bavuga ko zarozwe.

Izo nka 5 ni izo mu Midugudu 4 kuri 5 igize Akagari ka Banda, hakaba hari n’indi imwe yo mu Mudugudu wa Nkamba wari usigaye utarapfusha inka, na yo bivugwa ko imaze ibyumweru bibiri itava aho iri.

Ubuyobozi bw’Akarere ka Nyamasheke buvuga ko izo nka zisuzumwa bikagaragara ko ndwara izo nka ziba zifite ahubwo ziba zibura zimwe mu ntungamubiri, ariko abaturage babwirwa ibyo gukora bo bagakora ibihabanye kuko bavuga ko ari amarozi.

Izapfuye ni 2 zo mu rugo rumwe mu Mudugudu wa Gasumo, imwe yo mu Mudugudu wa Gahira, iyo mu wa Bururi, n’indi yo mu wa Uwakagano, zose ni inyana n’imbyeyi, zipfa mu buryo bujya gusa.

Umukozi ushinzwe iterambere n’imibereho myiza y’abaturage mu Kagari ka Banda Ndayisenga Cyprien, yatangarije Imvaho Nshya ko inka za mbere zapfuye mu mpera z’Ukuboza n’izindi zigenda zikurikiraho.

Ati: “Byatubereye amayobera, twibaza uburyo zipfa, ariko 2 za mbere zo mu rugo rumwe wabonaga zarashizemo (zarananutse), bigaragara ko ari inzara no gufatwa nabi. Izindi hakekwa amarozi kuko zapfuye zitarwaye, zariye ubwatsi bumwe, cyane cyane ko hano hari n’urunturuntu rwo kuvuga ko hari abiba ubwatsi bw’abandi. Bikavugwa ko abibwa bashobora kubushyiraho ibihumanya ubwibye yabugaburira inka igahita ipfa, byose bikaba bikiri urujijo.”

Inka za Girinka zikomeje gupfa urupfu rw’amayobera

Yagaragaje ibindi bibazo bishobora kuba bituma izo nka zipfa, birimo no kuba aborozi batubahiriza inama bwahabwa na ba veterineri.

Yagize ati: “Ikindi kibazo gihari ngo ni uko bamwe mu borozi babwirwa kuzishakira umunyu, bakanaziha kalisiyumu, bo bakavuga ko batabibona kuko nk’iyo kalisiyumu igura amafaranga hagati ya 10.000 na 12.000 kandi iboneka hafi y’ibiro by’Umurenge wa Rangiro, mu bilometero 18 uvuye ku Kagari kabo. Itike bakoresha ngo bahagere ni amafaranga 6 000 bagenda n’amaguru akaba amasaha atari munsi y’ane, bagahitamo kubyihorera bakazishakira ba magendu bazirutsa bavuga ngo ni amarozi kugeza zipfuye.”

Nyuma y’ubugenzuzi bwakozwe na Veterineri w’Akarere nk’uko Imvaho Nshya yabitangarijwe n’Umuyobozi w’Ishami ry’ubuhinzi, ubworozi n’umutungo Kamere mu Karere ka Nyamasheke Sengambi Albert, basanze nta kimenyetso gihari cy’indwara y’icyorezo yaba izica, inka zapfuye ari izatanzwe mu myaka hagati ya 2 na 7 ishize.

Sengambi ati: “Twagiye muri kariya gace dusanga ikibazo kigaragara cyane ari ukuzifata nabi n’ubumenyi buke mu kuzorora. Impamvu iza Girinka ari zo bivugwa ko zibasiwe ni uko muri biriya bice borora ibimasa, izitari ibimasa rero usanga hafi ya zose ari iza Girinka.

Akomeza agira ati: “Hari ikibazo kigaragara cyo kutazitaho kuko usanga ibiraro biba bitubakiye, zinyagirwa n’iyi mvura yose bakavuga ko inka iyo inyagiwe ari bwo zirushaho gukomera, n’ubundi buryo usanga zidafashwe neza, imbyeyi n’inyana kubera imbaraga nke zikahazaharira cyane”.

Yavuze ko hagiye gukorwa ubukangurambaga mu bazifite bose, bakongera kwibutswa kuzifata neza, uwo bigaragaye ko ayifata nabi bikomeje gukurikiranwa nibigaragara ko atayishoboye akayamburwa.

Akarere ka Nyamasheke kose karimo inka zirenga 8 900 za Girinka, zirimo izirenga 600 mu Murenge wa Rangiro.

  • BAHUWIYONGERA SYLVESTRE
  • Ukuboza 7, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE