Nyamasheke: Imbwa 62 zikekwaho kurya amatungo y’abaturage zishwe

  • BAHUWIYONGERA SYLVESTRE
  • Ukuboza 13, 2023
  • Hashize amezi 5
Image

Nyuma y’itabaza ry’abaturage b’Imirenge y’Akarere ka Nyamasheke irimo Kagano, Kanjongo, Bushekeri na Rangiro bavuga ko barembejwe n’imbwa z’inyagasozi zibarira amatungo, amwe ziyasanze mu bisambu aho aziritse andi ziyasanze mu biraro bidakinze mu ngo zikayarya, ubuyobozi  bw’aka karere bwatangiye gukemura iki kibazo bwica 62 muri zo.

Ikibazo cy’izi mbwa cyavuzwe cyane mu Gushyingo uyu mwaka, ubwo tariki ya 13 Ugushyingo zariye ihene 4 z’umuturage witwa Ndaheranwa Fabien, mu Mudugudu wa Kazibira, Akagari ka Gako, Umurenge wa Kagano, yajya kuzicyura, aho yari yaziziritse agasanga intumbi zazo ndetse iya 5 akayibura.

Ziyongeraga ku ntama 2 z’Umukuru w’Umudugudu wa Mpombo muri aka Kagari ka Gako, witwa Muzindutsi Edouard yari yaragije umuturage wo mu Mudugudu wa Kazibira na zo basanga zaziriye.

Byaniyongeraga ku bwoba bwinshi bw’abaturage, cyane cyane abafite abana bato bavuga ko bashobora kujya kwiga, gutashya, kuvoma cyangwa bakina zikaba zabiraramo zikabarya.

Aganira n’Imvaho Nshya icyo gihe, Umuyobozi w’Akarere ka Nyamasheke wungirije ushinzwe iterambere ry’ubukungu wari mu mwanya w’umuyobozi w’Akarere icyo gihe, Muhayeyezu Joseph Désiré, yari yijeje gukemura iki kibazo.

Yagize ati: “Ni ikibazo gikomeye cyane tutakinisha kuko nk’ubu dufite raporo y’ihene 13 zimaze kurya, zisanga intama ndafitiye umubare hano, hakaba hari n’impungenge ko zanarya abantu zikabica kuko kubera kuba zidakingiye zishobora kuba zifite n’indwara.

Tugiye kuzihagurukira dushake uko zicwa, iz’abaturage zidakingiye, dusabe abazitunze bazikingire zinakurikiranwe kuko ikibazo nk’iki gikora ku mutekano w’abaturage.’’

Mu kiganiro n’Imvaho Nshya, Umuyobozi w’Akarere ka Nyamasheke Mupenzi Narcisse, yemeje ko nyuma yo kubona ko izi mbwa ziteje umutekano muke n’igihombo mu baturage, hafashwe ingamba zo kuzitega, aho muri uku kwezi k’Ukuboza, mu Murenge wa Kanjongo hishwe 42, muri Kagano hicwa 20.

Yagize ati: “Izitari mu ngo, zizerera ntiwabona uwo uziryoza kuko nta nyira zo ziba zifite ziba zizerera nyine. Izo zizerera rero hakorwa uburyo zirindwa abaturage. Hari izizerera zarabanje kuba mu ngo. Icyo dukangurira abantu ni ugucunga izororerwa mu ngo, zigakingirwa cyane cyane ko zinaba zifite imigozi yabugenewe zambikwa ku buryo ntaho zihurira n’abantu zarya”.

Asaba abafite imbwa mu ngo kuzicunga birinda ko zisohoka, kuko iziri hanze zizerera hari inzego bireba ziba zikurukiranira hafi ibyazo.

Imvaho Nshya yamubajije igikurikiraho nyuma yo kuzica,kugira ngo zitaba zateza ibibazo birushije ibya mbere.

Ati: “Icyo ni cyo twakurikirana tukakimenya neza ariko ntekereza ko bikorwa kinyamwuga, kuko zishwe ntihabeho uburyo bunoze zigenzwa nyuma yaho, zateza ibibazo birenze ibyo baba bakemuye bazica”.

Abaturage baganiriye n’Imvaho Nshya nyuma y’iki gikorwa, bavuze ko bakiranye ibyishimo iyicwa ry’izi mbwa, cyane cyane ko uretse n’amatungo,zinarya abantu kandi ubuvuzi bw’uwo zariye bugahenda cyane, bakavuga ko n’abo mu yindi Mirenge bakwiye kwigana iyo ibiri kuko zizerera henshi zikanangiza byinshi.

  • BAHUWIYONGERA SYLVESTRE
  • Ukuboza 13, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE