Nyamasheke: Ikiraro kimaze imyaka 6 cyubakwa ibituzura gihangayikishije abaturage

  • BAHUWIYONGERA SYLVESTRE
  • Mutarama 31, 2024
  • Hashize amezi 4
Image

Abaturage b’Utugari twa Gisoke na Nyakavumu, Umurenge wa Mahembe, Akarere ka Nyamasheke, bahangayikishijwe n’ikiraro cya Nyarubandwa kimaze imyaka itandatu cyubakwa ariko bakaba barategereje ko cyuzura bagaheba.

Bavuga ko barushijeho gushoberwa ubwo muri Nyakanga 2023 hazaga rwiyemezamirimo uza kuhakora akahasiga amaze ukwezi kumwe gusa.

Nyuma y’aho uwo rwiyemezamirimo ataye akazi akajyana n’abakozi be bose, abaturage barashobewe aho kugeza ubu nta muyobozi n’umwe ku Karere urababwira iby’iki kiraro kiri ku mugezi wa Nyarubandwa.

Abatuye Akagari ka Nyakavumu giherereyemo, bavuga ko iki kiraro kituzura cyabahejeje mu bwigunge ndetse n’abo mu Kagari bakavuga ko ubuhahirane n’abaturanyi babo bubagora cyane.

Bamwe muri bo babwiye Imvaho Nshya ko iki kiraro mbere cyari cyarashyizweho ibiti, ariko kuko byari bidakomeye kubera imvura nyinshi yagwaga ikabitwara byabaye ngombwa ko gitangira kubakwa mu buryo burambye.

Uyu munsi icyo kiraro cyari cyaratangiye gukorwa ntigitinzeho igiti na kimwe, ahubwo abantu bajya banyura mu mazi ku buryo iyo imvura yaguye ari inyinshi umugezi wuzura bakabura uko bambuka.

Impungenge zikomeye ngo ziri cyane cyane ku bana bava mu Kagari ka Nyakavumu bajya kwiga muri mu Rwunge rw’Amashuri rwa Fumba muri Gisoke, bagenda bavogagira muri ayo mazi n’ibyo bibuye binashobora kubakomeretsa.

Nzamurambaho Eric ucururiza muri Gisoke yabwiye Imvaho Nshya, yagize ati: “Kiriya kiraro rwose ntituzi ibibazo byacyo, nta n’umuyobozi ukivugaho. Haba amazi menshi, iyo umugezi wuzuye ukamanura ibibuye bigasenya ibiti byose abaturage baba bashyizeho. Cyigeze gusenyuka burundu mu myaka 6 ishize, abaturage birwanaho bashyiraho ibindi biti ariko byose byaragiye kiri aho.”

Yarakomeje ati: “Nk’ubu ntidushobora kugira icyo twohereza muri Nyakavumu cyangwa icyo dukurayo kuko twahakuraga ikawa, amakara, imbaho n’ibindi biti bikenerwa kuko  hari amashyamba menshi.”

Abana baturukayo baza kwiga ababyeyi babo bibaza niba bagaruka, ndetse nta n’umuyobozi muri iki gihe wakageramo n’ikinyabiziga, na Meya agiyeyo byamusaba urugendo rurerure n’amaguru rwo kuzenguruka ahandi ngo ahagere.”

Ngarukiyintwari Dominique wo muri Nyakavumu, avuga ko igihombo kudakora kiriya kiraro byabateje bizasaba imyaka myinshi ngo bakivemo.

Ati: “Ino nta santere y’ubucuruzi ihari ikomeye, twaranguraga muri santere ya Fumba muri Gisoke, ubu kurangura yo bisaba kubizana n’igare, ryagera ku mugezi hakaza abavogagira amazi bakabyikorera n’umutwe, nyir’igare na we akaryambutsa aryikoreye muri ayo mazi, akabona kubikomezanya abizana.”

Yunzemo ati: “Ntidushobora kujya ku Bitaro bya Mugonero kwivuza, kuko urembye batamwambukana amazi n’ingobyi, n’ikigo nderabuzima cya Gatare muri Karongi twivurizagaho byoroshye ntibigishoboka, Ikigo Nderabuzima cya Mahembe na cyo kukigeraho biragoye, byose bisaba kuzenguruka. Turasaba Akarere kudukura mu gihirahiro.”

Bavuga ko kubera ko n’indi mihanda yakabahuje n’ahandi mu gihugu yapfapfanye, no kurema isoko rya Mugonero bitagikunda kuko baba bikanga ko imvura yagwa bakarara nzira, imodoka zajyaga kugira ibyo zihakura zahagaze.

Bakibaza niba bizasaba kwandikira Umukuru w’Igihugu bamubwira akababaro kabo ngo imirimo yo kucyubaka ibone gusubukurwa kuko uwo rwiyemezamirimo yakoze inking z’impande zombi zacyo, arekera aho abasiga mu gihirahiro arigendera.

Umuyobozi w’Akarere ka Nyamasheke Mupenzi Narcisse, yijeje abaturage ko mu byumweru bibiri gusa kizaba cyarangiye kuko rwiyemezamirimo atagitaye, ahubwo yanze kugikomeza mu mvura.

Yemeje ko ubwo imvura itakigwa ari nyinshi muri iyi minsi agiye gusubukura imirimo bakongera kugenderana no guhahirana.

Ati: “Ntiyataye imirimo kuko kontaro twagiranye ntirarangira ngo tuvuge ko yayitaye. Mu buryo bwa tekiniki rwiyemezamirimo ubwe Akarere kaganiriye na we dusanga atari gukomeza kubaka mu mvura, aba ahagaritse imirimo yari yatangiye muri Nyakanga umwaka ushize. Ariko ibyari bimaze gukorwa ni byo byinshi, ibisigaye twumvikanye ko agiye kubisubukura, mu byumweru 2 ikiraro kiraba ari nyabagendwa.”

Avuga ko bahisemo kucyubaka mu buryo buramba ngo bakemure ibyo guhora bakora ibidafashe.

Yemeje ko mu gihe ibyumweru 2 byarenga rwiyemezamirimo ataracyuzuza ari ho haba hatangiye kuba ikibazo cyo kutubahiriza amasezerano.

  • BAHUWIYONGERA SYLVESTRE
  • Mutarama 31, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE