Nyagatare: Abahoze mu burembetsi bahawe akazi baca ukubiri nabwo

Kuva muri Nyakanga 2021 mu Karere ka Nyagatare abaturage 2776 bahoze mu burembetsi bahawe imirimo y’ibanze irimo guhanga no gufata neza imihanda y’imigenderano, abandi biga imyuga bituma baca ukubiri n’uburembetsi.

Mu baturage 2776 bahawe akazi, 399 bajyanywe kwiga mu mashuri y’imyuga bigishwa ubumenyingiro nk’ubwubatsi, amashanyarizi, ubukanishi bw’ibinyabiziga, ubudozi, ubutetsi, ububoshyi, ububaji, gusudira, no gutunganya imisatsi. Ibi bibafasha kwihangira imirimo no gushaka akazi.

Kuva mu 2018, Guverinoma y’u Rwanda yashyize imbaraga mu gushyiraho imishinga hirya no hino mu gihugu igamije guhindura ubuzima bw’abaturage.

Kuri uyu wa Gatanu, Minisitiri w’Ubutegetsi bw’Igihugu Gatabazi Jean Marie Vianney ari kumwe na Guverineri w’Intara y’Iburasirazuba CG Gasana K. Emmanuel n’abandi bayobozi barimo Umuyobozi Mukuru w’Ikigega BDF Vincent Munyeshyaka, Umuyobozi w’Ikigo cy’Igihugu cy’Amakoperative Prof. Harelimana Jean Bosco n’Umuyobozi w’Akarere Gasana Stephen, yatangije ku mugaragaro gahunda y’imishinga itanga akazi ku baturage mu Mirenge yegereye umupaka yo mu Karere ka Nyagatare.

Minisitiri Gatabazi yasabye abaturage gushyira hamwe no guhuza imbaraga mu mishinga ibateza imbere, gushyira mu bikorwa ibyo biga bakanoza ibyo bakora kugira ngo babashe guhatana ku isoko ry’umurimo no gutanga akazi ku bandi bityo abaturage bose bakabaho neza.

Minisitiri Gatabazi yagize ati: “Ibi ni ibikorwa dushimira Perezida wa Repubulika Paul Kagame yashyikirije mwe abaturage kugira ngo mwiteze imbere, icyo tubasaba mwe nk’abaturage ni ugushyira hamwe no guhuza imbaraga mu mishinga ibateza imbere, mu gushyira mu bikorwa ibyo mwiga mukanoza ibyo mukora kugira ngo mubashe guhatana ku isoko ry’umurimo no gutanga akazi ku bandi.”

Basuye amwe mu mashuri y’ubumenyingiro abahoze mu buzererezi n’ubucuruzi bwa magendu bigiramo (Centre EXODUS na TVET Ntoma) hamwe n’amakoperative y’abahawe akazi muri iyi gahunda.

Yibukije abaturage gucukura imirwanyasuri, gukora ubuhinzi butangiza ubutaka, gukora ubworozi buhaza isoko rihari harimo n’inganda z’amata ziri mu Karere no gukora ubuhinzi n’ubworozi byuzuzanya.

Abahawe imirimo bazakomeza gukora muri uyu mwaka bibanda ku bikorwa byo kurwanya isuri harimo gukora amaterasi, gutera ibiti n’ibindi.

Gahunda y’imishinga itanga akazi harimo imihanda itunganywa, guca amaterasi y’indinganire, amavuriro y’ingoboka, hubatswe amasoko, hashinzwe amakoperative  amashuri y’ubumenyingiro, abayigamo bakaba batangaza ko yabafashije kuva mu burembetsi.