Nyabihu: Perezida Kagame arashimwa n’abaturage yubakiye ikiraro cya Giciye

  • NGABOYABAHIZI PROTAIS
  • Ukuboza 29, 2023
  • Hashize amezi 5
Image

Abakoresha n’abaturiye ikiraro cya Giciye giherereye mu Murenge wa Rugera, Akarere ka Nyabihu, bavuga ko bashimira Perezida Kagame wacyubatse mu buryo burambye, kuko bacyambuka bizeye ubukomere bwacyo kandi kikabahuza n’Uturere twa Ngororero na Musanze.

Iki kiraro cya Giciye kiri ku muhanda Musanze –Vunga, gifite metero 33 kikaba cyaruzuye gitwaye miliyoni 247 z’amafaranga y’u Rwanda, ngo cyatumye uyu muhanda uba nyabagendwa gikumira isuri yari yarayogoje imirima icyegereye.

Nsengiyumva Theogene yagize ati: “Iki kiraro cyari cyubakishijwe ibiti hejuru, mu mwaka wa 2020 isuri yaraje iragisenya burundu ku buryo ingendo zahagaze burundu, mbere kitaragenda mbere twanyuragaho tukareba hasi tukabona twagwamo hari n’abo amaguru yabo yahagamaga mu mbaho zari zicyubatse bakahakomerekera, ubu noneho Kagame yatwubakiye ikiraro cy’ibyuma n’amabuye kuva hasi kugeza hejuru, ubu dutambuka nta kibazo, ibi biri muri bimwe mu bituma tuzamutora muri 2024.”

Mutumwa Bernard ni umushoferi ukoresha umuhanda Vunga –Musanze, avuga ko iyo imodoka zabo zambuka kuri kiriya kiraro bumva nta mpungenge zo kuba bagwa mu mugezi.

Yagize ati: “Buriya Perezida Kagame ni umwe mu bayobozi bumva agaciro k’umuturage, byagera ku bijyanye n’itumanaho, imigenderanire, ikoranabuhanga tugasanga ari ibintu yimirije imbere kandi koko ni yo soko y’iterambere, kuba iki kiraro yaracyubatse mu buryo burambye ni kimwe mu bituma uyu muhanda tuwunyuzaho imodoka zacu zipakiye nta mpungenge  mu gihe mbere imodoka yabaga irimo abantu twabakuragamo tukabanza kwambuka imodoka irimo ubusa, kuba iki kiraro cyubakishije ibyuma hose rero urabona ko ari akarusho”.

Umuyobozi w’Akarere ka Nyabihu Mukandayisenga Antoinette nawe ashimangira ko kiriya kiraro kiri mu byoroshya ubuhahirane n’imigenderanire, agashimira Perezida Kagame wakivuguruye ndetse asaba abaturage gukomeza kubungabunga ibyagezweho.

Yagize ati: “Iki kiraro kuba Perezida Kagame yaracyubatse mu buryo bwa gihanga kandi burambye ni ibyo gushimirwa, kuko mu gihe cyari cyarasenyutse guhahirana byari ikibazo gikomeye, abaturage baraheze mu bwigunge. Ndasaba abaturage gukomeza kubungabunga ibyo bagenda bagezwaho n’ubuyobozi, kandi mbizeza ko ibyiza biri imbere mu iterambere n’imibereho myiza y’Abanyarwanda”.

Iki kiraro kiri mu muhanda Vunga -Musanze ni kimwe mu bituma imigenderanire yoroha kandi n’abahinzi bakaba baboneraho kugeza umusaruro wabo mu mujyi wa Musanze ndetse bagakomeza bajya gushaka amasoko mu Karere ka Ngororero, kikaba cyarigeze gusenywa n’ibiza byabaye mu mwaka wa 2020.

  • NGABOYABAHIZI PROTAIS
  • Ukuboza 29, 2023
  • Hashize amezi 5
TANGA IGITEKEREZO
confiance Mugisha says:
Ukuboza 29, 2023 at 1:48 pm

Nibyiza cyane turashimira Perezida wa repubulika rwose!
Gusa nanubu hara cyari ikibazo cyuko uyumuhunda utarajyamo kaburimbo kandi ari umuhandi ukoreshwa cyane kubera isoko rya Vunga ndetse nibindi bikorwa byiterambere nkumucanga wa Giciye!!
Nabyo habayeho ubuvugizi nziko byatunezeza kurushaho!

Murakoze!!

Andika igitekerezo

AMATEGEKO AGENGA IYANDIKA RY'IGITEKEREZO CYAWE