Ngororero: Bafashwe bacukura ‘Wolfram’ mu ishyamba rya Gishwati

  • Imvaho Nshya
  • Kanama 7, 2022
  • Hashize imyaka 2
Image

Abantu barindwi bafatiwe mu Karere ka Ngororero bacukura amabuye y’agaciro yo mu bwoko bwa Wolfram binyuranyije n’amategeko mu ishyamba rya Gishwati.

Bafatiwe mu Mudugudu wa Gatomvu, Akagari ka Mugarura, Umurenge wa Muhanda, mu bikorwa byo gufata abantu bacukura amabuye y’agaciro muri Pariki ya Gishwati byateguwe na Polisi y’u Rwanda ku wa Gatanu taliki ya 5 Kanama, aho bari bamaze gucukura ibilo 4 bya Wolfram.

Umuvugizi wa Polisi mu Ntara y’Iburengerazuba Superintendent of Police (SP) Bonaventure Twizere Karekezi, yavuze ko uretse kuba bafashwe bacukura amabuye y’agaciro banakurikiranyweho kugira uruhare rwo kwangiza ibiti byo muri Pariki y’Igihugu ya Gishwati Mukura.

Ati: “Abaturage bo mu Mudugudu wa Gatomvu bahaye amakuru Polisi ko hari abaturage bacukura amabuye y’agaciro mu ishyamba rya Leta kandi bakanangiza ibiti. Ni bwo ibikorwa byo kubafata byahise bitangira hafatwa abantu barindwi bacukura amabuye y’agaciro bakoresha ibikoresho gakondo. Bafashwe bamaze gucukura ibilo 4 bya Wolfram, bahita bafungwa.”

SP Karekezi yibukije abaturage ko gucukura amabuye y’agaciro utabifitiye uruhushya ari icyaha gihanwa n’amategeko, yongeraho ko bariya bafashwe bacukuraga mu ishyamba rya Leta bakaba baranangizaga ibiti, abasaba kubicikaho kuko ari icyaha gihanwa n’amategeko.

Yasoje ashima uruhare rw’abaturage batanga amakuru, abakora ibyaha bagafatwa, anabasaba gukomeza gutanga amakuru kandi ku gihe.

Abafashwe n’ibyo bafatanywe bashyikirijwe Urwego rw’Igihugu rw’Ubugenzacyaha (RIB) rukorera kuri Sitasiyo ya Kabaya ngo hakurikizwe amategeko.

Ingingo ya 72 mu Itegeko N° 064/2021 ryo ku wa 14/10/2021 rigenga urusobe rw’ibinyabuzima iteganya ko bitabangamiye ibiteganywa n’andi mategeko, umuntu ku giti cye ukora imirimo y’ubushakashatsi bw’amabuye y’agaciro cyangwa ucukura amabuye y’agaciro na kariyeri ahantu hakomye aba akoze icyaha.

Iyo abihamijwe n’urukiko, ahanishwa igifungo kitari munsi y’umwaka umwe (1) ariko kitarenze imyaka itatu (3) n’ihazabu y’amafaranga y’u Rwanda atari munsi ya miliyoni eshanu (5.000.000 FRW) ariko atarenze miliyoni zirindwi z’amafaranga y’u Rwanda (7.000.000 FRW).

Iyo icyaha kivugwa mu gika cya mbere cy’iyi ngingo gikorewe muri Pariki y’Igihugu cyangwa icyanya kamere ntayegayezwa, igihano kiba igifungo kitari munsi y’imyaka itatu (3) ariko kitarenze imyaka itanu (5) n’ihazabu y’amafaranga y’u Rwanda atari munsi ya miliyoni zirindwi (7.000.000 FRW) ariko atarenze miliyoni icumi z’amafaranga y’u Rwanda (10.000.000 FRW).

  • Imvaho Nshya
  • Kanama 7, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE