Ngoma: Abamotari barasaba gushyirirwaho parikingi  

  • Imvaho Nshya
  • Ukwakira 31, 2023
  • Hashize amezi 7
Image

Bamwe mu bamotari bakorera mu mujyi wa Kibungo mu Karere ka Ngoma bavuga ko bagorwa no kubona aho bahagarara hafi ya gare bitewe no kuba nta parikingi y’abamotari ihari, ibi bikaba bituma bahura n’ibihombo byo gucibwa amande, bagasaba ko bakubakirwa parikingi.

Abatwara abantu n’ibintu mu mujyi wa Kibungo bavuga ko bafite ikibazo cyo kutabona aho bahagarara hameze nka parikingi hafi ya gare ya Ngoma. Bavuze ko bahagarara mu nzira y’abanyamaguru gusa ngo bitewe nuko hatemewe kuba bahahagarara bituma bacibwa amande n’abashinzwe umutekano ndetse bikaba byatuma bagonga abanyamaguru baba batambuka.

Rukundo Annicet yagize ati: “Abamotari duparika mu nzira y’abanyamaguru bitewe nuko ntaho dufite duhagarara. Uyu muhanda ucibwamo n’ibinyabiziga byinshi kandi bigari bityo bikaba byatuma abagenzi cyangwa abamotari tugongwa, tukaba twahasiga ubuzima. Twifuza ko batwubakira parikingi hano hafi ya gare bigaca akajagari k’abanyamaguru n’abamotari.”

Ibi kandi bishimangirwa na Ndoreyaho Valens yagize ati, “Iyi gare n’umuhanda byubakwa, twumvaga bazashyiraho parikingi y’abamotari tukabona aho duparika ariko twatunguwe no kuba tubisikana n’abaturage mu nzira y’abanyamaguru. Twifuza ko twagira aho duparika tukagira umutekano w’ibinyabiziga byacu kandi ntiducibwe amande.”

Ibi kandi bigira ingaruka ku bakoresha inzira y’abanyamaguru nkuko Turatsinze George yabisobanuye.

Yagize ati: “Mu minsi ishize navanye umwana ku ishuri, turi mu nzira yacu y’abanyamaguru umumotari aturuka inyuma yacu ahunga ikamyo ampushura ku rutugu. Yarangonze ariko Imana ikinga akaboko. Kubera guhora tubisikana n’abamotari mu nzira y’abanyamaguru twumva bakubakirwa parikingi bigaca aka kajagari n’impanuka za hato na hato.”

Umuyobozi w’Akarere ka Ngoma, Niyonagira Nathalie yavuze ko hari gushakwa aho pariki y’abamotari yashyirwa hafi ya gare mu gihe cya vuba.

Yagize ati: “Turacyari kureba ahajya pariki y’abamotari kuko mu by’ukuri baparikaga ahahoze gare ariko haza kuvugururwa hubakwa aho imodoka zihagarara. Bafite ikibazo Koko kuko n’aho baparika kuri Sitasiyo ntibyemewe, kubera ko baba bategereje abagenzi hafi bava muri gare bishobora guteza impanuka. Turi gushakisha ahakubakwa parikingi yabo kandi turi gushaka hafi ahatabangamira abagenzi n’abamotari. “

Mu kwirinda ibihano n’impanuka za hato na hato, ubuyobozi bw’Akarere ka Ngoma busaba abamotari guparika ahari parikingi zabo mu gihe hari gushakishwa ahantu hakubakwa parikingi yabo.

FAUSTIN NSHIMIYIMANA

  • Imvaho Nshya
  • Ukwakira 31, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE