Namibia yikuye muri gahunda ya SADC yo kohereza ingabo muri Congo

  • ZIGAMA THEONESTE
  • Ugushyingo 30, 2023
  • Hashize amezi 3
Image

Perezida w’igihugu cya Namibia Hage Geingob yatangaje ko igihugu cye kitazigera cyohereza ingabo muri Repubulika Iharanira Demokarasi ya Congo z’Umuryango w’Ubukungu w’Ibihugu by’Afurika y’Amajyepfo (SADC).

Namibia ni kimwe mu bihugu 16 bigize Umuryango  SADC, aho izi ngabo z’uwo muryango ziteganya koherezwa muri Congo mu butumwa bwo kubungabunga amahoro n’umutekano mu Burasirazuba.

Ibyo bihugu ni Repubulika Iharanira Demokarasi ya Congo, Angola, Botswana, Comoros Eswatini, Lesotho, Madagascar, Malawi, Mauritius, Mozambique, Namibia, Seychelles, Afurika y’epfo, Tanzania, Zambia na  Zimbabwe.

Perezida wa Namibia Hage, yashimangiye ko Guverinoma ye itazohereza ingabo zayo muri Congo icyakora ko izatanga inkunga y’amafaranga mu gihe akenewe.

Yagize: “Ikibazo cya DRC kiracyagaragara. DRC irahinduka kuva ku kugira aba bafatanyabikorwa; Afurika y’Iburasirazuba ubu yasabwe kugenda, none SADC igomba kwinjira. Navuze ko tutazohereza ingabo; ntabwo dufite uburyo bwo kubikora. Ariko Afurika y’Epfo na bo bemeye kohereza izo ngabo.”

Mu cyumweru gishize, SADC na Guverinoma ya Kinshasa bashyize umukono ku masezerano i Kinshasa yo kohereza ingabo zizafasha guhashya imitwe yitwaje intwaro, harimo n’inyeshyamba za M23, mu burasirazuba bw’igihugu.

Icyemezo cyo kohereza ingabo za SADC cyari cyarafashwe mu nama yabereye i Windhoek muri Namibia muri Gicurasi 2023.

Ikinyamakuru cya Leta ya Namibia (NAMPA), cyanditse ko Perezida Geingob yakomeje agira ati: “Abazohereza  ingabo biteguye kubikora, ariko twiyemeje gutera inkunga y’amafaranga aho dushoboye”.

Igihe Perezida Geingob yari Umuyobozi wa SADC, yavuze ko yagiranye inama n’Umunyamabanga Mukuru w’Umuryango w’Abibumbye, Antonio Guterres, ku kibazo cy’uburasirazuba bwa DRC.

Geingob yagize ati: “Nk’umwe mu bagize Akanama k’Amahoro n’Umutekano ka Afurika Yunze Ubumwe, kandi nk’Umuyobozi wa SADC, nitabiriye Inama y’Akanama k’Amahoro n’Umutekano kugira ngo amakimbirane arangire muri DRC.”

Ingabo z’Akarere k’Afurika y’Iburasirazuba zoherejwe muri Kivu y’Amajyaruguru na Ituri, biteganyijwe ko zizava muri Repubulika ya Demokarasi ya Congo tariki ya 8 Ukuboza 2023, mbere y’uko ingabo za SADC zihagera.

Ingabo z’akarere zoherejwe mu mpera z’umwaka ushize kugira ngo zihagarare hagati y’abarwana mu gihe hashakwa igisubizo mu nzira ya dipolomasi n’ibiganiro.

Guverinoma ya Kinshasa yatangaje ko idateze kugira ibiganiro n’umutwe w’inyeshyamba wa M23.

Kuri ubu imirwano hagati ya M23 na FARDC ifashwa n’imitwe ya Wazalendo ikomeje kumvikana muri Teritwari za Masisi Rutsuru na Nyiragongo.

Intambara habarurwa abarenga miliyoni 2 yakuye mu byabo barimo abo ihitana n’abahungiye mu bihugu by’abaturanyi ba Congo birimo n’u Rwanda n’abahungiye mu gihugu imbere ahatari imirwano.

  • ZIGAMA THEONESTE
  • Ugushyingo 30, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE