Musanze: Inyama n’ikirayi byatumye aterwa inda n’umucuruzi wamwizezaga ibitangaza

  • NGABOYABAHIZI PROTAIS
  • Ukuboza 12, 2023
  • Hashize amezi 5
Image

Ku myaka 19, Uwamahoro Julienne (izina ryahinduwe) yigaga mu mashuri yisumbuye ariko inzozi ze zaje gusenywa n’umugabo wari umucuruzi ukomeye mu isanteri ya Kinigi, Akarere ka Musanze, wamwizezaga urukundo ariko yamara kumutera inda agatorokera muri Uganda.

Hari mu mwaka wa 2015, ubwo Uwamahoro wo mu Murenge wa Kinigi, Akarere ka Musanze, yamenyaga ko yasamye nyuma y’igihe yari amaze acuditse n’uwo mucuruzi wamwangirije ubuzima amushukisha amafaranga kumugurira inyama zokeje n’ibirayi mu kabare n’utundi duhendabana.

Yagize ati: “Natewe inda n’umugabo wajyaga anyereka ko ankunda akampa amafaranga ngo njye kunywa icyayi, buri munsi akamvugisha mbese akifuza ko yahora azi amakuru yanjye. Byageze aho nawe urabyumva umwana w’umwangavu biba bikaze numvaga nanjye yakanguye ibyiyumviro byanjye ariko nkiyibagiza ko afite umugore.”

Uwamahoro avuga ko na we yiyumvisemo uyu mugabo, yava ku ishuri agakenyera igitenge akajya kumureba yiyoberanyije kugira ngo abantu batabona ko yambaye umwenda w’ishuri.

Ati: “Namusangaga muri kamwe mu tubare two mu Kinigi, akangurira inyama zokeje n’ikirayi ngataha.”

Uwamahoro avuga ko uko iminsi yagendaga ishira na we ni ko yumvaga no kwiga atabishaka ahubwo yifuzaga kubaka urugo n’uwo mugabo.

Yagize ati: “Mu by’ukuri iyo twahuriraga mu kabari mu Kinigi ntacyo yambazaga, ariko natunguwe umunsi umwe ubwo yanjyanye ahantu heza mu Mujyi wa Musanze, hari uburiri bwiza nsanga bateguye ibiribwa byiza yemwe ni na bwo uwo munsi nanyoye divayi. Uwo munsi rero ni bwo twaryamye dukorana imibonano mpuzabitsina nkurizamo gutwara inda kuva uwo munsi ntangira inzira y’umusaraba rero”.

Nyuma y’uko ababyeyi bamenya ko atwite Uwamahoro yahuye n’akaga gakomeye, ku buryo bamuhaye akato mu muryango ntiyagira umuvandimwe umucira akari urutega.

Yagize ati: “Namaze gutwara inda ababyeyi babimenye baranshorera no mu rugo rw’uwo mugabo dusanga yatorotse yerekeje Uganda, bansubiza mu rugo bampa isahane yanjye, ibase, icyumba cyanjye ngo ntabahumanya. Nagerageje gukuramo inda biranga, nahambiriye umugozi mu cyumba ngo nimanike ngira ubwoba ngeze aho nemera urwaje mbona ndabyaye. Abantu ku mpande ni bo bampaye utwambaro tw’umwana n’ibyahi, ubu ndi aho ariko narihannye”.

Uwamahoro avuga ko ngo kuba yaratewe inda imburagihe byatumye ahura n’igihombo atazikura mu buzima bwe kandi azahora yicuza.

Yagize ati: “Umugabo yanteye inda mu mwaka wa 2015, tekereza ko abo twiganye ubu bari muri kaminuza. Kandi nari umuhanga abo narushaga mu ishuri bamwe ni abarezi, abandi barashatse bafite ingo nziza njyewe nkiri umucanshuro. Ikibabaza rero ni uko n’uwo mugabo akwereka urukundo atazanakugira umugore, ndasaba abakobwa kwitwararika, ikindi ababyeyi bakajya bamenya amakuru y’abana babo.”

Uretse Uwamahoro, undi wiswe Mukamusoni na we yavugaga ko umugabo wamuteye inda yahisemo kumuhungishiriza muri Uganda agezeyo ubuzima bw’aho buramuyobera, ahitamo kugaruka mu Rwanda.

Yagize ati: “Njye banteye inda ngeze mu mwaka wa gatanu w’amashuri yisumbuye, ababyeyi barantoteza kugeza ubwo umugabo wanteye inda ahitamo kujya kumpisha i Kisoro.  Hariya nahahuriye n’ingorane zikomeye kuko umugabo yansizeyo arigarukira nkajya guca inshuro mu baturage, mbona tike ndagaruka ubuyobozi busaba ababyeyi banjye kunyakira ku kibi n’ikiza, ariko nabwo ntabwo mbayeho neza. Abagabo baradushuka bakatwangiza dukwiye kugira intego tukirinda abagabo iyo bava bakagera”.

Aba bakobwa bombi bavuga ko nyuma yo guhura n’ingorane zirimo ubukene ndetse n’akato gusa batarekeye aho ngo kuko bahisemo kwiga umwuga, aho kuri ubu bakora umwuga w’ubudozi kandi ngo iyo bigenze neza ntibabura kubona amafaranga atari munsi y’ibihumbi 50 ku kwezi.

Uwamahoro yagize ati: “Njye nyuma y’ako kababaro kose nakoreraga udufaranga duke nkatuzigama mu matsinda, njya kwiga imashini idoda nza kugira abagiraneza bampa imashni none ubu ndadoda ncuruza n’ibitenge ku buryo ntabura kwinjiza amafaranga ibihumbi 60 ku kwezi”.

Ubuzima bw’aba bakobwa bwatangiye guhinduka kubera Umuryango Uharanira kunoza imibereho y’abaturiye Sabyinyo (SACOLA/Sabyinyo Community Livelihood Association) wabafashije kwiga umwuga ndetse ukanabatera inkunga.

Basaba ababyeyi kujya baganiriza abana babo bakumva ibibazo byabo, cyane ibijyanye n’imibereho yabo ku ishuri ndetse bakajya babaza aho bakura ibintu by’agaciro baba batarabaguriye.

Kugeza ubu 2023 imibare igaragaza ko abangavu bagera ku 1000 batewe inda mu Ntara y’Amajyaruguru mu mwaka ushize wa 2022, ariko 300 muri bo ni bo bagannye ubutabera.

  • NGABOYABAHIZI PROTAIS
  • Ukuboza 12, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE