Musanze: Amatsinda yabaze inka 158 mu kwizihiza Ubunani

  • NGABOYABAHIZI PROTAIS
  • Ukuboza 31, 2023
  • Hashize amezi 5
Image

Kuri uyu munsi usoza umwaka wa 2023, abaturage bo mu Mirenge inyuranye yo mu Karere ka Musanze bibumbiye mu matsinda anyuranye, babaze inka 158 bagabana inyama mu kwitegura Umunsi Mukuru w’Ubunani uba ejo ku wa 1 Mutarama 2023.

Ni inka abaturage babarizwa muri ayo matsina baguze mu mafaranga bizigamiye mu gihe cy’umwaka, kugira ngo mu gutangira umwaka mushya bazabashe kwishimana n’imiryango yabo.

Izon ka zabagiwe ku gasozi ariko zibanza  gupimwa na ba veterineri babigize umwuga. Buri munyamuryango yitwaza igisorori, indobo cyangwa ikindi gikoresho atwaramo inyama yagabanye bitewe n’inka baguze uko ingana.

Inka iyo imaze kubagwa, inyamaziterwa imirwi ingana n’abagabana iyo nka kandi bigakorwa mu buryo bungana. Bivugwa ko abenshi baba baranakotereje uburisho.

Ababarizwa matsinda azwi nka ‘Twihaze’ bavuga ko yatangiye agamije kugura inyama kurya ku Bunani ariko ngo baje gusanga ari inzira nziza yo kungurana ibitekerezo no kwiteza imbere.

Rushigajiki Celestin, ukuriye itsinda ryitwa Turwanyimiriremibi mu Murenge wa Kimonyi, yabwiye Imvaho Nshya ko ayo matsinda abafasha no mu busabane.

Yagize ati: “Ubundi twatangiye tugamije kujya twirira inka gusa, kuko ibi bintu bituma abadafite amikoro yo kuba bagura inyama bizigamira mu ntangiriro z’umwaka,  hanyuma umunsi nk’uyu akagabana inyama zitari munsi y’ibilo 8 cyane ko nk’ubu twabaze inka 3 ku bantu 42.”

Rushigajiki akomeza avuga ko uretse no kuba hari inyama bagabana ngo ni n’uburyo bwiza bwo gukora ubukangurambaga bwo kwishyura ubwisungane mu kwivuza no kwitabira izindi gahunda za Leta zitandukanye.

Abaturage mbere y’uko bagabana inyama Veterineri abanza kuzipima

Yagize ati: “Ubu iri tsinda ni kimwe mu bituma tuganira tukungurana ibitekerezo, mbese amatsinda nk’aya ni nk’umugoroba w’ababyeyi duhura inshuro imwe mu kwezi, ni yo mpavu rero usanga nta muntu uba muri iri tsinda urengwa Mitiweli. Kubera ko aya mafaranga dutanga adashobora kuguma hamwe, tugenda tuyagurizanya umwana akajya mu ishuri iyo umubyeyi we ari umunyamuryango ntashobora kubura amafaranga y’ishuri turayamuguriza agakemura icyo kibazo.”

Akomeza avuga ko abishyize hamwe bagira imbaraga zikomeye, bahereye ku  mafaranga make.

Yagize ati: “Ubu mu gihe cy’umwaka  twizigamiye agera kuri miliyoni ebyiri n’igice kuko amafaranga tugenda tuyagurizanya akunguka. Urumva ubu dushatse twagura na moto tukayishyira mu muhanda ikabyara andi mafaranga kandi ni yo ntego. Imbaraga zishyizwe hamwe ni iterambere, ndasaba abaturage ko buri wese yagira itsinda abarizwamo”.

Kwizera Pascal wo mu itsinda Twizerane, avuga ko itsinda ryabo ryatangiye ari abantu 25 none bageze kuri 45. Mu gihe cy’imyaka 6 bamaze ibyo bitaga Twihaze byatumye bagendana na gahunda za Leta.

Yagize ati: “Twe umugabane umwe ni amafaranga ibihumbi bitanu. Umuntu ayatanga inshuro imwe mu mwaka bamwe baba bumva ko ari ay’inyama gusa ariko twageze aho twemeza ko nta munyamuryango ugomba kubaho adafite ubwisungane mu kwivuza, ikindi ntabwo ubu twabana nawe mu itsinda utagira EjoHeza. Iri tsinda nakuyemo inguzanyo nkuramo amafaranga naguzemo amabati nsana inzu yanjye; umunsi nk’uyu rero ni mwiza cyane kuko utuma buri wese abona inyama binyuze mu bwizigame”.

Umukozi w’Akarere ka Musanze ushinzwe ubworozi Dr  Nsengiyumva , ean Bosco na we ashimangira ko amatsinda ya Twihaze yahinduye ubuzima bw’abantu, anashimangira ko umunsi nk’uyu bitegura Ubunani bw’umwaka wa 2024 habazwe inka 158.

Yagize ati: “Amatsinda nk’ariya yo kwizigamira inyama umuturage azarya ku Munsi Mukuru haba kuri Noheli ku Bunani, ni ibintu usanga bishimangira ubusabane ariko nanone bikazamura umuturage mu mibereho ye n’imyumvire. Mwumvise ko nta muntu ubura Mitiweli ari mu itsinda nk’iri ikindi bituma gahunda za Leta zishyirwa mu bikorwa. Habazwe inka 158, ndasaba ko ababaga inka bose babanza Veterineri akazipima turabafite mu mirenge”.

Kuri uyu munsi abaturage batari mu matsinda na bo baba bishimiye ko inyama igiciro cyagabanyutse kuko ubu ikiro ni amafanga hagati y’i 2500 na 2800, ikinono ni amafaranga 1000.

  • NGABOYABAHIZI PROTAIS
  • Ukuboza 31, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE