Musanze: Abakorera BIDEC LTD barayishinja kutita ku buzima bwabo

  • Imvaho Nshya
  • Ukwakira 31, 2023
  • Hashize amezi 4
Image

Abakora umurimo wo kuvangura imyanda mu kimpoteri cya Cyuve mu Karere ka Musanze bakorera ikigo kitwa BIDEC (Bureau des Initiatives de Developpement Communautaire), bavuga ko umukoresha wabo ari we BIDEC aho kwita ku buzima bw’abo akoresha we yirebera inyungu ze gusa, nyamara abakozi bafite ibibazo by’uruhuri.

Iki kimpoteri giherereye mu Mudugudu wa Bubandu, Akagari ka Bukinanyana mu Murenge wa Cyuve aho BIDEC ikora ifumbire y’imborera mu myanda ibora ivangurwa n’itabora.

Imyanda ibora ni yo ikorwamo iyo fumbire yifashishwa mu buhinzi cyane cyane ubw’ibirayi, ibishyimbo, ibigori, ikawa n’ibindi bihingwa.

Abo bakozi bavuga ko batagira ibikoresho byo kwirinda, aho usanga bamwe bahambiriye imifuka ku birenge kugira ngo barebe ko bakorera amafaranga ngo kuko nta mahitamo yandi.

Bimenyimana Francois ni umwe mu bakora uwo murimo wo gutandukanya imyanda ibora n’itabora avuga ko n’ubwo bakora kariya kazi badahabwa agaciro kugeza ubwo BIDEC Ltd imugeramo umwenda w’amafaranga 354 000 y’u Rwanda

Yagize ati: «Reba aha hantu dukorera, urumva umunuko w’imyanda inyuranye, reba aya macupa n’ibyuma byose usanga ari twe twirirwa tubyivurugutamo, nyamara twinjiriza BIDEC, bosi wacu ari we uyiyobora Ngarukiye Evariste ntaduha agaciro nibura ngo aduhe udupfukantoki, udupfukamunwa, cyangwa se da niba byanze adushakire bote. Ibi kandi uko ureba biherekezwa no kuba atwambura nk’ubu tumaze amezi 6 ataduhemba, abakire tubaha amaraso yacu ariko bo ntibita ku mvune duhura nazo».

Abakorera BIDEC Ltd bavuga ko bafatwa nk’abacakara kuko ngo badahabwa ibyo umukozi akwiye kugira ngo yoroherezwe mu kazi ke nk’uko Nzabandora yabitangarije Imvaho Nshya.

Yagize ati: «Ubu twabuze uwo dutakira nk’ubu turi abakozi 10, nta kuduha ibikoresho nta kuduhembera ku gihe tekereza kuza ukirirwa wivuruguta muri uyu mwanda nta sabune, muri ibi bihe ibiciro byazamutse  n’ibiribwa bikaba ari ikibazo.

Abagore bacu bo barumiwe badufata nk’ibisambo, bamwe bagenda bivira mu kazi kubera kwanga amakimbirane mu ngo zabo, rwose abashoramari bajye bita ku bakozi, kandi n’Inzego z’ibanze zijye zimenya amakuru y’ibibera aho bayobora, kuko hano wagira ngo ni mu yindi si ndizera ko nta gitifu wakwemera ko haba umukozi ukorera mu bimene by’amacupa yahambirije ibirenge imifuka y’ubudeyi n’amasashe».

Umuyobozi wa BIDEC Ltd Ngarukiye Evariste, nawe ashimangira ko hari abo abereyemo umwenda ariko ngo ntabwo yari yakora igenzura, ku bijyanye n’ibikoresho byo kwirinda avuga ko abigura abakozi bakagenda babyibana.

Yagize ati: «Ntabwo nahakana ko nta mukozi ntabereyemo umwenda kuko njye maze amezi abiri nararwaye mba mu bitaro, ariko ngiye kubaza Umucungamutungo ndebe umwenda mbabereyemo mbishyure, ku bijyanye n’ibikoresho by’ubwirinzi byo koko hashize igihe batabifite ubu tugiye kubikosora n’ubwo hari bamwe barangara bagenzi babo bakabyibira muri hangari».

Umunyamabanga Nshingwabikorwa w’Umurenge wa Cyuve iki kimoteri giherereyemo Bwanakweli Hussein, we avuga ko iki kibazo atari akizi ariko ngo bagiye kugikurikirana nyuma yo kukimenyeshwa

Yagize ati: «Iki kibazo cyo kuba aba bakozi bafatwa nabi mu buryo nka buriya nk’uko mwabitweretse ku mafoto, umukozi akajya muri biriya bintu by’ibishingwe binyuranye. harimo ibyuma, amacupa, ibyuma n’ibindi byaba bibabaje kandi biteye isoni.

Ikibazo turakimenye ndetse n’ubu ni uko ngiye kuganira n’abaturage mba mpise njyayo, ariko ejo ndagerayo ndetse na rwiyemezamirimo uwo ndamuvugisha aho kugira ngo abaturage bahatakarize ubuzima, twazamusaba akaba ahagaritse imirimo akabanza agakemura ibibazo afitanye n’abakozi».

Bwanakweli akomeza asaba abakozi kujya batangira amakuru ku gihe aho kugira ngo bajye bakora kugeza ubwo bamburwa umushahara wabo w’amezi arenze abiri, cyangwa se bagasabwa gutanga umusaruro ariko bo bagashyira ubuzima bwabo mu kaga.

Ikompanyi ya BIDEC Ltd, ikorera imirimo yo gutunganya ifumbire iyikuye mu bishingwe bibora yatangiye imirimo mu 2018, ikaba ikorera mu Turere twa Musanze, Huye na Rubavu, ariko hafi ya hose barataka imibereho mibi nk’uko Imvaho Nshya yagiye ivugana na bo, aho aba Rubavu bo bavuga ko bamaze amezi agera kuri 4 badahembwa.

NGABOYABAHIZI PROTAIS

  • Imvaho Nshya
  • Ukwakira 31, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE