Muhanga: Yashwanye na se amena ibanga ry’imibiri y’abishwe muri Jenoside

  • AKIMANA JEAN DE DIEU
  • Gashyantare 29, 2024
  • Hashize amezi 2
Image

Abantu bane bo mu Karere ka Muhanga batawe muri yombi, nyuma y’aho umwana na se bashwanye bikarangira aamennye ibanga ry’amakuru y’ahari imibiri y’inzirakarengane zazize Jenoside yakorewe Abatutsi mu 1994 bari bamaze imyaka ikabakaba 30 baryamyeho.

Mu bafashwe harimo Nzabamwita Antoine n’umuhungu we Niyoyita Bonaventure, ari na we watanze amakuru nyuma yo kutumvikana na se.

Imirimo yo gushakisha iyo mibiri yahise itangira, ariko iyo mibiri ikaba ikirimo gushakishwa aho umusore yagaragaje ko ari ho abo bantu biciwe mu gihe cya Jenoside yakorewe Abatutsi mu 1994.

Ni igikorwa gikomeje gukorerwa mu Kagari ka Gahogo, Umurenge wa Nyamabuye, Akarere ka Muhanga guhera tariki ya 28 Gashyantare 2024..

Umunyamabaga Nshingwabikorwa w’Umurenge wa Nyamabuye Nshimiyimana Jean Claude, yemeje aya makuru y’uko abantu 4 bamaze gutabwa muri yombi, bakaba barimo kubazwa ku makuru ajyanye n’imibiri itaratanzweho amakuru ku gihe.

Yagize ati: “Aya makuru yamenyekanye tariki ya 27 Gashyantare 2024, ndetse kugeza ubu hamaze gufatwa abantu 4 barimo Nzabamwita Antoine n’umuhungu we witwa Niyoyita Bonaventure watanze amakuru, bivugwa ko bagiranye ikibazo agatanga aya makuru.”

Akomeza avuga ko aya makuru amaze gutangwa Nzabamwita Antoine na we yegerewe akemera ko hari abantu biciwe muri uwo murima we nubwo atibuka neza aho iyo mibiri iherereye muri uwo murima.

Hanafashwe kandi uwitwa Mukankiko Marie Josee w’imyaka 67 na Nyirarukundo Fellecula w’imyaka 54, bakavuga ko nta makuru bari bazi kuri iyi mibiri kandi bose ari ba Kavukire binavugwa ko bari bafite icyo babiziho.

Bivugwa ko abishwe ari abageragezaga guhungira i Kabgayi bagahura n’abari bavuye kugemura mu Bitaro bya Kabgayi bakaba ari bo babica.

Yagize ati: “Aya makuru yamenyekanye bihereye ku makimbirane y’abagize umuryango ndetse bigaragara ko bashobora kuba bahisha amakuru ku byo bazi nubwo kubona iyi mibiri ivugwa bigoye ariko ntabwo twahunga amakuru yose yatanzwe  ku mibiri y’Abatutsi bishwe muri Jenoside.”

Yavuze ko hari amakuru yamenyekanye ko imibiri y’abiciwe muri iyo sambu ishobora kuba yarimuwe mu buryo bwo guhishira ibimenyetso, akanagaragaza ko mu gihe bamaze bashakisha babonye imyenda, inkweto n’ibyangombwa by’abishwe.

Gitifu Nshimiyimana akomeza asaba abantu bose bafite  amakuru ko bayatanga kugira ngo abatarashyingurwa mu cyubahiro bashakishwe bashyingurwe mu cyubahiro kibakwiriye.

Avuga ko iyo amakuru yatanzwe hadakoreshejwe ubushake, ashobora kubeshya abantu bagakomeza gushakisha ahatari ngombwa n’ubwo nta wakwirengagiza ayo makuru yatanzwe ku ikubitiro.

Ati “Turabasaba ko batanga amakuru kugira ngo ahiciwe Umututsi wese havugwe kandi binadufashe kugera ku bumwe n’ubwiyunge. Hanatangwe amakuru y’ahajugunwe abishwe kugira ngo iyo mibiri ishyingurwe. Uwabuze uwe akamubona bimugabanyiriza intimba yatewe n’ibisigisigi by’amateka ya Jenoside yakorewe Abatutsi.”

Yavuze ko bibabaje kuba mu gihe Abanyarwanda n’Isi yose biteguye kwibuka ku nshuro ya 30 Jenoside yakorewe Abatutsi mu 1994 hakiri abantu bahishira amakuru y’abishwe bikaba bigifatwa nk’aho bajugunywe ahatazwi kandi hari abahazi.

Gusa hari abaturage bavuga ko amakuru y’iyi mibiri yari azwi n’abantu benshi bo muri kariya gace, ariko igihe cyo kuyatanga ngo barabihishe bikavugirwa mu matamatama gusa.

  • AKIMANA JEAN DE DIEU
  • Gashyantare 29, 2024
  • Hashize amezi 2
TANGA IGITEKEREZO
lg says:
Werurwe 1, 2024 at 7:46 am

mbisubiramo ahantu nkaho abali bahaturanye nahavugwa gutabwa abantu bajye bafatwa bose niyo waba umudugudu bapfa kuba igihe cya génocide balibahatuye kandi bagejeje kumyaka 12 niwo muti wonyine izuba ryabaga riva bose bidegembya bali mukirori cyo kwica abatutsi icyo nababwira nuko 90% yabo bazi amakuru yose aliko bacecetse niyo mpamvu ahatahuwe ahiciwe abantu abobose arukubazirika barabizi ibyo bintu

Andika igitekerezo

AMATEGEKO AGENGA IYANDIKA RY'IGITEKEREZO CYAWE